Hollar ábendingar og annað röfl

Bróðir minn vísar í þrjár súper greinar eftir gamla góða Uri Avnery. Tékkið endilega á þeim. Umfjöllunarefnið eru landtökumennirnir í hernumdri Palestínu og útistöður þeirra við alla í kring um sig, nú síðast guðföður sinn Sharon.

Fyrst ég er að vísa í góðar greinar, þá ætla ég að feta í fótspor Dodda og Hreins Hjartahlýs (og sjálfsagt fleiri) og vísa í súper grein doktor Jakobssonar á Múrnum: „Það teljast ekki allir með“ - það taka sko ekki margir Sverri Jakobssyni fram þegar hann fer í bæinn, sem sagt er...

...og fyrst minnst er á Hrein (eða Hreinan?) Hjartahlýjan, þá vil ég líka benda á skrif hans að undanförnu, þar sem kennir margra áhugaverðra grasa. Hreinn, þú ert frábær.

Mér hefur upp á síðkastið (og reyndar oft áður) þótt gæta nokkurs misskilnings á því hvaða hugmyndir ég hef um al Qaida og mögulega aðkomu vestrænna stjórnvalda að hryðjuverkum í eigin ranni. Ég þarf eiginlega að reifa þetta mál í greinarkorni og skýra afstöðu mína. Ég nenni því ekki núna, en kem því vonandi í verk á næstunni.

Einn heiðursmaður skipti um símafyrirtæki nýverið og sagðist hafa sagt upp viðskiptum sínum við ríkið. Undirritaður henti það á lofti: „Mikið væri það sniðugt ef maður gæti bara sagt upp viðskiptum sínum við ríkið og orðið einhvers konar fullvalda einstaklingur.“ Mikið fannst mér ég þá vera snjall.

Musharraf hershöfðingi (ég neita að kalla valdaræningja forseta, þótt hann sé „okkar tíkarsonur“) ætlar að reyna að uppræta öfgar og bókstafstrú - með lögregluvaldi. Mikið væri lífið einfalt ef það væri hægt að lagfæra djúpstæð samfélagsmein með því að banna þau bara með lögum. Ég leyfi mér að hafa efasemdir um að þetta eigi eftir að ganga vel hjá honum.

Fór um daginn í fornbókabúð og keypti stafla af kommabókum, þar á meðal Ritgerðir eftir Maó Tse-tung, í íslenskri þýðingu Brynjólfs Bjarnasonar og fleiri heiðursmanna, í þrem bindum. Fyrir átti ég ritgerðasafn eftir Maó á ensku, í fimm bindum. Í hreinskilni sagt veit ég ekki hvort ég á nokkrun tímann eftir að nenna að lesa þetta allt. Eins og fleiri er Maó lítt vinsæll meðal flestra, skiljanlega, enda með ófá mannslíf á samviskunni. Það er samt synd að draga þá mynd upp af honum að hann hafi verið einhver ómennskur manndjöfull. Hvað sem líður illvirkjum sem framin voru í valdatíð hans, þá er eitt og annað í ritum hans sem ástæðulaust er að virða að vettugi. Nú verð ég sjálfsagt kallaður „maó-apologisti“ - en Maó átti sínar góðu hliðar líka.

"Pyndingaaðferðirnar sem eru notaðar í Abu Ghraib voru fyrst notaðar í Guantanamo" er sagt í Washington Post.
~~~ ~~~ ~~~ ~~~
Kantipur Online greinir frá: Leiðtogar þingræðisflokkanna sjö í Nepal taka vel í tilboð Prachanda og maóista um samfylkingu gegn krúnunni, en óska eftir því að maóistar komi fyrst til móts við þá í verki, til að byggja upp traust.
Maóistar eru sagðir hafa komist að samkomulagi við krúnuna um að láta Sameinuðu þjóðirnar taka við stjórn landsins í eitt ár, skipuleggja kosningar, og vinna að friði. Merkilegt þykir mér, ef rétt er.
Lífi dr. Baburam Bhattarai er ógnað af fyrrum vopnabræðrum hans í maóistaflokknum, er sagt.
Madan P. Khanal skrifar: "Nepal: Maoist-Khmer Rouge Comparisons May Be Helpful".
~~~ ~~~ ~~~ ~~~
Mér var bent á að einn linkurinn í bloggi mínu frá því á þriðjudaginn er villandi, það var þessi hér. Þar taldi ég mig sumsé vera að vísa í Al Jazeera, í frétt/grein sem vísað var í frá Gagnauga. Í vísuninni á Gagnauga er þessi mynd: ... svo ég, í fljótfærni minni, ályktaði að þetta væri hin eina sanna Al Jazeera. Svo er ekki. Hin eina sanna er á www.aljazeera.net en www.aljazeera.com virðist vera einhver síða sem stelur nafninu þeirra. Ég hef ekki skoðað þá síðarnefndu og hef því ekki myndað mér skoðun á henni - en viðkynningin þykir mér ekki byrja vel. Byrja á því að villa á sér heimildir? Uss. Alla vega, þessari leiðréttingu er hér með komið á framfæri.
~~~ ~~~ ~~~ ~~~
Einnig var bent á þetta sem andmæli við ummælum Juans Cole. Vitnað er í þýðanda á MSNBC, sem tók eftir villu í ritningartextanum í yfirlýsingunni - auk þess sem þar kemur fram að í þessari yfirlýsingu ku enginn lýsa tilræðinu á hendur sér, heldur er tilræðismönnunum hrósað í henni. Hins vegar hafi ný-kónar og fjölmiðlar strax hent þetta á lofti og fullyrt að al-Qaeda hafi þarna lýst ábyrgð á verknaðinum. Enn og aftur vil ég taka fram að ég hef hvorki þekkingu á arabísku né íslömskum ritningartextum, og heldur ekki aðgang að yfirlýsingunni margnefndu, þannig að ég hef ekki forsendur til að hafna þessu eða staðfesta það.
~~~ ~~~ ~~~ ~~~
Gullverðið heldur áfram að lækka...
~~~ ~~~ ~~~ ~~~
Galloway tjáir sig um sprengingarnar.
~~~ ~~~ ~~~ ~~~
Rumsfeld segist telja að Íranir hafi haft puttana í sprengingunni í Netanya í Ísrael.
~~~ ~~~ ~~~ ~~~
Ég hlustaði á BBC World Service í dag. Þar var þáttur um hispanic-Bandaríkjamenn sem hafa snúist til íslams. Þeir eru enn ekki margir, en fer nokkuð fjölgandi. Hverfa frá rómversk-kaþólskri trú og taka íslam.
Einhverjar ástæður komu fram, og eina þeirra skil ég ágætlega: Fólki, sem vildi aðhyllast alvöru eingyðistrú, fannst það ekki eiga heima í kaþólsku kirkjunni, en fann í íslam það sem það leitaði að. Ein kona sagði frá því að meðan hún var kaþólsk hefði hún aldrei beðið til Ésú, heldur alltaf beint til gvuðsa. Hún "vissi af Ésú þarna einhvers staðar" en það var gvuðsi sem hún átti eitthvað vantalað við. Þegar hún kynntist íslam áttaði hún sig á því að það væri ólógískt að gvuðsi ætti son, auk þess hvað það væri fáránlegt að hann væri einþrír. Kristni er ekki eingyðistrú ef gvuðsarnir í henni eru einþrír. Gvuðsi íslams er hins vegar bara einn og óskiptur. Eins og einhver sagði, því færri guðir, þess betra.

London: Efasemdir og efasemdir um efasemdir

Eins og varðandi atburðina 11. september 2001, hefur Matti efasemdir um efasemdir mínar um það sem stjórnvöld og fjölmiðlar segja um sprengingarnar í London. Svo það komi fram, þá set ég fyrirvara við (a) hvað fólk virðist vera fljótt að úrskurða að íslamskir bókstafstrúarmenn hafi verið að verki (einir) og (b) hvað stjórnvöld eru strax farin að gera sig líkleg til að misnota sér þessi ógæfuverk í pólitísku skyni. Varðandi fyrri liðinn, þá veit ég ekki hverjir voru að verki. Tony Blair er margfaldur lygari og hefur hagsmuni af að skýringarnar séu á þennan veginn eða hinn, svo ég vantreysti því sem kemur frá honum eða öðrum innan breska stjórnkerfisins. Það tengist svo aftur seinni liðnum: Vegna þess hvað stjórnvöld eru fljót að ætla að nýta sér hryðjuverkin í eigin þágu, og vegna þess að fyrir liggja óteljandi dæmi um að stjórnvöld (ýmissa landa) framkvæmi sjálf ódæðisverk gegn eigin borgurum einmitt til að nýta sér þau í pólitísku skyni, þá er óvarlegt að útiloka að sninister element innan stjórnkerfis Bretlands sjálfs hafi komið nálægt þessu - ég sé ekki að slík element ættu ekki að vera til skoðunar.

Matti skrifar um hvernig Donald MacIntyre gat keypt vopn og sprengiefni í fyrrum Júgóslavíu. Nú veit ég ekki hvort hann hafði í huga þau orð mín að „[s]prengiefnið í árásunum í London [sé] talið hafa verið hernaðar-sprengiefni. Hvaðan? Ekki vitað. Grunsamlegt? Kannski.“ Ég veit ekki hvað fólk les úr þessum orðum mínum, en af minni hálfu meinti ég ekki annað en það sem ég skrifaði: Kannski grunsamlegt. Það er ekki flókið að verða sér úti um vopn og sprengiefni ef maður er staðráðinn í því. Ef element í breska stjórnkerfinu eiga þarna hlut að máli, þá dreg ég líka í efa að þau mundu nota sprengiefni sem aðeins element í breska stjórnkerfinu gætu nálgast! Það væri einum of heimskulegt!

Öryggisæfingin margumtalaða ... ég veit ekki hvað slíkar æfingar eru algengar, en þær eru varla daglegt brauð. Mér þykir hins vegar athyglisvert að þarna hafi svipað verið uppi á teningnum og 11. september, að það hafi verið í gangi æfing þegar alvöru árás var gerð. Tilviljun? Það getur verið, en það er þá merkileg tilviljun.

(Hvað varðar David Galbraith og/eða þá hugmynd að árásirnar hafi beinst að múslimum, þá hef ég ekkert um það að segja.)

Annars bætir Matti við:

ps. Munið þið eftir því þegar því var spáð að Osama bin Laden kæmi í leitirnar fyrir síðustu forsetakosningar í Bandaríkjunum. Í raun væri fyrir löngu búið að handtaka hann og stjórn Bush væri að geyma hann! Hvað varð um þá kenningu? :-)

...ef ég man rétt var ég einn þeirra sem veltu vöngum yfir þessu á sínum tíma. Bin Laden kom ekki í leitirnar, jafnvel þótt mjög mjótt væri á munum í kosningabaráttunni, og það er auðvitað engin „staðfesting“ á neinu, að hann hafi sent frá sér myndband sem hlaut að styrkja Bush. En fyrst spurt er hvað hafi orðið um þá kenningu, þá er því til að svara, að það kom á daginn að hún stóðst ekki. Það þarf varla að orðlengja það meira. Ætli bin Laden verði nokkurn tímann „dreginn fram í dagsljósið“? Ætli hann sitji ekki bara á hreppstjórasvítunni á Hotel Dubai með Havanavindil og lífverði á launum hjá CIA? Tja, því ekki það?

Hreinn Hjartahlýr bendir á heimasíðu Juan Cole (sem er hin athyglisverðasta; ég á örugglega eftir að skoða hana oftar) og vitnar í Cole þar sem hann skrifar:

First, we still have no idea who did this. It is very likely the "Qaeda al-Jihad in Europe" group that claimed responsibility immediately. Their statement appeared very quickly after the bombings and yet had none of the appearance of being rushed. That suggests it was carefully composed before the fact. The rumors that the statement has errors in the Arabic or the Quran citation are absolutely incorrect, and al-Sharq al-Awsat came to the same conclusion in its Saturday edition.

Ég hef ekki séð þessar yfirlýsingar, kann ekkert í arabísku, og ætla ekki að vefengja það sjálfur að yfirlýsingarnar séu á réttri arabísku. Hvorki hef ég forsendur til þess, né skiptir það svo miklu máli. Það er ekki flókið að koma saman yfirlýsingu á réttri arabísku, enda enginn hörgull á fólki sem talar hana. Þessi "Leynisamtök al-Qaeda í Evrópu" eru merkilegra umhugsunarefni. Hvaða fólk leynist á bak við þetta heiti? Hvaða hagsmunir? Hver sem er gæti kallað sig einhverju svona nafni. Ef Cole hefur rétt fyrir sér má leiða getum að því að þeir sömu og skipulögðu árásirnar hafi einnig samið yfirlýsinguna og sent hana út. Þeir sömu, hverjir svo sem þeir eru.

Már skrifaði líka, m.a.: „En svona samsærisköltismi er náttla trúarbrögð eins og hver önnur, og ég býst ekki við að snúa neinum af sinni leið.“ Svona samsæris„költismi“? Við skulum átta okkur á einu: Samsæri er ekki það sama og samsæri. Það er til fólk sem aðhyllist vægast sagt langsóttar samsæriskenningar, t.d. margvíslegar kenningar sem fela í sér geimverur, svo dæmi sé tekið. Þeim hópi tilheyri ég ekki, svo það komi fram, og frábið mér slíkan samanburð. Ég tilheyri hinsvegar þeim hópi sem sér ástæðu til að vantreysta stjórnvöldum og gruna þau um græsku þegar slæmir atburðir gerast af mannavöldum og viðkomandi stjórnvöld hafa hagsmuna að gæta af þeim. Ég held að fáir neiti því að næg séu dæmin um myrkraverk stjórnvalda gegn sínum eigin þegnum í pólitísku skyni. Það er ekki ástæða til að treysta heiðarleika eða einlægni stjórnvalda, stjórnmálamanna eða embættismanna. Þegar maður finnir reykjarlykt leitar maður að upptökunum.

Má fannst ekki mikið koma til greinar sem ég vísaði í á Propaganda Matrix. Ég skal síðastur manna neita því, að Alex Jones og félagar eiga það til að draga full-djarfar ályktanir! Æfingarnar 11. september eru hins vegar ekki þeirra heilaspuni, þær stóðu yfir í alvörunni.
~~~ ~~~ ~~~ ~~~
Einnig var spurt hvað ég hefði að segja um hryðjuverkin í Madríd í fyrra. Ég hef það að segja um þau að hr. Aznar (a) var allt of fljótur á sér að kenna ETA um þau og (b) gerði (misheppnaða) tilraun til að notfæra sér árásirnar í pólitísku skyni. Röksemdir hans voru eitthvað á þessa leið: „Hryðjuverkamennirnir reyna að hræða Spánverja frá þátttöku í Íraksstríðinu; kjósið mig til að sýna að þið óttist ekki.“ Spænskir kjósendur létu ekki glepjast og kusu Zapatero & Co. í staðinn. Hvort Marokkómennirnir sem voru handteknir voru sekir eða saklausir veit ég ekki.
Mér er ekki kunnugt um aðild Spánverja sjálfra að sprengingunum í Madrid, en mér er kunnugt hvernig reynt var að nota þær spænskum valdamönnum til framdráttar.

