Ég hef skipt um afstöðu í máli Bobbys Fischer. Í stað þess að vera frekar sama um hvort hann fær íslenskan ríkisborgararétt eða ekki, þá hef ég ákveðið að gerast eindreginn stuðningsmaður þess að hann fái hann. Ef Bobby Fischer fær ríkisborgararétt sem einhvers konar flóttamaður, er þá ekki komið fordæmi sem gerir yfirvöldum erfiðara fyrir að meina flóttamönnum framtíðarinnar um aðgang? Með réttindi flóttamanna í huga tek ég því hér með afstöðu með því að Bobby Fischer fái hæli á Íslandi eins lengi og hann sjálfur vill.
~~~ ~~~ ~~~ ~~~
Af öllum mönnum, Wolfowitz í Alþjóðabankann. Minnir okkur á hvaða rullu Alþjóðabankinn spilar í heimskapítalismanum og hinni nýju heimsskipan. Eitt af valdatækjum hnattrænnar valdastéttar með bandarísku valdastéttina í forystu. Vei þeim sem vill ekki vera með. Alþjóðabankinn (WB). Alþjóða gjaldeyrissjóðurinn (IMF). Alþjóða viðskiptamálastofnunin (WTO). Bretton Woods-kerfið, hannað til að þrýsta á meiri einkavæðingu (=meiri gróða), minni ríkisumsvif (=minni samfélagsumsvif), minna velferðarkerfi (=minni velferð), opnari fjárfestingu (=minni samfélagslega ábyrgð kapítalista), greiðari straum auðmagns milli landa (=úr landi). Þetta and-húmaníska kerfi sem þjónar þörfum auðmagns og auðvalds. Hver gæti verið betri kandídat til að halda utan um þetta en Paul Wolfowitz?
"Wolfowitz to Rule World (Bank)" er líka góð grein.
~~~ ~~~ ~~~ ~~~
Lesið ágæta grein þar sem borin er saman þróunin í Þýskalandi á árunum fyrir stríð og í Bandaríkjunum nú í dag.
~~~ ~~~ ~~~ ~~~
Á MSNBC er sagt:

The system the CIA relies on to ensure that the suspected terrorists it transfers to other countries will not be tortured has been ineffective and virtually impossible to monitor, according to current and former intelligence officers and lawyers, as well as counterterrorism officials who have participated in or reviewed the practice.

WELL DUH gæti maður sagt. Stofnun sem stundar ekki bara kerfisbundnar pyndingar (með útboðum og verktökum og allt) heldur rekur sérstaka skóla í listinni við pyndingar og hryðjuverk, auk þess að nota allar smugur laganna til að kalla pyndingar ekki pyndingar heldur "þrýsting á líkamlegt þol" fólks og eitthvað ... ekki með dugandi kerfi til að vernda fórnarlömb sín fyrir pyndingum? WELL DUH!

Björk Guðmundsdóttir segist vilja að trúarbrögð yrðu afnumin. Ég tek undir það. Gott hjá henni.

Wolfowitz tilnefndur sem forseti Alþjóðabankans. Bush segir að hann sé "brjóstgóður og heiðarlegur" ... en Bush er nú ómerkur orða sinna eins og dæmin sanna. Ég get varla hugsað mér verri kandídat en Wolfowitz til að stýra Alþjóðabankanum. Á hinn bóginn, þá býst maður við að hann verði fyrir valinu.
~~~ ~~~ ~~~ ~~~
Merkilegur annars þessi yfirlætislegi sjálfbirgingsháttur og hrokafulla stærilæti Vesturlandabúa þegar málefni þriðja heimsins eru annars vegar. Allra bragða er neytt til að hafa tangarhald á fátækum löndum svo hægt sé að arðræna þau. Fátæk lönd eru gagnrýnd fyrir að hafa spillt og óskilvirk stjórnkerfi ... en hvernig er hægt að reka skikkanlegt stjórnkerfi þegar hvorki eru til peningar né stétt menntamanna? Spilling er síðan hugtak sem getur verið vafasamt að alhæfa of mikið um. Það getur t.d. verið fín lína milli spillingar og trausts. En það er auðvelt fyrir okkur Vesturlandabúa að benda á gallana í þriðja heiminum úr þessum fullkomnu löndum okkar. Það er ekkert að hjá okkur, er það nokkuð? Við megum gagnrýna af því við erum fullkomin, ekki satt?