Nokkrar ábendingar

Sverrir Jakobsson benti á þessa grein um muninn á "harðlínumönnum" og "umbótasinnum" - hér með bendi ég á hana líka! Góð grein.
========
Á Al Jazeera er þessi grein um þá "athyglisverðu tilviljun" að á sama tíma - og á sömu stöðum - og sprengingarnar í London urðu, þá var í gangi "öryggisæfing" þar sem hermt var eftir hryðjuverkaárás! Það sem gerir þetta ennþá undarlegra (les: tortryggilegra) er að það sama var uppi á teningnum þann 11. september 2001, þegar hermt var eftir flugránum í Bandaríkjunum! Sjá aðra grein um sama efni, ennþá ítarlegri, á Propaganda Matrix.
========
Michael Howard fer fram á extra-ítarlega rannsókn á tildrögum sprenginganna í London - og Blair bregst ókvæða við. Tortryggilegt? Dæmi hver fyrir sig.
========
Sprengiefnið í árásunum í London er talið hafa verið hernaðar-sprengiefni. Hvaðan? Ekki vitað. Grunsamlegt? Kannski.
========
ÞRJÁR mismunandi "al-Qaida sellur" hafa lýst ábyrgðinni á ódæðisverkinu á hendur sér! Það er ekki nema eðlilegt að efast um þessar yfirlýsingar ALLAR ÞRJÁR.
========

“From the terrorists’ point of view, it seems they have calculated they need to do just one significant terrorist attack a year in another capital, and it regenerates the same fear and anxieties,” said Hoffman, who was an adviser to the U.S. occupation in Iraq.
What should be broken, he said, is the cycle of terrorist recruitment through the generations. “Here you come to the main challenge.”
He and most of the other half-dozen experts said the world’s richer powers must address “underlying causes” — lessen the appeal of radicalism by improving economies, political rights and education in Arab and Muslim countries. (*)

========
Nýjasta leiðin til að myrða Íraka: Kæfa þá í gámi. Lærdómurinn frá Mazar-e-Sharif í Afghanistan kemur að góðum notum.

Ég kom því loksins í verk í gærkvöldi að sjá Beautiful Mind og það er nú ansi hreint vel gerð mynd. Vel að þeirri viðurkenningu komin sem hún hefur hlotið. Ég held að þar hafi einkar vel tekist til með að lýsa einni eða tveim hliðum schizophreníu. Mikið óskaplega held ég að það sé erfitt að vera haldinn þeim óhugnanlega sjúkdómi.

Ísraelskur ráðherra, Haim Ramon, viðurkennir að múrinn í kring um Jerúsalem sé til að tryggja að gyðingar verði í meirihluta íbúanna. Múrinn innlimar fjölmennar landtökubyggðir og útilokar fjölmenn hverfi Palestínumanna sem teljast - og hafa alltaf talist - til Jerúsalem. Tilgangurinn er auðvitað að fyrirbyggja að Palestínumenn geti haldið sinni sögulegu höfuðborg, Jerúsalem, sem höfuðborg sinni sem Palestínuríki verður einhvern tímann eitthvað meira en hýpótesa.
~~~ ~~~ ~~~ ~~~
RÚV segir stuttlega frá nýrri stefnu Bush í geðheilbrigðismálum. Sjá nánar hér. Í stuttu máli: Strax í barnaskólum verður byrjað að skima eftir geðrænum vandamálum til að geta brugðist við þeim sem fyrst. Niðurstaðan er sú að lyfjafyrirtæki rok-græða og börn sem rekast illa í hjörð verða lyfjuð niður.

Fann fjársjóð á háaloftinu!

Þegar ég var lítill lék ég mér í Pleimó á háaloftinu. Einu sinni ákvað ég að stytta mér leið til velgengni í síðari leik, svo ég dró saman heilan haug af flottu dóti og faldi á vel völdum stað. Svo vel völdum að þegar til kom fann ég hann ekki aftur.

Svo liðu 15 ár.

Áðan var ég að taka til á háaloftinu (svosem ekki ítarlega) og fann aftur fjársjóðinn sem ég faldi hér um árið! Hann samanstóð af einum vörubíl með tengivagni, hvort tveggja fullt af gulli, vopnum og öðru dóti sem kemur sér vel í Pleimó. Á að giska 15 skammbyssur, 25 rifflar, nokkrir töff útlítandi karlar, nokkrar fjársjóðskistur fullar af gullpeningum, fágætir hlutir á borð við krítarpípu, fjaðurpenna, sjónauka, montprik, kórónu og ýmislegt annað.

Það er verst að ég hef ekki leikið mér í Pleimó í ansi mörg ár. Þessi fundur hefði verið hreinn hvalreki ef hann hefði verið 15 árum fyrr.

Æ, hann var nú hvalreki samt!

9/11, Madrid, London, Reichstag og fleira

Sannið þið til: Hinir háu herrar, sem Vesturlandabúar lúta, munu nýta sér hryðjuverkin í London til hins ítrasta. Þeir sem gerðu þetta gátu ekki annað en vitað hverjar afleiðingarnar yrðu: Aukið eftirlit með fólki, skert frelsi, skert mannréttindi, aukin leynd og svo framvegis. Cui bono? Ekki múslimar, svo mikið er víst. MI5 eða MI6? Kannski CIA? Eða Mossad? (Ísraelar vissu a.m.k. af þessu fyrirfram.) Ég veit það ekki, en eitt veit ég: Opinberum frásögnum af svona atburðum er ekki treystandi. Mogginn vitnar í einhverja sérfræðinga og er síðan svo smekklegur að birta mynd af saklausum múslimum á bæn með fréttinni. Ætli bryndis@mbl.is hafi valið myndina? Einkar smekklaust. Svo skil ég ekki hvað er verið að hringja í Salmann Tamimi, formann Félags múslima á Íslandi, þann góða mann, eins og hann tengist einhverjum hryðjuverkamönnum eitthvað? Hvers vegna? Hvers vegna? Vantaði fréttamennina bara viðmælanda, einhvern viðmælanda, einhvern sem hlustendur mundu tengja við hryðjuverkamenn? Prentuð útgáfa Morgunblaðsins birti síðan hræðilegar myndir og texta á mörgum, mörgum blaðsíðum. Hvers vegna fá fórnarlömb vestrænna heildsöluhryðjuverka í Írak ekki svona margar blaðsíður og stórar myndir? Eru fórnarlömb okkar minna virði en við?
Nei, þessi hryðjuverk voru ekki framin af neinum „múslimum með blint trúarhatur á heilanum“. Kjaftæði. Þau voru framin til að halda okkur á tánum, óöruggum um eigið skinn, til þess að stjórnvöld geti haft skálkaskjól til að skerða mannréttindi enn frekar. Skerða réttaröryggi, auka eftirlit, herða á ofbeldi o.s.frv. Fjölmiðlar gleypa allt hrátt sem stjórnmálamenn og lögregla segja og áhorfendur virðast gleypa allt hrátt sem fjölmiðlar segja. Hvar er gagnrýnin?
Sprengjuárásirnar í London verður að skoða í samhengi við aðrar óupplýstar árásir, svo sem 11. september 2001 og Madríd 2004. Í báðum tilfellum var vægast sagt margt athugavert við atburðina sjálfa og rannsóknina á þeim. Ég nenni ekki að fara nánar út í það að sinni, læt það nægja að segja að opinbera sagan um 11. september er innistæðulaust bull, ryk sem er slegið í augu okkar.
Hryðjuverkamennirnir sem eiga í hlut eru ekki skuggalegir tuskuhausar sem fela sig undir rúmunum okkar - heldur íklæddir jakkafötum og vinna á virðulegum skrifstofum. Ég trúi ekki á „al Qaeda“ en ég veit að CIA, Mossad og fleiri leyniþjónustur hafa framið óteljandi hryðjuverk í gegn um tíðina og eru hvergi nærri hættar því. Hvergi nærri. Þessar stofnanir og fleiri eru samviskuskert valdatæki siðblindra heimsvaldasinna, sinister útlaga-element í annars gölluðu stjórnkerfi Vesturlanda. Þær eru færar um óhæfuverk, þær hafa langa sakaskrá af þeim, og umbjóðendur þeirra hafa til mikils að vinna.
Ég spyr því aftur: Cui bono?
Sir Ian Blair, lögreglustjóri London, segir „að einn maður hafi ekki verið að verki“ - ég sé hvers vegna þessi snillingur hefur fengið nafnbót. Hann er sennilega klárari en flestir starfsbræður hans. Ekki einn maður að verki? Þvílíkur snillingur. Fjórar sprengjur á fjórum stöðum sem springa á næstum því sama tíma, það hefði ekki annað hvarflað að mér að sami náunginn hefði komið þeim öllum fyrir!
Þessi glæpamaður hlýtur síðan titilinn hræsnari vikunnar. Hann

„sagði það sorglegt að hryðjuverkamenn skuli gera árás sama dag og ráðamenn væru að vinna að lausn fátækra í Afríku. Að lokum lofaði Blair því að hryðjuverkamönnum myndi aldrei takast að brjóta vesturlönd á bak aftur.“

Vá, þessi karl hefur lært sitt fag: Ég veit ekki hvort ég gæti snúið eins kyrfilega út úr sannleikanum í einni setningu. Þessari meintu hjálp við Afríku hefur George Monbiot gert skil í frábærri grein, og þessum bavíönum um leið. Ráðamenn G-8 ríkjanna

„segja árásirnar ekki bara árás á Bretland heldur á allan hinn siðmenntaða heim. Slíkar árásir verða ekki liðnar. Í yfirlýsingu frá leiðtogunum segir enn fremur að iðnveldin standi þétt saman í málinu og muni gera allt sem í þeirra valdi stendur til að berjast gegn hryðjuverkum. Hryðjuverkamenn muni aldrei geta sigrað.“

Það er í gangi keppni um hver geti klæmst á þjáningum fórnarlambanna með mest krassandi hætti - „þetta er ekki árás á Breta heldur á sakleysið“ - „árás á fegurð og húmanísk gildi“ - „sorglegir menn sem meta dauðann meira en lífið“ - þetta er hvert öðru heimskulegra og íslenskir ráðherrar hafa ekki látið sitt eftir liggja. Meðan grey leiðtogarnir miklu voru í sakleysi sínu að vinna að því að bjarga heiminum komu hin samviskulausu illmenni og voru vondir.
Þessi „óþekktu al-Qaida samtök“ sem segjast vera ábyrg þori ég að veðja að eru ekki einu sinni til í alvörunni, nema sem frontur fyrir áðurnefnd sinister element í stjórnkerfinu hjá okkur sjálfum - frontur eins og þetta svokallaða „al Qaida“ er í heild sinni.
Í stuttu máli, þegar ég fylgist með fréttum af þessum hörmulega atburði finnst mér eins og ég sé að lesa ævintýri. Fréttaflutningurinn er einfaldlega fjarstæðukenndur. Að fylgjast með þessu, og sjá í gegn um kjaftæðið, er eins og að fylgjast með lygasögu. Og það sem er þyngra en tárum taki, er að ég óttast að flestir gleypi þessa lygasögu hráa. Með öðrum orðum: Hún virkar. Svo lengi sem svona lygi virkar mun hún verða endurtekin. Var það ekki Göring, sem sagði að „auðvitað vildi fólkið ekki stríð. Það yrði að plata það í stríð. Leiðin til þess væri einföld: Láta fólkið bara halda að það væri í hættu, og þá yrði það ólmt að fylgja leiðtogunum hvert sem væri.“ Í því samhengi má minnast þinghússbrunans í Berlín. Atburðirnir 11. september, sprengingar í Madríd og London - þessir atburðir eru sambærilegir við þinghússbrunann í Berlín.
Við getum á næstu misserum og árum horft upp á mannréttindi okkar skerðast. Það verða „okkar eigin“ ríkisstjórnin sem sjá um það og bera ábyrgð á því.
~~~ ~~~ ~~~ ~~~
Grunsamlegur farþegi? WTF?
~~~ ~~~ ~~~ ~~~
Heiðursmennirnir í NATO grípur til taktískrar gíslatöku.
~~~ ~~~ ~~~ ~~~
Mótmælendur á Kárahnjúkum með beinar aðgerðir. Ekki stórar í sniðum, en skemmtilegar og meinlausar.

Hryðjuverkaárásirnar í London í gær voru hrikalegar og hræðilegar og, eins og við mátti búast, ætla stjórnmálamenn að hagnýta sér þær sjálfum sér til hagsbóta og umbjóðendum sínum. Tal um að eitthvað "al Qaeda" hafi gert þetta gef ég lítið fyrir. MI5 og MI& eiga sögu um sín eigin hryðjuverk og ekki verður betur séð en þetta atvik spili beint upp í hendurnar á þeim.

Í gær (miðvikudag) keyrði ég austur í Skálholt, þaðan til Selfoss, aftur í Skálholt, aftur á Selfoss og svo heim. Í dag (fimmtudag) keyrði ég aftur í Skálholt, síðan á Sólheima í Grímsnesi (þar sem ég hitti þennan gaur) og svo austur á Þingvelli, frá hinum eiginlegu Þingvöllum suður fyrir Skálabrekku, svo til baka og Gjábakkaheiði og Laugardal inn í Skálholt aftur og svo Þrengslaleið til Reykjavíkur.
Ég er með svo miklar harðsperrur í lærunum og sitjandanum að það er eins og ég hafi farið ríðandi austur í Skálholt og heim...
Ég hafði gleymt því hvað Skálholt er svakalega glæsilegur staður. Bæjarstæðið er meiriháttar, útsýnið, náttúran, tignin yfir þessu bæjarstæði... Húsakjarninn í kring um kirkjuna er líka smekklegur. Annað sem er glæsilegt eru Sólheimar í Grímsnesi. Þegar ég ók niður heimreiðina leið mér eins og ég væri að koma inn í annan heim... gróðurvin, undurfagran skóg... það vantaði bara blómálfana, hehehe...
Í dag rættist enn fremur draumur sem ég hef átt mér frá bernsku: Ég er eigandi að heilli beinagrind af dauðri rollu. Ær ein skreið í vetur undir barð eitt, og bar þar beinin – sömu bein og ég bar áðan heim til mín. Þegar beinin veðrast betur er þarna komið stofustáss.

Hvað ætli Sighvatur Björgvinsson eigi við þegar hann segir "segir um þriðjung Afríkuríkja eiga skilið að fá aukna þróunaraðstoð og setja þurfi henni skilyrði." Við hvaða mælikvarða er stuðst við að meta hvaða ríki "eiga skilið" að vera leyst úr skuldafjötrum og hver ekki? Hvaða lönd skyldu lenda í fyrri flokknum og hver í þeim síðari? Það væri athyglisvert að fá nánari skýringar á þessu!
~~~ ~~~ ~~~ ~~~
Enn skrifar meistari Avnery um Sharon og landtökumennina á Gaza. Ég ætla ekki að fara að endursegja greinina hans, en mæli þess frekar með því að hún sé lesin. (Hún er ekki svo löng.)
~~~ ~~~ ~~~ ~~~
Kaliforníska þjóðvarðliðið infiltrerar fámenn mótmæli friðarsinna. Á aðeins 35 manna mótmælum (já, þau geta verið fámenn víðar en á Íslandi...) er talið að a.m.k. 2 óeinkennisklæddir þjóðvarðliðar hafi verið á meðal. Þetta minnir mig helst á ein mótmælin við Stjórnarráðið nú í vor. Þangað mættu 6 manns, úr SHA og MFÍK -- og til að hafa nú örugglega hemil á þessu óða fólki hafði lögreglan viðbúnað upp á heila sex bíla! Ég var fjarri herlegheitunum í þetta sinn, en þegar mér var sagt frá þessu datt mér helst í hug að ef maður vildi starta glæpaöldu væri best að byrja á að fá svona 30 manns til að mótmæla í einu - jafnvel á fleiri en einum stað - og þá yrði lögreglulið bæjarins bundið þar og bandíttarnir gætu athafnað sig óáreittir.
~~~ ~~~ ~~~ ~~~
Æðsta sendifulltrúa Egypta rænt af vopnuðum mönnum í Baghdad.
~~~ ~~~ ~~~ ~~~
Þrátt fyrir fögur fyrirheit virðast nepalskir maóistar hvergi nærri hættir að myrða óbreytta borgara. Er Prachanda formaður ekki maður orða sinna? Hefur hann ekki stjórn á mönnum sínum? Eða eru önnur öfl að sverta maóistana? (Í hreinskilni sagt, þykir mér síðasta skýringin ósennileg.)

Uri Avnery er einn af mínum eftirlætis greinahöfundum. Nýjasta grein hans, The Day After, er frábær. Hann gerir hreyfingu ísraelskra landtökumanna, ísraelskum stjórnmálum og samskiptum Ísraela og Palestínumanna góð skil - eins og hans er von og vísa.
~~~ *** ~~~ *** ~~~
Íraska andspyrnuhreyfingin Rafidan svarar lygum Rumsfelds fullum hálsi.
~~~ *** ~~~ *** ~~~
Úzbezka blaðakonan Galima Bukharbaeva ber vitni um fjöldamorðin í Andijan í Úzbekistan í maí sl. og biðlar til Bandaríkjastjórnar að fordæma bandamann sinn og svarabróður, ógeðið Islam Karimov, forseta landsins. Ég dreg það stórlega í efa að Bandaríkjastjórn verði við þeirri bón. Ríkisstjórn Úzbekistan gegnir nefnilega mikilvægu hlutverki í alþjóðlegu pyntinganeti Bandaríkjastjórnar. Hrottaskapnum í fangelsunum þar verður ekki með orðum lýst, verktakavinna í óþverraskap. Því fyrr sem Úzbekar mölbrjóta þá glæpaklíku sem kallar sig ríkisstjórn þeirra, þess betra.
~~~ *** ~~~ *** ~~~
Í bloggi í dag bendir Ágúst Borgþór á grein í „Vef-Þjóðviljanum“, sem ber engan titil en er dagsett 30. júní. Alla jafna þykir mér lítið koma til greina þar sem höfundar er ekki getið, en í þetta skipti fýsir mig samt að tjá mig aðeins. Ágúst segir að þetta sé „drepfyndinn pistill um pólitískan rétttrúnað Morgunblaðsins“ og ég get ekki neitað því að hann er lipurlega skrifaður. Umfjöllunarefnið er Morgunblaðið og skoðanir þess á beinu lýðræði. Hinn nafnlausi höfundur segir að Morgunblaðið sé fundvíst á fátækt. Skrítið, en ég hef ekki tekið mikið eftir því. Hins vegar hefur mér stundum fundist „Vef-Þjóðviljinn“ naskur á að yfirsjást fátækt. Fyrir utan að blöð eru sjaldan fundvís á nokkurn skapaðan hlut, vegna þess að þau eru dauðir hlutir. Um ritstjóra eða blaðamenn gegnir öðru máli; þeir geta verið hinir fundvísustu ef því er að skipta.
Nafnlausi höfundurinn álítur að beint lýðræði feli í sér að fólk greiði „atkvæði um málefni annarra“ en virðist ekki hugsa til þess að fólk geti verið að kjósa um sameiginleg mál sjálfra sín og annarra. Hinn ónafngreindi höfundur sýnir reyndar aðdáunarverða hreinskilni þegar hann skýrir frá því að vefsíðan hans (sem hann kallar „blað“) sé eiginlega á móti lýðræði, eða vilji a.m.k. setja því miklar skorður. Þess í stað vilji „blaðið“ (hvernig getur blað viljað eitthvað?) meira frelsi einstaklinga - sem höfundur tekur þægilega úr samhengi við það að við erum ekki bara einstaklingar, heldur einnig samfélag. Hvað er frelsi án ábyrgðar? Hvað er frelsi án jöfnuðar? Mikhail Bakínín hafði lög að mæla þegar hann mælti hein fleygu orð: „Frelsi án félagshyggju er forréttindi og óréttlæti; félagshyggja án frelsis er þrældómur og fautaskapur.“
Hinn ónafngreindi höfundur (já, það fer í taugarnar á mér þegar greinar eru ekki auðkenndar höfundi!) bendir réttilega á að ef beint lýðræði væri meira en við byggjum við sama fjölmiðlaumhverfi og við gerum nú, þá yrði völd ritstjóra og álitsgjafa mun meiri en þau eru. Hann tekur það svosem ekki fram, en á auðvaldsfjölmiðli er lýðræðið sjaldan nokkuð - hver kaus ritstjórn Morgunblaðsins eða fréttastjóra Stöðvar tvö? Höfundurinn bætir því svo við að almenningur vilji ekki setja sig eins vel inn í málefni líðandi stundar vegna þess að hann hafi öðrum hnöppum að hneppa. Það þykir mér aum staðhæfing. Fyrir utan að fólk er ekkert of gott til að setja sig inn í mál sem varða það sjálft, þá efast ég um að nokkur verði neyddur til að taka þátt í beinu lýðræði ef hann kærir sig ekki um það!

Bækur tvær

Sú bók sem er næst í röðinni hjá mér að lesa er Um anarkisma sem Siggi pönk var að gefa út. Keypti hana á útgáfutónleikunum á laugardaginn, og ný saman lófum af eftirvæntingu að lesa hana. En hún verður þó að bíða aðeins, því ég er að lesa aðra - sem ég er reyndar með í láni hjá Sigga ... hún heitir Fragments of an Anarchist Anthropology og er eftir David nokkurn Graeber. Ég er að verða búinn með hana (hún er stutt) og hef lesið nóg til að hafa efni á að segja þetta: Fragments of an Anarchist Anthropology er virkilega góð bók, fræðandi, vekjandi til umhugsunar, skorandi á hólm, færir ferskan andblæ í pólitíska hugsun manns og fær mann til að endurskoða ýmislegt sem manni datt áður ekki í hug að endurskoða. Semsagt, súperbók. Hún fæst á Amazon. Hæli henni í hástert.

Óskemmtileg lífsreynsla

Ég var að koma heim til mín af næturvakt, og þar sem ég gekk upp heimreiðina heima hjá mér sá ég svartan, ókunnugan kött sem virtist eiga eitthvað vantalað við minn kött, sem var nær húsinu. Minn köttur var með eitthvað í hvoftinum, sem ég var fljótur að sjá að var þröstur. Ég kom nær, kötturinn bjó sig undir að koma með mér inn til að gera að bráðinni, en þá fór þrösturinn að hreyfa sig og tísta. Kötturinn stóðst það auðvitað ekki og hélt áfram að leika sér með hann. Mér bauð við óförunum, bandaði kettinum í burtu - og stytti þjáningar þrastarins með skóflu. Þrjú högg og hann var steindauður.
Ég hafði aldrei áður drepið fugl með eigin hendi, né reyndar nokkuð dýr með heitt blóð. Ég get ekki sagt að tilfinningin hafi verið ánægjuleg. Mér líður hálf illa. Jæja, hvað gat maður svosem gert? Annað hvort að láta köttinn pína grey dýrið til dauða eða láta þetta taka fljótt af.

Át kjúkling

Í fyrrakvöld var kjúklingur í matinn heima hjá mér. Það væri ekki í frásögur færandi nema vegna þess að það eru komin næstum 2 ár síðan ég hætti að borða kjúkling. Ástæðan er verksmiðjubúskapur og ill meðferð á dýrum - og af sömu ástæðu er ég hættur að borða svínakjöt líka. En í fyrrakvöld át ég kjúkling.
Skýring: Móðir mín kom í búð sem selur ýmiss konar lífrænt ræktuð matvæli, spurðist fyrir um lífrænt ræktaðan kjúkling, sem var til í frysti. Það kom á daginn að í Mosfellssveit einhvers staðar er bú, þar sem kjúklingar fá að spássera um og róta í haugum, eins og þeim er eðlilegt að gera, þangað til þeim er slátrað. Þennan kjúkling át ég með góðri samvisku - og bestu lyst!

Bandaríski fulltrúadeildarþingmaðurinn Charles Rangel var í viðtali hjá hægrinöttaranum Sean Hannity og sagði frá því að Bush og félagar hefðu ákveðið að ráðast inn í Írak löngu áður en Bush varð forseti. Þessari fullyrðingu, sem er vel rökstudd og meira að segja skjalfest af hálfu Bush og félaga sjálfra, vísaði nöttarinn Hannity á bug sem "samsæriskenningu"!
Lesið orðaskipti þeirra hérna.

Nokkuð um Írak og Palestínu

Donald Rumsfeld laug því nýlega, að viðræður stæðu yfir við írösku andspyrnuna. Mike Whitney gerir grein fyrir þessu í ágætri grein. (Hvernig er annars hægt að eiga skipulegar viðræður við andspyrnuhreyfingu sem er ekki miðstýrð og hefur enga talsmenn eða heildarskipulag? Það væri í mesta lagi hægt að ræða við einstaka leiðtoga eða einstakar hreyfingar, en íraska andspyrnan samanstendur af tugum aðskildra hópa!) Rumsfeld sagði að viðræður stæðu yfir, George Casey, hershöfðingi í Írak, neitaði því, og það hafa ýmsir leiðtogar andspyrnunnar einnig gert. Rumsfeld laug. Ekki í fyrsta sinn. Gefum Whitney orðið:

The real purpose was simply to deceive the American public once again, to elicit greater support for a botched war that has degenerated into a quagmire.
By now, every American who is capable of reading a newspaper or watching a TV should know that Rumsfeld is a compulsive liar, a serial liar, a pathological liar.
... Rumsfeld plans to create the "creative chaos" which he feels will best serve the overall objectives of the occupation.