Bandaríkjastjórn talar um mannréttindi og alþjóðalög eins og hún standi ofar í brekku siðferðisins (e. moral high ground) en Íran, Sýrland og fleiri lönd ... kaldhæðnislegt til þess að hugsa. Ríki sem hefur hærra hlutfall af þegnum sínum á bak við lás og slá en nokkuð annað, tekur börn af lífi og starfrækir pyndingabúðir um víða veröld og hefur útboð til að finna hagkvæmasta verktakann til að sjá um pyndingarnar. Talar svo um að draga menn eins og Saddam fyrir rétt, en neita sjálfir að taka þátt í Alþjóða stríðsglæpadómstólnum og hunsa samþykktir Sameinuðu þjóðanna eins og þá lystir.
~~~ ~~~ ~~~ ~~~
Enski fundurinn í gærkvöldi heppnaðist ágætlega, held ég. Mætingin var frekar góð. Ögmundur Jónsson talaði um kúbönsku byltinguna og stöðu hennar í dag, m.a. með tilliti til Venezuela og þróunarinnar þar. Mér fannst hann flytja mál sitt skörulega og ítarlega og fróðlegt á að hlýða. Eftir tvær vikur, 29. mars, mun Valur Gunnarsson halda enska framsögu um íslensku málaliðana í Afghanistan.

Er ekki ógeðslegt að nota Helförina í áróðursskyni fyrir því að "tilvist Ísraels sé nauðsynleg"? Mér finnst þetta blátt áfram ósmekklegt. Helförin var nógu hræðileg, þótt hún sé ekki notuð í áróðursskyni til frekari óhæfuverka.

Það er einn svipur sem ég set oft upp, án þess að nein sérstök ástæða sé fyrir því, svipur sem ég er satt að segja ekki viss hvað þýðir. Ég hef notað hann árum saman án þess að vera viss um hvaðan hann kom upphaflega. Ég hef séð menn setja hann upp, svipað því sem ég geri, yfirleitt skeggjaða menn, og frekar tannlausa en tennta. Þennan svip er auðveldara að gera ef maður er tannlaus, en hann fer betur ef maður er vel skeggjaður.
Í gær var ég á gangi heim til mín utan úr háskóla - með svipinn góða á andlitinu - og fór yfir Hringbraut hjá Landsbókasafninu. Þar sem ég geng yfir túnið fyrir sunnan kirkjugarðinn verður mér litið upp og sjá: Ég horfðist í augu við mann með sama svip og ég. Styttan "Útlaginn" er með nákvæmlega sama svipinn. Þetta er semsagt útlagasvipurinn og verður aldrei nefndur annað hér eftirleiðis.

Í kvöld (þriðjudagskvöld) klukkan 20:00 er málfundur á ensku í Snarrót: Ögmundur Jónsson hefur framsögu um kúbönsku byltinguna og stöðuna í dag, m.a. með tilliti til gangs mála í Venezuela. Umræður á eftir. Fundurinn fer fram á ensku. Ef þið þekkið útlendinga sem eru staddir á Íslandi og vilja taka þátt í grasrótarstarfi, látið þá endilega vita. Sams konar fundir verða annan hvern þriðjudag út maí. Sjá heimasíðu Snarrótar.
~~~ ~~~ ~~~ ~~~
Jón Einarsson lætur Karl Sigurbjörnsson heyra það út af þessari ljótu predikun um daginn. Orð í tíma töluð.
~~~ ~~~ ~~~ ~~~
Í gær voru víst liðin 122 ár frá því Karl Marx dó í svefni, sitjandi í hægindastól í íbúðarholu sinni í London. Í gær var líka pí-dagurinn, 14. mars, sem á ensku er táknaður 3.14 = pí.
~~~ ~~~ ~~~ ~~~
19. mars næstkomandi eru stærðarinnar mótmæli gegn Íraksstríðinu ef það skyldi hafa farið fram hjá einhverjum. Skyldumæting fyrir þá sem eru á móti því að saklausir borgarar séu myrtir!

Ég hef komist að því að ruglið sem hefur verið hér á hliðar-dálknum á blogginu var vegna þess að templates duttu að mestu leyti út og hurfu.