~~~ ~~~ ~~~ ~~~
Önnur athuglisverð grein um Írak er "Iraq: A Bloody Mess" eftir Patrick Cockburn. Tölurnar í endann á henni segja ýmislegt. Hér getur að líta örstutta "flash presentation" sem kortleggur mannskæðar árásir á hernámsliðið fram til 20. júní.
~~~ ~~~ ~~~ ~~~
Fyrrverandi hermenn í Ísraelsher ljóstra upp um kerfisbundna valdníðslu hersins gegn Palestínumönnum, notkun á palestínskum borgurum sem lifandi skjöldum, siðferðislega hnignun í hernum, allt upp í efstu raðir hans, skeytingarleysi um örlög Palestínumanna og hræsnina í talsmönnum hersins, sem segja hann vera til fyrirmyndar fyrir aðra heri. (Nema hvað, talsmenn hersins eru auðvitað á mála hjá honum!) Þessar upplýsingar eru auðvitað fjarri því að vera nýjar (ég get sjálfur vitnað um ýmislegt óhreint í pokahorni Ísraelshers) en það er eftirtektarvert að það skuli vera ísraelskir hermenn sem rjúfa þögnina. Hópur þeirra kallar sig einmitt Breaking the Silence. Sjá nánar í þessari grein.
~~~ ~~~ ~~~ ~~~
Palestínsk-bandaríski háskólaprófessorinn Sami al-Arian er ásamt fleirum fyrir rétti, sakaður um stuðning við Islamic Jihad í Palestínu. Ég hef efasemdir um sekt hans; held að þetta sé hluti að aðförinni sem hefur verið í gangi gegn aröbum í Bandaríkjunum. En allavega: FBI njósnaði um al-Arian í níu ár áður en hann var tekinn fastur. Hleruðu síma og tölvupóst og komu fyrir hljóðnemum á skrifstofunni hans. Sjá nánar í þessari grein.

Bókin sem Siggi pönk var að gefa út, Um anarkisma, virðist þegar vera farin að hafa áhrif.
Svo ég segi minn túskilding á anarkisma, frjálslyndum sósíalisma og hinni langvarandi rökræðu um ríki/ekki ríki, þá veit ég um ýmsa sem kalla sig ýmist anarkista eða frjálslynda sósíalista og gera annað hvort ekki greinarmun á, eða álíta þetta tvennt skarast í stóru sniðmengi. Ég álít sjálfur að þetta skarist. Frjálslyndur sósíalismi er í mínum huga frjálslyndur á sama hátt og anarkismi er það, semsagt afgerandi frjálslyndur.
Markmið anarkista er hið sama og markmið (annarra) kommúnista, sem er að koma á samfélagi sem er laust við stéttaskiptingu og ríkisvald. Það hefur lengi verið djúpstæður ágreiningur um það, hvernig þeirri breytingu verði komið í kring og hafa anarkistar löngum viljað afnema ríkisvaldið, en kommúnistar að öreigastéttin yfirtæki það og mótaði í sinni mynd.
Ég, fyrir mitt leyti, sé nákvæmlega enga haldbæra ástæðu fyrir því að þetta tvennt þurfi að stangast hvort á við annað. Frá því þverhausarnir Marx og Bakúnín gátu ekki komið sér saman í 1. alþjóðasambandinu á 19. öld hefur sárlega skort samræðu milli anarkista og (annarra) kommúnista, einkum marxista. Hvorir tveggja hafa tapað á því að hafa ekki gagn og aðhald hverjir af öðrum. Marxistum hefur hætt til of mikils stjórnlyndis og ofskipulags, en anarkistum til of lítils skipulags og stefnu og lausrar í reipunum, og svo hefur báðum hætt til sundurlyndis og slíks, bæði innbyrðis og út á við. Ég, fyrir mitt leyti, sé það sem stóran og mikilvægan áfanga í hinni miklu baráttu, eða byltingu, ef þú vilt kalla það það, að anarkistar, sósíalistar, kommúnistar, marxistar, eða hvað sem menn kalla sig, geti stillt saman strengi sína og komið sér saman um (a) markmið og (b) leiðir. Það vildi ég sjá, takk fyrir. Og þú átt að vera með í að lyfta þessu grettistaki, takk fyrir.