Sem betur fer eru ekki nema 2 eða 3 dagar síðan ég tók öryggisafrit af þeim. Uss, en sú heppni gæti einhver sagt, en ætli maður geri ekki orð Dr. Victor von Doom að sínum: Heppni er fyrir heimskingja, sá sterki er forsjáll.
~~~ ~~~ ~~~ ~~~
Það er annars nóg að gerast í félagsstörfunum. Annað kvöld klukkan 20 er fyrirlestur Ögmundar Jónssonar um nýafstaðna ferð sína til Kúbu, og umræður á eftir. Sá fundur verður á ensku og sérstaklega hugsaður til að koma til móts við þá sem eru hér á Íslandi án þess að vera of sleipir í íslensku, en vilja samt geta tekið þátt í grasrótarstjórnmálum eða hafa einfaldlega áhuga á pólitík. Þið ykkar sem lesið þetta og þekkið til útlendinga á Íslandi, endilega látið þá vita af fundinum.

Ef það er satt, sem Abbas segir, þá er þess varla langt að bíða að sprengjuárás tæti í sundur pitsustað í Tel Aviv eða strætóstoppistöð í Megiddo. Sprengjuárás skipulögð og framkvæmd af útsendurum ísraelskra hægrimanna, sem herskáum Palestínumönnum verður kennt um, og notuð sem átylla til að rústa hús, drepa fólk og hleypa öllu í bál og brand. Þess er varla langt að bíða.
~~~ ~~~ ~~~ ~~~
Hér getur að líta vandaða úttekt á ástandinu í Nepal, innri og ytri aðstæðum, geó-pólitískum álitamálum, vanhugsaðri stjórnlist konungsins, styrk maóistanna en um leið mistökum sem þeir hafa gert, og þriggja hliða átökum síðustu ára.
~~~ ~~~ ~~~ ~~~
Þessi karl sem var ráðinn fréttastjóri RÚV hefði örugglega hvergi verið ráðinn nema í bananalýðveldi eins og Íslandi.

Svona fréttir finnst mér hljóma eins og martröð ... og ég fyllist óhug við tilhugsunina um að þetta er ekki martröð, þetta er alvöru. Bandaríkjastjórn stundar kerfisbundnar pyndingar á fólki. Þetta eru mennirnir sem íslenska valdastéttin vill binda trúss sitt við. Við hin getum þá sagt okkur sjálf hvað til okkar friðar heyrir!

Hið íslenska tröllavinafélag fór í gær á slóðir Jóru tröllkonu í Ölfusi og sunnan Þingvallavatns. Skemmst er frá því að segja að ferðin heppnaðist prýðilega vel! Henni verða gerð nánari skil í næsta tölublaði Tröllafrétta, sem ætti að koma út eftir 3 vikur eða svo og er sent öllum skráðum félögum í Hinu íslenska tröllavinafélagi.

Hefur morðið á Rafiq Hariri verið upplýst?
~~~ ~~~ ~~~ ~~~
Einkavæðing leyniþjónustunnar?

Vantrúarsýning og ensk framsaga

Í kvöld klukkan 20:00 býður Vantrú.net í bíó. Mótmælandi Íslands verður sýndur, myndin um Helga Hóseasson, og umræður á eftir. Aðgangur er ókeypis og allir velkomnir meðan húsrúm leyfir. Staðsetning: Snarrót í Garðastræti 2. Nýtið nú tækifærið að sjá þessa frábæru mynd!
~~~ ~~~ ~~~ ~~~
Á þriðjudaginn verður fundur á ensku í Snarrót, sá fyrsti í 6 funda röð. Ögmundur Jónsson heldur framsögu um hvað er að gerast á Kúbu um þessar mundir og hvernig samstarf Kúbu og Venezuela er háttað, en hann er nýkominn frá Havana. Framsagan verður, sem áður segir, á ensku, og á eftir eru umræður á ensku. Allir eru velkomnir, en fundinum er sérstaklega ætlað að koma til móts við þá sem eru ekki sleipir í íslensku. Þeir sem vilja fá nánari upplýsingar um fundinn eða plaköt til að hengja upp til að auglýsa hann - eða segja erlendum vinum, skólafélögum eða vinnufélögum frá - mega hafa samband við mig: vangaveltur@yahoo.com og fá sent plakat um hæl.

Mér hrýs hugur við að sjá meðborgara mína fljóta sofandi að feigðarósi; keyrandi um á bensínhákum, skilja einkabílinn eftir í gangi, ferðast einn maður í hverjum bíl. Ef orkan sem fer í að framleiða olíu væri reiknuð sem kostnaður, þá væri hún töluvert mikið dýrari en hún er ... en hvers virði er náttúra fortíðarinnar? Í nafni framtíðar mannkynsins væri réttlætanlegt að taka í taumana. Þessir einkabílar eru ekkert nema bruðl og hégómi og það á eftir að reynast okkur dýrt þótt síðar verði að geta ekki drullast til að sýna smá nægjusemi.
Birgir Baldursson reit komment:

Iss, samkvæmt honum mofa okkar er ekkert mál að framleiða skyndiolíu, þetta tekur víst ekkert milljónir ára eins og við höldum.

Af hverju ætli ég trúi honum ekki?

Það er ekki skrítið að þú skulir ekki trúa honum, en reyndar mun þetta vera rétt hjá honum. Það er hægt að framleiða olíu úr lífrænum efnum og það á nokkrum klukkustundum. Og nei, þetta er ekki lausnin við vandanum. Orkan sem fæst úr þessari olíu er nefnilega miklu minni en orkan sem fer í að framleiða hana. Það voru notaðir kalkúnar í þessa framleiðslu. Það sér hver maður að ef það kostar 100X af orku að framleiða kalkúnana og 50X að vinna úr þeim olíu sem aftur má vinna úr 15X af orku, þá er það ekki gáfulegur bissness.

Já, það kann að hljóma hrokafullt að ég skuli tala svona um meðborgara mína. Það er ekki eins og líf mitt sé óháð olíu heldur. Ég reyni að vísu að nota einkabíl eins lítið og ég get (sem er lítið), en í samfélagi sem er sniðið að þörfum einkabílsins og stórneytandans er kannski ekki skrítið að flestum þyki þægilegast að geta henst á bíl út í sjoppu. Hvað fólk á eftir að sjá eftir þessu eftir nokkur ár. Við erum engu betri en dýr eða gerlar sem af fullkominni óforsjálni nýta sér allar lífsbjargir sem þau geta og drepast svo úr hungri þegar þær þrýtur. Við höldum að við séum svo merkileg, svo öðruvísi, svo æðri heimskum skepnum. Erum við það í alvörunni?

Ég geng úti á götu, og sé framundan mér kunningja minn og hann sér mig. Tveim metrum fyrir aftan hann gengur annar kunningi minn. Hann sér mig líka, en þeir þekkjast ekki. Hvað geri ég? Get ég kinkað kolli til annars en tekið hinn tali? Get ég heilsað báðum jafnt og móðgað báða með því að taka hvorugan tali? Get ég ávarpað þá báða í einu: "Sælir"? Get ég snúist á hæli, hlaupið burt og orðið aðhlátursefni eða undrunarefni beggja?
Ég þoli ekki þegar þetta gerist. Í gærkvöldi slapp ég naumlega: Rakst fyrst á frv. vinnufélaga og andartaki síðar á þessa gömlu sál en með nægilegu millibili til þess að staðan yrði alls ekkert afkáraleg. Heppni var það.

Meðal annarra frásagnarverðra atburða gærdagsins má nefna (í tímaröð):
* Hóf daginn á neytendakönnun hjá Rannsóknastofnun fiskiðnaðarins og át 200 g af eintómum soðnum þorski. Það var reyndar síður en svo slæmt.
* Gekk frá lausum endum varðandi ýmislegt sem ég er að bauka.
* Fór erinda Hins íslenska tröllavinafélags og keypti fundargögn í verslun einni í Austurstræti.
* Lærði að tefla hnefatafl.
* Fékk snillinginn Þórarinn haka til að búa til þetta plakat.
* Sá Eddie Izzard. Hann var skemmtilegur. Þorsteinn Guðmundsson og Pétur Jóhann Sigfússon hituðu upp. Þeir voru líka skemmtilegir.
* Tók mína fyrstu næturvakt á Grund. Það er skemmst frá því að segja, að ég lít svo á að ég sé ennþá að leita mér að nýrri vinnu.