Var að bæta hér til hliðar linkum á Landsvirkjun, Kárahnjúkavirkjun og eitthvað. Hvers vegna? Know thy enemy.
Hér getur að líta athyglisverðan leiðara á Kantipur Online, þar sem fjallað er um stjórnmálin í Nepal þessa dagana. Áhugavert það sem sagt er þar um dr. Bhattarai.
Ég held að ég hafi í gær gerst áskrifandi að Lögbirtingarblaðinu og látið, þar með, gamlan draum rætast.
~~~ ~~~ ~~~ ~~~
Á tónleikunum í gærkvöldi opnaði ég jómfrúrbás með Kommadistrói Íslands (á þessu nafni er sá fyrirvari að mér gæti dottið eitthvað betra í hug...) með bókum, barmmerkjum og smávegis fleiru. Á sömu tónleikum keypti ég mér bókina Anarkisma sem út er gefin af Sigurði pönk. Hlakka til að lesa hana.

Úr fréttum

„Samningur við Mexíkó um vernd fjárfestinga“ ... þýðir það að við höfum tryggt okkur sæti við enn einn kjötketilinn sem gengur fyrir þrælavinnu? „Olíuverð yfir 60 dollara“ ... og fer hækkandi. Þeir sem kannast við stærsta vandamál okkar kynslóðar skilja hvaðan á sig stendur veðrið. „Rumsfeld býst við áframhaldandi ofbeldi næstu árin í Írak.“ ... ég hefði getað sagt honum það. Bandaríkjamenn eiga eftir að halda áfram að níðast á þessari þjóð þangað til henni tekst að reka þá af höndum sér. Ég sé ekki fyrir mér að þeir muni fara með góðu, né að þeir muni samþykkja neins konar stjórn þar nema hún sé undirgefin þeim. Þessu stríði -- þessum glæp gegn mannkyni -- verður að linna. Ránsstyrjöld í okkar nafni. Heildsöluhryðjuverk.

Þetta eru alvarlegar fréttir. Ég næ ekki alveg umfangi þess sem virðist vera að dynja á okkur á næstu árum. (1) Húsnæðisbólan springur - það verður svakalegt, en gæti fölnað við hliðina á því þegar (2) greiðsluhalli Bandaríkjanna sligar efnahagskerfið (b), sem aftur verður eins og Vatnaskógur samanborið við (3) Olíutindinn. Þá eru heilbrigðismál, umhverfismál, óhjákvæmilegar uppskiptastyrjaldir kreppuauðvalds, vaxandi trúarofstæki og aukin vígvæðin ekki einu sinni talið með.
Það verður athyglisvert að fylgjast með næstu árin.

Kárahnjúkabúðir og fjölmiðlar

Uppsetning tjaldbúða við Kárahnjúka er hafin. Fréttir herma að sjö manns séu þar núna, en búast við má töluverðri fjölgun á næstu dögum. Athyglisvert er að bera saman fréttir mismunandi fjölmiðla af búðunum. RÚV segir: „Fyrstu tjöldin í fyrirhuguðum tjaldbúðum mótmælenda við Kárahnjúkavirkjun voru reist í dag. Tjaldbúar segja að búðirnar verði líflegar og skemmtilegar og vel sé hægt að mótmæla án þess að sýna ofbeldi. Lögreglan hefur vaktað svæðið við Kárahnjúka í dag.“ Þetta sé ég ekki betur en að sé sanngjörn frétt. Mogginn hefur verið undarlega þögull um þetta mál. Um Vísi undanfarna daga er hins vegar annað að segja. Þar segir meðal annars (allar leturbreytingar eru mínar):

„Engin tjöld enn á Kárahnjúkum“
Enn virðast engin tjöld mótmælenda farin að rísa á Kárahnjúkasvæðinu. ... Hitinn er í kringum fimm stig svo það er vonandi að mótmælendurnir séu vel búnir fyrir útileguna.

Sjá fleiri en ég hótfyndnina skína út á milli glottandi tanna fréttamannsins? Ég giska á (veit ekki fyrir víst, en giska á) að blessað fólkið hafi nú hlustað á veðurfréttirnar áður en það lagði af stað. Eða, segir það sig ekki sjálft? Eða segir það sig kannski ekki sjálft, að það sé vel búið ef það ætlar að dvelja þarna vikum saman? Höldum áfram:

„Ekkert sést til mótmælenda“
Ekkert hefur sést til mótmælenda á Kárahnjúkum en þeir hugðust setja upp tjaldbúðir þar í gær á lengsta degi ársins. Lögregla hefur verið á svæðinu í dag en þar hefur verið kalt og var hiti aðeins tvær gráður í morgun. Frá skipuleggjendum tjaldbúðanna bárust þær fregnir í dag að tafir hefðu orðið en stefnt væri að því að koma á svæðið í kvöld.

Þetta gat verið verra, en ég þykist enn sjá í gegn um fyrirsögnina að mótmælendurnir séu lúserar og að þetta sjó ósvinna hjá þeim (og eigi örugglega eftir að misheppnast). Höldum enn áfram:

„Eitt tjald risið við Kárahnjúka“
Aðeins eitt tjald virðist risið við Kárahnjúka þar sem mótælendur sögðust ætla að reisa tjaldbúðir.
...
Kalt hefur verið á Kárahnjúkum undanfarna daga og hitinn þar var aðeins um tvær gráður í nótt og því hefur væntanlega verið kalt í tjaldinu sem búið er að reisa.
Á heimasíðunni Saving Iceland er hins vegar öllu meira gert úr aðgerðunum hingað til.

Heimasíðan Saving Iceland er gerð ótrúverðug með því að gefa í skyn - eða segja beint - að þar sé farið með staðlausa stafi og meira digurbarkatal en tilefni sé til. Eins og hver, sem skoðar síðuna, getur gengið úr skugga um, eru þetta ómakleg ummæli. Þar stendur skrifað, dagsett 23. júní:

„Fyrstu tjöldin hafa risið á bökkum Jöklu strax til vinstri þegar komið er yfir brúnna. Tólf manns eru komnir á staðinn. Veður er hlýtt og bjart.
Fyrstu 2-4 dagarnir fara í að koma búðunum upp og þeir sem vilja aðstoða við það eru ómetanlegur liðsauki, öllum sem vilja taka þátt er velkomið að koma.“

22. júní eru sjö komnir fyrir kvöldið og daginn eftir er fjöldinn kominn í tólf. Ég leyfi mér að efast um að veðrið sé mjög hlýtt, en það getur samt vel verið, sbr. Veðurstofu Íslands. En höldum áfram:

„Eitt tjald við Kárahnjúka“
Tveir einstaklingar í einu tjaldi mynda nú mótmælendabúðirnar sem andstæðingar Kárahnjúkavirkjunar eru að koma þar upp. Fimm til viðbótar bætast við fyrir nóttina.
Skipuleggjendur hugðust koma upp búðunum fyrir sumarsólstöður í fyrradag en í dag var þar aðeins eitt lítið tjald, við Sauðá, um þrjá kílómetra frá Kárahnjúkastíflu. Ekkert sást til mannaferða við tjaldið en fréttaritari Stöðvar 2 fékk þær upplýsingar að þar inni væru tveir einstaklingar sofandi, karl og kona, enda hefðu þau komið á svæðið seint um nótt og tjaldað í morgun.

Næst er því lýst hvað fólkinu á Kárahnjúkum sé annt um öryggi mótmælendanna, og m.a. vitnað í Yrsu Sigurðardóttur. Hún er sjálfsagt góð manneskja og ekki efast ég um að henni sjálfri sé umhugað um öryggi þeirra. En yfirmenn hennar? Það er nú það. Þeir virðast ekki (eða a.m.k. ekki ennþá) hafa áhyggjur af því að þessi mótmæli verði árangursrík. Kannski kenna þeir bara í brjósti um ungt fólk með hugsjónaeldinn logandi. Kannski að þeir komi meira að segja með smákökur og sitthvort mjólkurglasið handa meinleysingjunum tveim? Hver veit.
Svo lengi sem þessi mótmæli eru meinlaus býst ég við að þau fái að vera í friði. Á meðan má líka búast við að góðlátleg hótfyndni fréttamanna beinist að þeim öðru hvoru. Um leið og þau fara að hafa tilætluð áhrif má hins vegar búast við öðru hljóði í strokkinn. Þá má sjá fyrir sér að lögregla verði kölluð til og að athyglin beinist að því sem er „sensational“ við mótmælin - ef einhver streitist á móti eða eitthvað þvíumlíkt. Ég skal hins vegar éta hattinn minn ef eftirfarandi (feitletruð) fullyrðing reynist röng: Í sumar munu fjölmiðlar ekki veita stóru fréttinni mikla athygli, sem er að gerast á Kárahnjúkum, en það eru stærstu umhverfisspjöll Íslandssögunnar, og sá boðskapur -- sú frétt sem mótmælendurnir vilja vitaskuld að athyglin beinist að -- verður hornreka við hlið æsifrétta af óstýrilátum ungmennum og stjórnleysingjum. PR-áróður Landsvirkjunar verður áfram áberandi í fréttum en hlið umhverfisverndarsinna verður að miklu leyti þögguð niður í fréttum hér eftir sem hingað til. Því verður haldið stíft að Íslendingum, að Kárahnjúkavirkjun sé æðisleg og mótmælendurnir örsmár hópur sérviturs, eða öfgafulls, en meinlauss og svolítið hlægilegs hugsjónafólks sem sé á mótþróaskeiði eins og stórir unglingar.
Sannið þið bara til.

Hefur hann rétt fyrir sér?

Formaður BSRB gagnrýnir Ríkisendurskoðun harðlega
Ögmundur Jónasson ... ábendingar Ríkisendurskoðunar um að breyta þurfi lögum um réttindi og skyldur svo frysta megi launagreiðslur starfsmanna þeirra stofnana sem fari fram úr fjárlagaheimildum vera forkastanlegar. ... "Ég vísa þessum köldu kveðjum algerlega á bug og að sjálfsögðu mun svona ofbeldi aldrei verða þolað."

Ég er hjartanlega sammála því að þessi uppástunga sé forkastanleg og að Ríkisendurskoðun ætti að skammast sín. Ekki vantar það nú. En að svona ofbeldi muni aldrei verða þolað? Ég vona að satt sé, og ég vona að BSRB standi við það ... en um leið játa ég að ég efast um að sú mótspyrna færi lengra en fyrir dómstóla. Segjum að dómstóll úrskurði ríkinu í hag. Munu BSRB eða önnur samtök launþega blása til verkfalls ríkisstarfsmanna til að knýja það fram, að lögin verði tekin til baka?
Þau ættu að gera það -- en hvort þau mundu eða munu gera það -- það er önnur saga.
Það þarf víst engan sérfræðing til að sjá svartsýni mína á þetta...

Í dag tók ég í notkun nýtt bindi af vasabókinni minni. Ég sé fram á að þurfa að horfa á ~50 kvikmyndir og kaupa ~ 50 bækur áður en ég tek næstu í notkun, það er orðið svo tímafrekt að færa á milli bóka listann yfir bækur sem mig vantar og myndir sem ég þarf að sjá. Ég hef ekki hugmynd um númer hvað nýjasta bókin er, en grunar að númerið sé einhvers staðar milli 30 og 40. Það er óþolandi að vera með skert minni og áráttu fyrir því að vilja muna hugrenningar sínar, hvort tveggja í senn.
~~~ ~~~ ~~~ ~~~
Áðan hitti ég nokkra félaga mína og við litum inn á Ölstofu Kormáks og Skjaldar og við duttum sko aldeilis í lukkupottinn: Ókeypis bjór og skot! Ég drakk tvo bjóra af tegund sem ég man ekki hvað heitir og bragðaðist frekar illa. Þá drakk ég eitt skot af annað hvort "Ópal" eða "Tópas" -- alla vega bragðaðist það alveg eins og rauður ópal -- og er sannkallaður viðbjóður. Ópal á maður að sjúga, ekki staupa. Og hann á að vera blár, ekki rauður.
~~~ ~~~ ~~~ ~~~
Vegna þess að Arngrímur kaupir ekki alveg brandarann í þarsíðasta bloggi, þá er best að ég láti fylgja nokkra í viðbót, í svipuðum dúr, til skýringar. Þessa birtingu tileinka ég Arngrími:

Það var maður sem dó og fór til himna og þar sem hann stóð við Gullna hliðið þá .. bíðið við, æ, gleymið þessu, hann lá bara ofan í jörðinni og rotnaði.

Hvítur maður á Cadillac ók framhjá svertingja sem leiddi hjólið sitt meðfram þjóðveginum. Hann stoppaði til að bjóða svertingjanum far. Hann sagði: „Hjólið þitt kemst því miður ekki í skottið, en ef þú vilt getum við bundið það aftan í bílinn og ég get þannig dregið þig. Ef ég fer of hratt, þá æpirðu bara.“
Svertinginn svaraði: „Nei takk, það hljómar of hættulegt fyrir minn smekk,“ og hélt áfram að leiða hjólið sitt meðfram þjóðveginum.

Önd kom vaggandi inn í Bónus og spurði afgreiðslumann: „Eigið þið varasalva?“ Afgreiðslumaðurinn var innflytjandi, talaði ekki íslensku og skildi öndina því ekki. Hins vegar áttaði hann sig vel á því hvað það var óeðlilegt að öndin kynni að tala, hélt að guð væri að refsa sér, og brast í grát. Öndin gekk undrandi út, spyrjandi sjálfa sig hvað hún hefði ætlað að gera við varasalvar hvort sem er, vegna þess að endur eru ekki með neinar varir.

Hafnfirðingur kom til læknis til að fara í ófrjósemisaðgerð. Hann var klæddur í svört jakkaföt. Læknirinn spurði hvers vegna hann væri klæddur í svört jakkaföt, og Hafnfirðingurinn svaraði: „Ég var að koma úr jarðarför.“

Ég er vel upp alinn ungur maður, stunda ekki ritstuld, og tek því fram að þessa brandara, og fleiri í svipuðum dúr, fann ég hér (en þýðingin og staðfæringin er mín).

Nærri Kárahnjúkum er verið að setja upp títtumræddar tjaldbúðir og lögreglan er með viðbúnað eins og al Qaeda séu að setja upp þjálfunarbúðir hryðjuverkamanna. Sjálfsmorðs-skyrslettuárásir eru helsta ógnin á Austfjörðum í dag. Umhverfisbullur, friðarkommar og reykingamenn. Ofdekruð góðborgarabörn frá Reykjavík og óstýrilátir vandræðadelar sem hafa ekkert betra að gera í lífinu en að mótmæla öllu því góða sem við eigum. Blablabla.
Eru ekki einhverjar framkvæmdir þarna í grenndinni?
~~~ ~~~ ~~~ ~~~
Herskáir maóistar ræna banka á Indlandi ... alveg er ég viss um að þetta voru naxalíta-skæruliðar.

Kárahnjúkar, Saúdi-Arabía, Zimbabwe, Venezuela og tvennt áhugavert á laugardaginn

~~~ ~~~ ~~~ ~~~
Á Gagnauga er skýrt frá vinnubrögðum á Sjónvarpinu sem eru ekki boðleg. Frétt um Paul Gill var látið fylgja myndefni af öðrum manni að fela andlit sitt - án þess að tekið væri fram að annar maður væri á ferðinni!
Víkingasveitin er víst í viðbragðsstöðu á Egilsstöðum ef umhverfisbullurnar og „atvinnumótmælendurnir“ illræmdu skyldu reyna einhvern uppsteyt, sjálfsmorðsárásir eða þaðan af verra.
~~~ ~~~ ~~~ ~~~
Sjá fleiri en ég eitthvað eftirtektarvert við þessa frétt?

Yfirvöld í Sádi-Arabíu gerðu í dag lítið úr ummælum Condoleezzu Rice, utanríkisráðherra Bandaríkjanna, en hún hvatti í gær til lýðræðisþróunar í landinu ...
Saud al-Faisal, utanríkisráðherra landsins, sagði íbúa landsins best til þess fallna að dæma um það hvers lags stjórnmálaþróun henti þeim best.

Þessi Saud al-Faisal - ég vil að það komi fram að hann er hundur og ætti að éta skít - hlýtur annað hvort að vera óborganlega heimskur (ólíklegt: þá væri hann vara ráðherra..eða hvað?) eða þá að hann heldur að við (allir hinir á jörðinni) séum það. Fyrst hann er aðalsmaður er reyndar ekkert skrítið við yfirgengilegan hroka í hans fari -- en athugum: Lýðræði á ekkert erindi til Saúdi-Arabíu. BNA ættu ekki að skipta sér af, það eru Saúdi-Arabar sjálfir sem eru best færir um að velja. Einmitt: Það er einmitt vandinn, þeir fá ekki að velja! Úff, ég spyr mig hvort svona heimska sé smitandi.
Það verður samt að viðurkennast að þessi asni og aumingi hefur rétt fyrir sér að einu leyti: Þegar öllu er á botninn hvolft kemur það einmitt í hlut Saúdi-Araba sjálfra að bylta þessu konungdæmis-skrifli og trampa fínu hallirnar þeirra út í úlfaldaskít. Þetta veit krúnan og lætur wahhabista-klerkana því eiga sig til þess að þeir geti veitt almennri óánægju í farveg af afturhaldssömustu sort, róttæka bókstafstrú.
~~~ ~~~ ~~~ ~~~
Í Zimbabwe gengur strengjabrúðum heimsvaldasinna, MDC, illa að sannfæra kjósendur á landsbyggðinni um ágæti sitt. Þeim gengur líka illa að sannfæra mig! Verst er að hinn stóri flokkurinn, ZANU-PF Mugabes forseta, er ekki af betra taginu heldur.
~~~ ~~~ ~~~ ~~~
Í Venezuela hefur verið afhjúpað plott um að ráða Chavez forseta af dögum. Mér segir svo hugur að slík aðgerð yrði í hæsta máta óvinsæl.
~~~ ~~~ ~~~ ~~~
Var að setja þessar tilkynninguar efst á bloggið: Kanadíski sjónvarpsmaðurinn Barrie Zwicker er væntanlegur til landsins. Hann er framleiðandi "The Great Conspiracy" sem hefur verið sýnd á vegum Gagnauga og heldur fyrirlestur um 11. september í sögulegu samhengi. Laugardaginn 25. júní í Norræna húsinu kl. 14:00, aðgangseyrir:800 kr (nánar). Talandi um Gagnauga, þá er heilmikil hreyfing á síðunni þessa dagana. Það er gott. Ég hvet fólk til að fylgjast með þessari síðu.
Einnig þessa: Út er komin bókin "Um Anarkisma"
Í þessari bók er reynt að útskýra hverju anarkistar trúa, hvað þeir vilja, hvernig pælingar þeirra kvíslast og hvað þeir gera.
Markmiðið með sjálfri útgáfunni er að reyna að víkka pólitískan sjóndeildarhring íslendinga.
Í tilefni ef útkomu bókarinnar "UM ANARKISMA" koma nokkrar hljómsveitir saman á tónleikum, INNVORTIS, FIGHTING SHIT o.fl., TÓNLISTARÞRÓUNARMIÐSTÖÐINNI (Hólmaslóð 2). 500 kr, 18.00-22.00, EKKERT ALDURSTAKMARK. Bókin verður auðvitað til sölu á staðnum, kostar 500 kr.

Myndband, brandari og misheyrn

Sú snilldarhljómsveit Biomechanical sendi nýverið frá sér nýtt tónlistarmyndband sem ég mæli eindregið með fyrir fólk sem fílar kröftugt og tæknilegt þungarokk. Gott fólk, Empires of the Worlds!
~~~ ~~~ ~~~ ~~~
Sp: Hver er munurinn á Michael Jackson og Jóhannesi Páli II páfa?
Sv: Jóhannes Páll páfi er dáinn.
~~~ ~~~ ~~~ ~~~
Ég var að tala við konu, og í tal barst maður sem við þekkjum, sem er ekki sem bestur í blöðruhálskirtlinum. Konan sagði: „Ég var að heyra að sólarljós væri svo gott fyrir blöðruhálskirtilinn. Það væri sennilega best að taka hann út,“ ssagði hún og mér svelgdist á kaffinu mínu. Hún hélt áfram: „...taka blessaðan manninn út í sólina.“

Nepölsku sjöflokkarnir taka yfirlýsingu Prachanda af varkárni og segjast bíða eftir að maóistar breyti í samræmi við hana. Tanka Dhakal, ráðherra samskiptamála og talsmaður ríkisstjórnar konungsins, sagði: "Við höfum heyrt af tilraunum sem flokkarnir hafa gert til að mynda bandalag viðhóp sem hefur verið lýstur hryðhuverkahópur. Bandalag milli hans og flokkanna yrði óheppilegt." Það er skiljanlegt að konungsmanninum finnist það óheppilegt, ef maóistar og þingræðisflokkar taka höndum saman. Það sem er samt óheppilegast er að Gyanendra kóngur skuli fara með völd sín eins og hann gerir, en bæði royalistar og maóistar sæta þungum ásökunum um mannréttindabrot. Mögulegt bandalag milli flokkanna gæti (ef til vill) verið slæm hugmynd frá sjónarhóli byltingarinnar, en sagt er að það hafi orðið rússnesku byltingunni þungur baggi, þegar bolsévíkar gerðu bandalag við ýmsa aðra misjafnlega afturhaldssama flokka.

Það, sem gæti orðið samvinna milli þingræðisflokkanna og maóista, hófst með því að kóngurinn boðaði til sveitarstjórnarkosninga sem þingræðisflokkarnir sögðust mundu sniðganga. Þeirri sniðgönguyfirlýsingu tók Prachanda formaður fagnandi með yfirlýsingu daginn eftir. Búist er við að bilið milli maóista og hinna flokkanna fari mjókkandi á næstunni. Prachanda sagði að þeir flokkar yrðu boðnir velkomnir í bandalag, sem tækju afstöðu gegn kerfinu (kerfi lénsveldis og kapítalisma) og gegn krúnunni, m.ö.o. sem gerðust byltingarsinnaðir. Nú er haft við orð að maóistarnir séu fúsir að semja um að konungur sitji áfram, ef hann verði táknrænn, og að konunglegi herinn verði ekki leystur upp heldur, heldur aðeins færður undir lýðræðislega stjórn. Það gæti orðið pólitískt erfitt fyrir sjöflokkana að tengjast maóistum, þar sem þeir síðarnefndu hafa myrt fjölda starfsmanna og aktívisita þeirra fyrrnefndu undanfarin ár.

Það er líka sagt að þetta gæti verið divide et impera af hálfu maóistanna. Þeir neituðu að eiga samningaviðræður við Deuba meðan hann var forsætisráðherra vegna þess að hann hafi ekki umboð til að koma til móts við kröfur þeirra. Frekar hafa þeir sagst vilja tala við konunginn sjálfan. Nú mætti halda að þeir væru að etja hinum flokkunum gegn kóngi - veikja andstæðinga sína með því að láta þá takast hvora á við aðra.

Um þessar mundir held ég að fari heldur rénandi það dauðafæri sem maóistar höfðu til að ganga milli bols og höfuðs á konungdæminu eftir valdarán konungsins 1. febrúar. Maóistarnir reyndust ófærir um að nýta sér það þá vegna síns eigin innbyrðis klofnings, milli formannsins Prachanda og næstráðandans Bhattarai. Bhattarai mun hafa krafist sterkara lýðræðis innanflokks og sakaði Prachanda um einræðistilburði. Prachanda sakaði þá Bhattarai um klofningshneigð, að örva klíkumyndun í flokknum og að vera agent fyrir indverska heimsvaldasinna, m.a. eftir að Bhattarai fór til Nýju-Delhi og hitti þar formann Kommúnistaflokks Indlands (marxista). Bhattarai brást við með því að segja að Prachanda væri agent konungshallarinnar. Prachanda hefur yfirhöndina, alla vega sem stendur, og ég er hræddur um að ásakanir Bhattarai um einræðistilburði séu ekki úr lausu lofti gripnar.

(Heimildir: *, *, *, *, *)
~~~ ~~~ ~~~ ~~~

Talandi um suður-asíska maóistaskæruliða, þá hafa maóísku naxalbari-skæruliðarnir sett fylkisyfirvöldum í Andra Pradesh úrslitakosti. (*)

Paul Gill hefur verið settur í farbann. SHA hafa fordæmt meðferðina á honum. Mér skilst að hann hafi verið látinn laus. Hvað er "atvinnumótmælandi"? Ég get ekki mælt fyrir annarra hönd, en mér finnst absúrd hvernig tröllasögur hafa spunnist um atburðinn á Hotel Nordica. Gill hefur verið sagður vera "málaliði" og vera á launum hjá einhverjum illa innrættum útlendingum. (Ósama, kannski?) Einhver á að hafa skitið á sig af hræðslu. Hvaða rugl er þetta eiginlega? Ég skil að fólk sé uppveðrað af þessum atburði - en mér hefur heyrst tvær fjaðrir verða að tíu hænum.

Ég sé mig knúinn til að draga aðeins í land varðandi "katastrófuna" um daginn, viðvíkjandi erindi mínu til Íslenskrar málstöðvar. Svo er, að þótt ég geti nú fallist á að "æsi" sé rétt þágufallsmynd eintölu af "ás" í merkingunni "goð", þá get ég með engu móti fallist á að það sé eina rétta myndin. Frá "ási" og frá "ás" finnst mér hvort tveggja hljóma fullkomlega eðlilega, og ég sé ekki að ég, sem altalandi Íslendingur, sé um þau efni ómerkilegra kennivald en annað kennivald. Semsagt: Ég mun halda áfram að viðurkenna "ás" og "ási" sem rétt þágufall af "ás" í merkingunni "goð". Það er ekkert óeðlilegt við að fleiri aukafallsmyndir en ein séu réttar af sama orðinu, eða fleiri myndir en ein almennt. Ég tek sem dæmi orðið sem í upphafi beygðist "mær - mey - mey - mær" og bætti svo við sig myndinni "mey - mey - mey - meyjar" - og svo enn "meyja - meyju - meyju - meyju". Það er tilhneiging til að sterk beyging víki fyrir veikri, og í krafti þess mun ég halda áfram að segja "frá ás" eða "frá ási", þótt ég fallist á að hitt sé rétt líka.