Svo það sé lýðum ljóst, þá eru (misjafnlega) rótarleg komment, sem upp á síðkastið hafa birst á a.m.k. þrem bloggum, ekki verk þeirra sem nefndir eru sem höfundar. Rótarleg komment á bloggi Arnar Arnarsonar eru ekki frá mér komin, komment eignuð honum á mínu bloggi eru ekki frá honum, og a.m.k. eitt komment á bloggi Ágústar Borgþórs sem er eignað mér er ekki frá mér heldur. Ég veit ekki hver var að verki, en þætti vænt um að sá hinn sami hætti þessum barnaskap og fyndi sér eitthvað verðugra viðfangsefni en að reyna að skaprauna siðprúðum ungum mönnum.

Líbanon, Sýrland og sýndar-lýðræðishreyfingar á mála hjá Vesturveldunum

Í Morgunblaðinu í dag var sýnt frá stærðarinnar mótmælum í Beirút, þar sem Líbanir mótmæltu veru sýrlenska hersins í Líbanon. Þar kom ekki fram hvaða Líbanir þetta voru né hvers vegna þeir voru að mótmæla veru sýrlenska hersins.

a) Þetta voru líbanskir maronítar (það er kristin kirkjudeild), sami þjóðfélagshópurinn og myndaði Falange, dauðasveitirnar sem frömdu massakerið í Sabra og Shatilla 1982, undir verndarvæng ísraelska hersins og á ábyrgð þáverandi varnarmálaráðherra Ísraels, Ariels Sharon. (Athugið nafnið "Falange" - þetta er sama og "falangistar", flokkur Francos og fasista hans í spænska borgarastríðinu. Falange er m.ö.o. fasistaflokkur.)
b) Það sem þeir hafa á móti veru sýrlenska hersins er að hann heldur hlífiskildi yfir Hizbollah-samtökunum og öðrum hreyfingum shííta-múslima, að sýrlenski herinn heldur ísraelska hernum í skefjum, og að vera sýrlenska hersins kemur í veg fyrir að kristnir fasistar í Líbanon geti gert Líbanon að leppríki Bandaríkjanna og Ísraels og hrakið líbanska múslima og palestínskt flóttafólk af höndum sér eða brotið á bak aftur.
c) Í Serbíu, Georgíu og nú síðast Úkraínu hafa, eftir fjöldamótmæli, náð völdum vel skipulagðar vestrænt-hallar stjórnmálahreyfingar sem eru fjármagnaðar frá Bandaríkjunum (og að einhverju leyti frá öðrum vesturveldum). Sams konar hreyfing hefur ítrekað reynt að ná völdum í Venezuela. Ég er ekki í nokkrum vafa um að þessi and-sýrlenska hreyfing hefur stuðning frá Bandaríkjunum (og Ísrael).

Þessar hreyfingar eiga það sameiginlegt að gefa sig út fyrir að vera lýðræðissinnaðar þjóðfrelsishreyfingar, en eru í raun ekki nema Bandaríkja- eða Vesturveldasinnaðar hreyfingar í valdastéttinni á hverjum stað. Þetta lítur voða fínt út: Þúsundir marsera á götum Kíev til að Jústsénkó geti orðið forseti. Til hvers? Til þess að snúa Úkraínu meira til vesturs, til þess að opna hana fyrir vestrænu heimsvaldafjármagni, til þess að tryggja Vesturveldunum strategískt betri stöðu í Úkraínu en þau áður höfðu og til þess að gera óvinunum erfitt fyrir. Þessar hreyfingar útmála sig sem framsæknar hreyfingar lýðræðis og þjóðfrelsis, en eru í raun afturhaldssamar hreyfingar auðvalds og landráða.
Skiptið Úkraínu út fyrir Líbanon, eða Serbíu eða Georgíu. Sama má segja um Venezuela, nema hvað stjórnin sem sótt er að þar er talsvert framsækin, öfugt við hinar.
Nú hefur líbanska þingið útnefnt nýjan forseta, sem er hallur undir Sýrlendinga. Hvað næst? Munu átök brjótast út að nýju? Ég býst við að það sé hætt við að það gerist, án þess svo sem að ég viti það. Altént verður mikið um að vera í Líbanon næstu vikurnar, og það lítur út fyrir að í augnablikinu sé það Sýrland sem er í sigti heimsvaldasinna.
~~~ ~~~ ~~~ ~~~
Stefán Pálsson bloggar líka um Líbanon. Lesið það.
~~~ ~~~ ~~~ ~~~
Í Moldavíu var Kommúnistaflokkurinn að vinna stóran sigur í þingkosningum. Evrópusambandið segir að kosningarnar hafi í aðalatriðum gengið heiðarlega fyrir sig, Bandaríkjastjórn segir að það hafi verið hnökrar á þeim. Nú er ég ekki kunnugur Kommúnistaflokki Moldavíu, og get satt að segja ekki sagt að ég vænti mikils af honum. Engu að síður verður fróðlegt að fylgjast með. Kannski að eitthvað jákvætt komi út úr þessu.

Hryðjuverkaforinginn Pútín og kónar hans fagna dauða Mashkadovs, leiðtoga chechenskra aðskilnaðarsinna. Hann fellur sem píslarvottur eins og forveri hans Dudayev. Hver verður næstur? Ætli Shamil Basayev taki við forystunni? Ég er hræddur um að Mashkadov sé ekki síðasti sonurinn sem Chechenía fær að gráta áður en hún vinnur frelsi.
~~~ ~~~ ~~~ ~~~
Ríkisstjórn Bretlands vinnur að því hörðum höndum að breyta landinu í lögregluríki. Í haust stóð ég á brautarpalli á King's Cross-St. Pancras lestarstöðinni og át samloku. Ég tók eftir því að skammt frá mér, í nokkurra metra hæð, var klasi af eftirlitsmyndavélum. Þær voru það margar að klasinn minnti á furuköngul í laginu. Ég fór að líta í kring um mig og telja hvað ég sæi margar myndavélar frá handahófskenndum sporunum sem ég stóð í. Ég sá 26 stykki. Það er best að það sé fylgst náið með okkur. Svo vondu kallarnir meiði okkur ekki. Grýla gæti tekið okkur. En hvað ef það eru í raun vondu kallarnir sem eru hinu megin við myndavélarnar? Hvað ef þeir eru að fylgjast með okkur svo þeir eigi auðveldara með að stjórna okkur?
Ég þoli ekki hvað borgaralegar bjána ríkisstjórnir á Vesturlöndum beita í sífellu í hæsta máta reaktífum, rangsælum aðferðum til að "leysa málin". Fyrir hverjum er verið að passa okkur? IRA? Al Qaeda? Hvers vegna skyldu þeir hafa áhuga á að gera okkur mein til að byrja með? Vegna þess að breska stjórnin kúgar Norður-Íra og stundar óvægna heimsvaldastefnu í Miðausturlöndum? Hvernig væri þá að bægja ógninni burt með því að hætta að búa hana til?
Hálfvitar!

Það er rétt að minna á vettvangsferð Hins íslenska tröllavinafélags, sem verður farin á laugardaginn. Þeir sem hafa áhuga á að koma með þurfa að láta vita ekki seinna en á morgun, 9. mars, í netfangið trollavinafelag@gmail.com.

Aslan Mashkadov er dauður. Fallinn, í bardaga við rússneska hermenn.

Að undanförnu hafa verið að birtast á ýmsum bloggum komment eignuð mér, og einnig komment á þessu bloggi eða hinu blogginu mínu, eignuð fólki sem ég veit ekki hvort hefur skrifað þau í alvörunni eða ekki. Ég held að ég nenni ekki að velta mér meira upp úr þessu. Ef einhver hefur ekkert betra að gera en dylgja um mig, þá býst ég við að hann geri það bara.

Í dag er Alþjóðlegur baráttudagur kvenna fyrir friði og jafnrétti og af því tilefni er opinn fundur kl.17 í Tjarnarsal Ráðhúss Reykjavíkur. Ég er hræddur um að ég komist ekki á þetta.
~~~ ~~~ ~~~ ~~~
Þessi könnun fór framhjá mér. 64% landsmanna óánægð með kvótakerfið og 65% vilja leggja það niður.
~~~ ~~~ ~~~ ~~~
Einhverjir húmoristar eru að setja komment á mínu nafni á kommentakerfi á blogg hjá öðru fólki. Svei mér fyndið.