Íranskir umbótasinnar styðja Rafsanjani og það held ég að megi kallast skiljanlegt, sé höfð hliðsjón af því hver keppir við hann... Var að lesa þetta ágrip af horfum í þessum kosningum. Ætli Rafsanjani taki þetta ekki?
~~~ ~~~ ~~~ ~~~
Í Líbanon vann bandalag leitt af Saad Hariri sigur í kosningunum. Er það gott eða slæmt? Ég hef ekki hugmynd! Þeir eru með and-sýrlenskan brodd, sem gæti þýtt að þeir væru hallir undir Bandaríkin (eða kannski Ísrael) en ég veit svosem ekkert um það.
~~~ ~~~ ~~~ ~~~
Eftir mína nýjustu Vantrúargrein hafa skapast fjörugar umræður ef einhver hefur gaman að slíku.
~~~ ~~~ ~~~ ~~~
Haft er eftir Prachanda formanni nepalskra maóista: "Our party has issued special instructions to all cadres, (our) People's Liberation Army and other units not to carry out physical attacks on any unarmed person until another decision" ...jæja, óneitanlega er þetta skref í rétta átt, þ.e.a.s. ef þeir fara eftir því. Þeir hafa einnig lýst yfir stuðningi við stefnuskrá sjöflokkanna, þ.e. þingræðisflokkanna sem var vikið frá þann 1. febrúar -- og það býst ég við að sé reiðarslag fyrir krúnuna. Hver veit, það gæti skipt sköpum fyrir framtíð Nepals?

19. júní: Fagnaðardagur fyrir lýðræðissinna

Í dag eru 90 ár frá því kosningaréttur varð almennur á Íslandi, 90 ár frá degi einhverra stórstígustu breytinga í lýðræðisátt í sögu Íslands. Það er tómt mál að tala um borgaralegt lýðræði þar sem konur sitja ekki við sama borð og aðrir, en reyndar fengu fleiri en konur kosningarétt fyrir 90 árum. Með gildistöku sömu laga var veittir kosningaréttur snauðum körlum - vinnumönnum, tómthúsmönnum og öðrum - að vísu með því skilyrði að þeir hefðu ekki þegið af sveit, auk þess sem kosningaaldur þeirra, eins og kvennanna, var í fyrstu töluvert hærri en karla sem borguðu visst útsvar. En stökkið var stórt, og ég vil óska löndum mínum til hamingju með það. Tilefni dagsins er tilefni til almenns fagnaðar, ekki bara fagnaðar kvenna, því hver nýtur lýðræðis ef sumir njóta þess ekki? Hver er frjáls ef sumir eru ófrjálsir?

Það er ástæða til að minnast unninna sigra og fagna orðnum framförum, en varast skyldi fólk, að telja sig vera komið í höfn eða láta hér við sitja. Margt er eftir óunnið, mörgum steini óvelt, áður en þetta samfélag okkar má heita fullfrjálst, stjórnfrjálst, réttlátt, fullvalda eða í höfn komið. Í mínum huga eru dagar á borð við þennan umfram annað hvatning fortíðarinnar til nútímafólks, að láta ekki deigan síga heldur halda áfram baráttunni, vinna nýja sigra og þoka samfélaginu áfram til meiri framfara, meira lýðræðis og meira réttlætis.

Verði svo.

Egill Helgason skrifar um "Evró-neikvæða", frekar slappa grein að mínu mati. "Evrópusamtökin" vísa á greinina og á Múrnum gerir Huginn sér þetta að umfjöllunarefni. Ég held ég geti nú tekið undir grein Hugins, en vil bæta við athugasemd við það sem mér finnst kannski slappast í grein Egils:

Í meginstraumi stjórnmálanna dettur engum heilvita manni í hug annað en við eigum samleið með ESB.

Þetta er nú auma rökleysan, hvaða rugl er þetta? Egill drullar bara á þá sem eru honum ósammála að þeir séu annað hvort einhvers konar öfgamenn á jaðrinum, eða þá hálfvitar. Þessi ummæli dæma sig nú sjálf, en ég held að þarna sé á ferðinni dæmi um mann sem finnur fjara undan sínu sjónarmiði.

Enn af mótmæla-, virkjana- og álversmálum

Úr fréttum RÚV:

Glæpa og afbrotaumhverfi á Íslandi er að breytast, segir Björn Bjarnason dómsmálaráðherra. Hann segir það alvarlegt að fólk geti ekki komið saman á lýðræðislega samkomur án þess að eiga það á hættu að vera truflað eins og gerðist á ráðstefnu um áliðnað á Hótel Nordica í...

Á lýðræðislegar samkomur? Hvað er lýðræðislegt við að ráðamenn stórfyrirtækja plotti í reykfylltum bakherbergjum? Hvað er lýðræðislegt við að reyna að halda ráðstefnunni leyndri af ótta við fólk sem er ósammála? Hvað er lýðræðislegt við að leyniráðstefna kapítalistabrodda ákveði hlutskipti fólks sem er ekki einu sinni látið vita af ráðstefnunni? Svar: Það er ekkert lýðræðislegt við það. Ég efast um að Björn Bjarnason mundi þekkja alvöru lýðræði þótt það kæmi og ruglaði fínu hárgreiðslunni hans.
...og meira af sama meiði:

Jóhannes Geir Sigurgeirsson, stjórnarformaður Landsvirkjunar, vísar á bug gagnrýni mótmælenda álráðstefnunnar sem fram fór á Hótel Nordica í gær og þvertekur fyrir að þar hafi Ísland verið markaðsett sem ódýrt málmbræðsluland.
Hann segir það bæði órökrétt og rangt af umhverfisverndarsinnum að gagnrýna nýtingu hreinnar orku vilji þeir raunverulega draga úr útblæstri gróðurhúsalofttegunda og bæta lífsskilyrði í þriðja heiminum.

Er fólk hissa á að Jóhannes vísi á bug gagnrýni á hans eigið fyrirtæki? Ef það er bara rætt við hann, þá þarf hann ekki einu sinni að rökstyðja mál sitt. „[M]arkaðssett sem ódýrt málmbræðsluland“ er einmitt það sem Ísland er. Ódýrt rafmagn og ódýrar umhverfiskröfur. Á meðan Ísland er auglýst sem hreint ferðamannaland og borgararnir hvattir til að sturta ekki úr öskubökkunum á götuna („hreint land, fagurt land“) sjá gróðapungarnir bara tækifæri í óspjallaðri náttúrunni. Er það „hrein“ orka, að hlaða upp einhverjum rúmkílómetrum af jökulleir? Er það „hrein“ málmbræðsla, að reisa risaálver á Íslandi til að bæta fyrir lokun álvers í Bandaríkjunum, sem er lokað vegna kostnaðar við mengunarvarnir þar? Hvað er til betra til að laða að sálarlaus stórfyrirtæki, heldur en að gefa afslátt af umhverfisvernd, kjaramálum, lýðræði og öðrum mannréttindum?
~~~ ~~~ ~~~ ~~~
Ég vil í leiðinni vísa í meiriháttar góða grein Sverris Jakobssonar á Múrnum, sem innblásin er af þessum mótmælum og hinum móðursýkislegu viðbrögðum við þeim.
~~~ ~~~ ~~~ ~~~
Í gærmorgun gerði ég mér ferð í kirkjugarðinn þegar forseti borgarastjórnar lagði blómsveig á Jón Sigurðsson. Það eru örugglega 15 ár síðan ég gerði það síðast. Það fór vel fram, en athöfnin var heldur fámennari en ég bjóst við. Fylgdi svo skrúðgöngu niður á Austurvöll. Á Austurvelli var ýmislegt sem lét mér líða eins og barninu í "Nýju fötunum keisarans". Skruðningar í hátalarakerfinu, marserandi smástelpnadeild og fret í mótorhjólum löggunnar, geistlegir kennimenn í hálfgerðum trúða-skrúða og svo framvegis. Ég gat, satt að segja, ekki annað en hlegið að þessum skrípalátum.

Úr fréttum RÚV:
"Neyðarástand í búsetumálum geðsjúkra"
Neyðarástand ríkir í búsetumálum geðsjúkra. Meira en 200 manns þarfnast búsetu með stuðningi en a.m.k. 70 þeirra eru vistaðir á sjúkrastofnunum.
Þetta segir hópur aðstandenda geðsjúkra hjá Geðhjálp. Félagsmálaráðherra segir að um forgangsverkefni sé að ræða.
Forgangsverkefni schmorgangsverkefni. Sem geðheilbrigðisstarfsmaður get ég sagt að þessi mál þurfa að vera mun ofar í forgangsröðinni. Ef þetta eru forgangsmál, þá þætti mér athyglisvert að vita hvernig málum er háttað þegar þau eru ekki forgangsmál.
"Háskólarnir skilgreina akademískt frelsi" - það finnst mér jákvætt.
~~~ ~~~ ~~~ ~~~
Ég býst við að það tengist nýlegum skrifum mínum um Kárahnjúkavirkjun, mótmælatjaldbúðir, en ég hef fengið einhverjar heimsóknir frá vefþjóni ALCOA í Bandaríkjunum í gær og fyrradag. Ekki að það skipti neinu máli.
~~~ ~~~ ~~~ ~~~
Litli bróðir skrifar um Halldór Ásgrímsson og meinta spillingu.

Katastrófa: Játa mig sigraðan

Fyrir allmörgum árum sá ég í kennslubók í skólanum að maður nokkur hefði sagst hafa „fyrirmæli frá æsinum Óðni“ - og ég rak upp stór augu: Æsinum? Þetta samrýmdist sko ekki minni málfarskennd, og gerði ég athugasemd. Kennarinn sagði að „æsi“ væri rétt þágufall af „ás“ og það sögðu sumir af bekkjarfélögum mínum. Ég var aldeilis ekki sammála því: „ási“ væri það og engar refjar. Þegar tímanum lauk sat ég fastur við minn keip með kökk í hálsinum.
En nú tók ég mig til - bara í gærkvöldi - og skrifaði Íslenskri málstöð fyrirspurn um þetta. Ætlaði að fá úr þessu skorið í eitt skipti fyrir öll.
Svarið barst um hæl:

Sæll Vésteinn.
Rétt beyging er ás, ás, æsi, áss; æsir, æsi, ásum, ása.

Það leynir sér ekki. Ég þræti ekki við Íslenska málstöð. Niðurstaðan er semsagt sú að ég hafði á röngu að standa og hafði haft á röngu að standa í öll þessi ár. Ég held að þessi þræta hafi verið þegar ég var í 10. bekk - þ.e.a.s. fyrir áratug síðan.
Ég hef haft rangt fyrir mér um þetta í áratug! Að eitthvað sé „frá æsinum Óðni“ finnst mér ennþá hljóma illa - en sem ég segi, maður þrætir ekki við Íslenska málstöð.
Í tilefni af þessu hef ég bætt verðskulduðum hlekk á Íslenska málstöð á linkalistann hér til hægri.

Um skyrslettur, mótmæli og fleira

Skyrsletturnar á álráðstefnunni eru umhugsunarefni. Skipuleggjendurnir gátu sagt sér það sjálfir að það yrðu mótmæli, og það var örugglega ástæðan fyrir því að þessi ráðstefna var ekki gerð kunn almenningi. Það mátti vita fyrir að það yrðu mótmæli, og allir vita að almennileg, friðsöm mótmæli er ekki hægt að draga saman á nokkrum klukkutímum. Einhverjar Gandhi-aðferðir komu því ekki til greina þarna, þökk sé skipuleggjendunum sjálfum. Í staðinn gripu nokkrir einstaklingar til örþrifaráða, hvað sem fólki annars finnst um þau. Þar sem skrúfað var fyrir hefðbundna farvegi fyrir mótmælin, þá fundu þau sér óhefðbundinn farveg í staðinn.

Mig hálfgrunar satt að segja að svona aðgerð veki ekki jafn almenna andúð og margir virðast halda. Mig grunar að margir hugsi innra með sér að þetta hafi nú verið vel af sér vikið, þótt þeir létu ekki hafa það eftir sér. Fólkið sem talar digurbarkalega á kaffistofunni og í heita pottinum, getur það fordæmt fólkið sem framkvæmir það sem hin hugsuðu? Okkur hefur verið kennt að svona geri maður ekki og við hikum við að brjóta gegn því eða lýsa okkur á móti því sem við teljum vera meginstrauminn. En mig grunar að leyndur stuðningur við þessa aðgerð sé umtalsverður. Það var ekki verið að meiða neinn. Það er ekki öllum sárt um það þótt milljónamæringur þurfi að senda Armani-jakkafötin sín í hreinsun.

Það er auðvitað ekki þar með sagt að þetta hafi veið góð hugmynd og það mun koma í ljós hver eftirmálin verða af þessu. Þetta ber óneitanlega þann árangur að ráðstefnugestirnir urðu skelkaðir og eru þá ekki eins öruggir með sig við að rústa landinu okkar og seilast til valda í efnahagskerfinu okkar. Það er óneitanlega gott ef þessir þrjótar átta sig á að þeir eru ekki velkomnir hérna. Ég veit hins vegar ekki hvað skal segja um fórnarkostnaðinn. Þótt skyrslettur séu tiltölulega meinlausar, eru þær samt býsna aggressíf aðgerð, hljóta iðulega að vekja neikvæða athygli og eru því vægast sagt vandmeðfarin aðferð! Alla vega komst enginn málstaður til skila í fréttatímanum. En það var kannski ekki ætlunin.

Ef mótmæli eiga að vera í anda Gandhis, þá verða skipuleggjendur að láta vita með nægum fyrirvara að eitthvað standi til. Þegar þeir vita að fólk vill mótmæla, þá verða þeir að gefa því tíma til að skipuleggja friðsamleg mótmæli ef mótmælin á annað borð eiga að vera friðsamleg. Skyrslettur eru samt aðferð sem er í besta lagi tvíbent. Trúverðugleikinn hlýtur að bíða hnekki. Stimplar ungæðisháttarins og óstýrilætisins eru skammt undan. Jákvæðari nálgun á málin er víst vænlegri til árangurs - en til að mótmæli geti farið friðsamlega fram verður svona viðburður að vera auglýstur í tæka tíð. Það var þessi ekki.
~~~ ~~~ ~~~ ~~~
Það er grein eftir mig á Vantrú í dag, miðvikudag. Eins og illa gerður hlutur heitir sú og er um aðkomu Þjóðkirkjunnar að stjórnarskrárráðstefnunni.
~~~ ~~~ ~~~ ~~~
Dick Cheney átti tilvitnun dagsins í fréttatímanum: Ég held að Guantanamo-fangelsið hafi ekki gert orðstír Bandaríkjanna verri. Flestir sem eru að mótmæla meðferð fanga þar voru á móti stefnu Bandaríkjanna fyrir. [leturbreyting VV] ... já, ég er ekki frá því að þarna hafi auðvald og ofbeldisfullt ríkisvald talað upp úr svefni. Hvers vegna ættu stjórnmálamenn að hlusta á þá sem gagnrýna þá? Hvers vegna ætti Halldór Ásgrímsson að gefa því gaum sem ég hef að segja, til dæmis? Það er ekki eins og ég eigi eftir að kjósa hann fyrir því.

Ég fór á ráðstefnu stjórnarskrárnefndar í gær. Var skráður sem óháður (eða, réttara sagt, sagnfræðinemi). Dagskrá ráðstefnunnar má lesa hér. Ráðstefnan stóð frá morgni og fram undir kvöld. Ekki er hægt að segja að mikill hiti hafi verið í mönnum, og saknaði ég tveggja erinda úr umræðunni, sem hvorugt barst nefndinni nógu snemma til að komast á dagskrá ráðstefnunnar, en það voru erindi Lýðræðishópsins og erindi Vantrúar (sjá Vantrú á morgun, mánudag). Margir málaflokkar voru ræddir og var umræðum skipt upp í þrjár málstofur, svo sem sést í dagskránni. Um flest það sem rætt var hef ég ekki annað að segja en að margt áhugavert og fróðlegt kom fram, en ráðstefnan var sem slík frekar lognmolluleg og hefði mátt hugsa sér fjörugri umræður. Ég held ég geti tekið undir erindi a.m.k. ÖBÍ, Félags heyrnarlausra, Þjóðarhreyfingarinnar, Siðmenntar, SARK, Landverndar, SHA og sumra annarra að einhverju leyti ... en eitt sló mig.
Bæði félögin SARK og Siðmennt lögðu fram tillögur um að trúfrelsi yrði betur tryggt og ríki og kirkja aðskilin, og viti menn: Þjóðkirkjan sendi fulltrúa á staðinn. Hún hafði (og hefur) ekki sent nefndinni erindi, og svo skömmu sem 36 tímum áður en ráðstefnan hófst vissi enginn af þátttöku hennar - en þarna dúkkaði Sigurjón Árni Eyjólfsson upp fyrir Þjóðkirkjunnar hönd og virtist eiga að vera einhvers konar mótvægi við SARK, Siðmennt og fleiri sem mæltu með aðskilnaði. (Þess má geta að þótt Samtök herstöðvaandstæðinga ættu fulltrúa, þá voru Samtök um vestræna samvinnu víðs fjarri, svona til samanburðar!)
Sigurjón flutti erindi sem nefndist „Kirkja og samfélag“ og var því dreift til ráðstefnugesta eins og öðrum erindum. Eftir stutta leit á Google varð ég þess vísari að þetta erindi hefur áður birst, þá undir nafninu „Trú og afhelgun“, á Guðfræðivefnum! Þar getur hver sem er séð erindið, og ég þarf því ekki að segja þeim sem þetta lesa að það var bæði óviðeigandi, innihaldsrýrt, fullt af tuggum, klisjum og rökleysum og, í stuttu máli sagt, óskiljanlegt hvað það var að gera þarna. En endilega, látið mig ekki segja ykkur að það hafi verið þannig: Lesið það sjálf.
Það er kominn tími til að forréttindastöðu og silkihanskameðferð þessarar forneskjustofnunar linni.
~~~ ~~~ ~~~ ~~~
Í dag eru 92 ár liðin frá einu glæsilegasta tiltæki Íslendinga í borgaralegri óhlýðni, fánatökunni. Það er því viðeigandi í dag að hugsa til borgaralegrar óhlýðni og hvaða erindi hún á í dag.
~~~ ~~~ ~~~ ~~~
Í Bólivíu hefur forsetinn Mesa sagt af sér og nýr forseti er tekinn við. Umsátri mótmælenda um höfuðborgina La Paz er lokið og nú er að sjá hvort stjórnarbæturnar verða gerðar, sem hefur verið lofað.

RÚV flytur gleðifrétt dagsins:

Bush forseti hefur gefið leyniþjónustunni fyrirmæli um að fjölga starfsmönnum um 50% á ári næstu fimm ár.

Það er nú gott til þess að hugsa að einhver sé að hugsa um öryggi okkar. *ræskj*
~~~ ~~~ ~~~ ~~~
Í Nepal drápu maóistar 38 og særðu 71 í sprengjutilræði á rútu, en biðjast afsökunar og segja þetta hafa verið mistök og að þeim ábyrgu hafi verið refsað ... úff, þetta eru vægast sagt dýrkeypt mistök.
~~~ ~~~ ~~~ ~~~
Í Bólivíu taka mótmælendur olíulindir á sitt vald, Mesa forseti hefur sagt af sér og nú er að sjá hvort verður boðað til kosninga. Það er eitt sem Bólivíumenn vantar til að geta gert vel heppnaða byltingu, og það er byltingarflokkur. Einhver vísir að slíku er til, en virðist ekki vera nóg til að geta leitt hana til farsælla lykta.
~~~ ~~~ ~~~ ~~~
Á Deiglunni skrifar Pawel: „Rökin gegn hvalveiðum eru veik, en það eru rökin með þeim einnig.“ Satt er það.