Það er hægt að sjá á netinu viðtal Egils Helgasonar við Elías Davíðsson um 11. september, sem var í Silfri Egils á sunnudaginn var. Ég hvet fólk til að horfa á það...

Það er athyglisvert að sjá hvernig morðinu á Rafiq Hariri er snúið upp í reiði gegn Sýrlendingum. Það er vægast sagt ólíklegt að þeir hafi framið það. Þessi atburðarás virðist frekar hafa verið sett af stað af óvinum þeirra til þess að grafa undan stöðu Sýrlands. Líbönsku fasistarnir fljótir að snúa sér til Ísraela.
~~~ ~~~ ~~~ ~~~

GPS-tæki í alla bíla svo það verði auðveldara að fylgjast með okkur?
~~~ ~~~ ~~~ ~~~

Greinarnar á Popular Mechanics og Above Top Secret eru víst ekki eins pottþéttar og mér sýndist í fyrstu. Sú sem er á Popular Mechanics er meira að segja skrifuð af náfrænda ráðherra heimavarnarmála í Bandaríkjunum. Ég var, með öðrum orðum, kannski fullfljótur á mér.
~~~ ~~~ ~~~ ~~~

Biskup Íslands er ekki spar á eitrið í nýjustu predikun sinni. Lesið þetta óráðsíuhjal, 5. og 6. efnisgrein virðast henta best til þess að meiða og særa þá sem vilja hafa trúfrelsi á Íslandi.

Íslensk menning og Örn Arnarson

Íslensk menning kallast blogg sem haldið er úti af Erni Arnarsyni. Það virðist sem einhver húmoristi sé að kommentera hjá honum, copy/peista texta af blogginu mínu og skrifa svo fangamarkið mitt, V.V., undir. Skrítið. Skrítið að einhver skuli vera að nenna að leika mig í fíflagangi á annars manns bloggi. Þar við bætist að á mínu bloggi hafa verið að birtast dularfullar athugasemdir, undirritaðar í nafni þessa sama Arnar. Fyrst fangamark mitt og textar frá mér, saklausum manninum, birtast á hans bloggi, skyldi þá hans nafn og texti vera birt á sama hátt og án þess að hann sé með í ráðum? Ætli einhver húmoristi sé að gera at í okkur báðum? Já, þetta er svei mér skrítið.
Ef einhver kann skýringar á þessu eru þær vel þegnar.

Matti hefur svarað færslu minni frá því í gærkvöldi. Skoðið svar hans áður en lengra er haldið. Svo það komi fram, þá hef ég engan áhuga á hlutverki dogmatistans í svona umræðum. Matti skrifar „Ef menn vilja endilega trúa því að bandaríska leyniþjónustan standi á bak við hryðjuverkin 11. september nenni ég ekki að eyða endalausri orku í að sannfæra þá um annað.“ Ég skil það vel. Ég vil ekki trúa því að bandaríska leyniþjónustan standi á bak við árásirnar, enda snýst þetta mál ekki um trú í mínum huga. Margar efasemdaraddir hafa heyrst og ýmislegt í opinberu sögunni hefur hlotið harða gagnrýni. Maður hlýtur að taka tillit til þess sem er sagt og um leið til rakanna sem eru færð. Gild rök á ekki að þurfa að endurtaka ef allt er með felldu.
Matti skrifar:

Það eru nokkrar staðreyndir í þessu máli. Staðreyndir sem er búið að sanna yfir allan vafa. Þessar helstar.
* Fjórum farþegaþotum var rænt þann 11. september 2001.
* Tveimur var flogið á tvíburaturnana, einni á Pentagon og hin þriðja hrapaði eftir að farþegar höfðu reynt að ná völdum yfir henni.
* Saddam Hussein stóð ekki á bak við árásirnar.
Þeir sem neita þessu þrátt fyrir að hafa kynnt sér málið eru, að mínu hógværa mati, haldnir ranghugmyndum. Það er hægt að efast um ýmislegt í þessu máli, en svo eru ákveðin mörk. Þetta er komið langt út fyrir þau mörk.