Húgó Chavez gagnrýnir Bandaríkjamenn harðlega: „If there is any government that should be monitored by the OAS, then it should be the US government, a government which backs terrorists, invades nations, tramples over its own people, seeks to install a global dictatorship. That should be the government that is monitored“ ... hann hittir naglann á höfuðið, og ekki í fyrsta sinn. Á sama tíma býr hann land sitt undir það versta með því að byggja upp borgaralegar varnarsveitir, ef til innrásar kæmi. Ef mér skjátlast ekki, er það sambærilegt við landvarnir Kúbu.
~~~ ~~~ ~~~
Spurt er hvort Swaziland verði fyrsta landið til þess að deyja úr alnæmi.
~~~ ~~~ ~~~
Nýlega birtist á Gagnauga grein Jóns Karls Stefánssonar, „Skólar og innræting“ ... góð lesning og gagnleg.
~~~ ~~~ ~~~
David Kay Johnston gerir grein fyrir því, hvernig bilið milli ríkra og fátækra í Bandaríkjunum fer breikkandi, og það hratt.
~~~ ~~~ ~~~
Siggi pönk skrifar, eins og fyrri daginn, ýmislegt af viti. Orð Sigga eru skáletruð:
stjórnmál hafa verið gerð að félagslegum afkima sem einungis útvaldir eiga að hafa afskipti af.
Stjórnmál eru firrt: Þau eru í höndum atvinnumanna og sérfræðinga - gjarnan sjálfskipaðra - sem gengur eitthvað annað til en almannahagur. Samfélagið stjórnar sér ekki sjálft, heldur er því stjórnað af áhrifamesta valdahópnum hverju sinni, af sterkustu blokk sérhagsmunafólks - þar á móti þarf að myndast öflug, þétt og samhent „blokk“ um almannahag. Með öðrum orðum: Almenningur þarfnast meðvitundar og skipulags, og hann þarfnast þess að taka málin í eigin hendur, hvort sem litið er til einstaklinga eða hópa.
Baráttan fyrir félagslegum og efnahagslegum jöfnuði verður ekki unnin á einum orrustuvelli heldur taka sig saman friðarsinnar og feministar, anarkistar og sósíalistar, anti-fasistar og umhverfisverndarsinnar, baráttufólk fyrir ýmsa minnihlutahópa ... auk dýraverndunarsinna og neytendasamtaka svo ég nefni einhverja þeirra hópa sem taka þátt í samfélaginu utan við valda- og fjármagnsmarkaðinn.
Þetta er hárrétt. Nú er nóg komið af klofningi, hann hefur skemmt nógu mikið, en við getum um leið lært mikið af honum. Ólíkir hópar sem vinna hver að sínum kima almannahags, og sameinast um mál eða málaflokka eftir hentugleikum eða þörfum, breið hreyfing sem á erindi til fólks, en hefur sem slík enga miðju, enga miðstjórn, aðra en hópeflið og pólitískt atgervi.
Valdablokkin hleypir þér ekki inn nema að þú aðlagir þig hennar reglum og þá ert þú þegar búin(n) að tapa. Ungur karlmaður sem leiðist að vinir sínir tali niðurlægjandi um konur bætir ekki ástandið með því að temja sér að hugsa eins og þeir.
Hittir beint í mark: Ef valdablokkin getur ekki sigrað keppinaut, þá vill hún semja. Hún innlimar keppinautinn frekar og deilir með honum völdum, heldur en að missa þau alveg. Við sigrum ekki óvininn með því að ganga í lið með honum, ekki frekar en með því að biðja hann kurteislega um að hætta að níðast á saklausum.

Það er grein eftir mig á Vantrú í dag, um bænir sem geta virkað í alvörunni.
~~~ ~~~ ~~~ ~~~
Ég vil líka ítreka ábendinguna um að fólk skoði Lýðræðisfrumvarpið. Á umræðuvefnum þar kom um daginn áhugaverður pistill frá Helga Hrafni Gunnarssyni. Frumvarpið hefur verið sent stjórnarskrárnefnd og má núna nálgast það á heimasíðu hennar líka, eða réttara sagt, þá hluta þess sem einkum ættu erindi í stjórnarskrána. Ég hvet fólk: Lesið þetta endilega, takið afstöðu og gerið grein fyrir henni - og bendið öðrum á.
~~~ ~~~ ~~~ ~~~
Hér er "flash presentation": None Of Us Are Free - If One Of Us Is Chained.
~~~ ~~~ ~~~ ~~~
Hérna má svo lesa samræðu úr þætti Amy Goodman, þar sem William Schultz í Amnesty og David Rivkin elta ólar um hvort Bandaríkjastjórn sé viðriðin kerfisbundin mannréttindabrot eða ekki. Mér finnst Schultz nú koma betur út úr þessu ... en er reyndar fyrirfram meira og minna sammála honum.
~~~ ~~~ ~~~ ~~~
Í Nepal hafa maóistar blásið af þjóðvegastöðvun sem þeir hafa reynt að halda uppi undanfarnar tvær vikur. Segja hins vegar að allsherjarvinnustöðvun verði næsta skref, ef ekki verður komið til móts við þá. Ég held að stjórnarherinn hafi unnið þónokkuð á að undanförnu, og maóistarnir eru sjálfir klofnir vegna ágreinings Bhattarais og Prachanda. Þannig að kannski er þetta veikleikamerki. Eða, það gæti a.m.k. vel verið það. Prachanda og Bhattarai ættu að sættast í snatri, þótt ekki væri nema af taktískum ástæðum, og þétta raðirnar ef þeir vilja ekki að byltingin fari út um þúfur. Þeir mega ekki við þessu núna. Annars held ég að meðferðin á Bhattarai sé óverðskulduð - það verður varla betur séð en að einræðistilhneiginga gæti hjá Prachanda, og innra lýðræðis er tvímælalaust þörf í flokknum.

Norður-Kóreustjórn krefst afsökunarbeiðni frá Cheney - um leið og opinbert málgagn hennar skefur ekkert utan af því:

Cheney is hated as the most cruel monster and blood-thirsty beast as he has drenched various parts of the world in blood.

Það sem mér líkar við þetta málgagn annars meira og minna andstyggilegrar ríkisstjórnar N-Kóreu, er hvað þeir leyfa sér að vera hispurslausir þegar þannig liggur á þeim. Þeir segja að Cheney sé skepna og skrímsli og blóðþyrstur, hataður og grimmur - og það er einfaldlega rétt hjá þeim!

Baburam Bhattarai, sem ég hef oft minnst á og var til skamms tíma næstráðandi í nepalska maóistaflokknum en var sviptur öllum ábyrgðarstöðum eftir ósætti milli hans og Prachanda formanns, er ekki jafn týndur og sumir héldu (þar á meðal ég): Það hefur frést af honum í Indlandi! Þar hefur hann m.a. fundað með Prakash Karat, aðalritara Communist Party of India (Marxist). Þetta hefur farið leynt, en er merkisfrétt! Hindustan Times segja innanbúðarmenn hjá CPI(M) hafi staðfest að fundurinn hafi átt sér stað - þótt Karat sjálfur vilji hvorki játa því né neita.

Um daginn bloggaði ég þessu flotta ljóði, sem var ort af samviskufanga sem neitaði að þjóna í hernum í fyrri heimsstyrjöldinni og orti í fangelsi:

Mourn not the dead, that in the cool earth lie,
dust unto dust;
The calm, sweet earth, that mothers all who die,
as all men must;
But rather mourn the apathetic throng,
the cowed and the meek,
who see the world's great anguish and its wrong,
and dare not speak!
(Ralph Chaplin)

...og var að þýða það yfir á íslensku:

Grát ekki þá dauðu, sem gista svarta mold,
gengnir í frænda sal.
Milda, blíða jörð, móðir fóstrar hold
af mörgum hal.
Grát þú fólkið, gæfusnauða hjörð,
guggnað og sljótt
sem veraldar ólög veit að eru hörð,
en vantar þrótt.
(þýð. V.V. 2.6.05)

Vésteinn Valgarðsson: Fyrstur með fréttirnar?

RÚV.is birti fréttina af byltingarástandinu í Bólivíu klukkan 12:49 í dag. Þegar þetta er skrifað hefur Mbl.is enn ekki birt frétt af þessu og Vísir ekki heldur. Ég hlýt því að álykta að þetta blogg mitt frá því í nótt sé fyrsta íslenska fréttin af því, a.m.k. á netinu. Merkilegt. Ég vil að vísu geta þess, í heiðarleika skyni, að ég fékk senda ábendingu um þetta í rafpósti.
~~~ ~~~ ~~~ ~~~
Súpergrein eftir Óla Gneista í Morgunblaðinu í dag, s. 40. Einnig er hægt að sjá hana á Vantrú.
~~~ ~~~ ~~~ ~~~
Norður-Kóreustjórn kallar Dick Cheney "blóðþyrst villidýr" ... ég get tekið heils hugar undir það með þeim!

Bólivía á barmi byltingar!

Þúsundir innfæddra Bólivíumanna (semsagt indíána) fylla götur La Paz, rífa bindin af skrifstofufólki og henda dínamíti í lögregluna! Mótmælendurnir mótmæla fullum hálsi löggjöf um gas-lindir landsins, krefjast þess að þær verði þjóðareign. Þingið er í lamasessi, framkvæmdavaldið líka, stjórnmálagreinirinn Winston Moore, staddur þar, segir að það sé alvarlegt valdatóm og upplausnin fari vaxandi. Talið er að rósturnar geti breiðst út til annarra borga. Verkfall lamar höfuðborgina og forsetinn Carlos Mesa kennir "róttækum hópum" um ástandið og hótar að beita hernum! Hér er lexía: Það er sama hversu róttækur einhver hópur er, hann lamar ekki höfuðborg með óeirðum nema það séu hyldjúp félagsleg vandamál fyrir. Með öðrum orðum: Enginn róttækur hópur getur "búið til" óeirðir sem megna að lama stórborg.
Fleiri fréttir frá róstum í Bólivíu

Freedom House segja að 9 ára fangelsisdómur Mikhails Khodorkovsky sé vísbending um að réttaröryggi í Rússlandi sé trosnað. Sko ... hann er stjórnarandstæðingur -- en frelsi til að vera ósammála forsetanum gefur mönnum ekki leyfi til að svíkja morð fjár undan skatti! Fyrir utan að hann er þjófsnautur, að þiggja Yukos á silfurfati frá Yeltsín á sínum tíma.
~~~ ~~~ ~~~ ~~~
Best að skella þessari tilkynningu hingað:

5. og 6. júní verður boðið upp á námskeið um borgaralegt hugrekki og friðsamar beinar aðgerðir ...
Í kjölfarið, eða helgina 11.-12. júní, verður ýtarlegra námskeið. Æskilegt er að þátttakendur á því námskeiði hafi sótt námskeið Milan Rai eða undirbúningsnámskeið 5. eða 6. júní. ...
Takið daginn frá! Frekari upplýsingar og skráning á motmaeli@yahoo.co.uk

Sjá nánar einhvers staðar annars staðar, svosem hér og hér... Snillingurinn ég fékk þessa tilkynningu senda á póstlistann Fólkið.net ... skráði mig um hæl, og sendi skráninguna á póstlistann líka. Það ætti að sæma mig heiðursmerki. Eða prófessorsnafnbót.
~~~ ~~~ ~~~ ~~~
Hér er stríðsljóð, að því er mig minnir úr fyrri heimsstyrjöldinni, sem mér þykir með afbrigðum vel ort. Höfundurinn sat í fangelsi fyrir að neita að gegna herþjónustu, ef ég man rétt:

Mourn not the dead, that in the cool earth lie,
dust unto dust;
The calm, sweet earth, that mothers all who die,
as all men must;
But rather mourn the apathetic throng,
the cowed and the meek,
who see the world's great anguish and its wrong,
and dare not speak!
(Ralph Chaplin)