Ég hef hingað til efast um að farþegaflugvél hafi verið flogið á Pentagon. Sá efi er hins vegar ekkert dogma fyrir mér, og ekki stendur á mér að kannast við góð mótrök þegar ég heyri þau. Matti vísar í ítarlega grein á AboveTopSecret.com. Þessi grein er nokkuð löng, en ég hvet fólk eindregið til að lesa hana. Í henni eru færð rök fyrir því að Boeing 757 hafi í raun lent á Pentagon eins og stjórnvöld segja, og margt hrakið af því sem efasemdamenn hafa haldið fram. Þetta er góð grein og að henni lesinni held ég að ég geti fallist á að farþegaflugvél hafi í raun flogið á Pentagon. Já, það eru ennþá sandkorn í tannhjólunum, en nei, ein og sér duga þau varla til að vísa aðalatriðunum á bug.

Enn skrifar Matti:

Stórkoslegar fullyrðingar krefjast stórkostlegra sannana. Það gildir einnig í þessu máli. Sannanirnar benda allar í eina átt, samsæriskenningarnar allt aðra.

Ég vil hér benda á eitt: Skýring Bandaríkjastjórnar á atburðum 11. september er líka samsæriskenning. Ef efasemdamenn hafa rangt fyrir sér um atriði á borð við hvort farþegaflugvél hafi flogið á Pentagon eða ekki, þá er vitanlega ekki þar með hrakið annað í kring um þetta. Auk þess eru fleiri álitamál en bara sjálfar árásirnar, en þau eru svo sem ekki til umræðu hér.

Matti skrifar:

Spurningin er kannski, hvað dugar til að sannfæra þá er aðhyllast samsæriskenningar um 11. september, að atburðarrásin hafi verið eins og opinbert er talið?

Ég get sagt hvað dugar til að sannfæra mig um annað - sannanir. Bara einhverjar helvítis sannanir. Ekki endurtekningar á bulli sem margoft hefur verið sýnt fram á að er rangt.

Ég tek heils hugar undir þetta: Þegar sýnt hefur verið fram á að eitthvað sé rangt, þá á vitanlega ekki að halda áfram að endurtaka það. Ekki ef menn eru í leit að sannleikanum. Gagnrýnin sannleiksleit græðir á öllum gildum rökum og sennilegum tilgátum, en reynir ekki að sýna fram á fyrirfram gefna niðurstöðu. Þeir sem neita að trúa öðru en því sem stendur í blöðum eru á jafnhálum ís og þeir sem tortryggja allt sem stendur í þeim.

„Róttæklingar gætu gert margt gáfulegra við tíma sinn“ segir Matti, frekar en að gleyma sér í tæknilegum atriðum varðandi 11. september. Ég tek undir það. Í mínum huga eru það heldur ekki tæknilegu atriðin sem skipta höfuðmáli. Ég get vel fallist á að farþegaflugvél hafi flogið á Pentagon en ekki Global Hawk, að eldflaug hafi ekki komið við sögu og ýmislegt annað. Reyndar er varla við öðru að búast. Þegar menn á annað borð fyllast tortryggni er í sjálfu sér ekki skrítið að þeir „komist að“ einhverju sem reynist ekki vera á rökum reist. Það er gott, þegar rangar fullyrðingar eru hraktar, því þá komast menn nær því að vita hið rétta. Þetta gildir um fullyrðingar, óháð því hvort þær eru settar fram af stjórnvöldum eða einhverjum öðrum.

Nú gefum við okkur að þetta sé satt og rétt:

* Fjórum farþegaþotum var rænt þann 11. september 2001.
* Tveimur var flogið á tvíburaturnana, einni á Pentagon og hin þriðja hrapaði eftir að farþegar höfðu reynt að ná völdum yfir henni.
* Saddam Hussein stóð ekki á bak við árásirnar.

Enn eru opnar spurningar á borð við þessar: Hver skipulagði þessi ódæðisverk? Hver framdi þau? Hver vanrækti skyldur sínar? Hvað gekk mönnum til? Hver hagnast? Hvernig verða grunsamleg viðskipti með hlutabréf í flugvélögunum skýrð? Hvernig verða grunsamlegar millifærslur milli CIA (USA), ISI (Pakistan) og al Qaeda skýrð? Hvernig tengist Mossad (Ísrael) atburðum þessa örlagaríka dags? Hvers vegna hafa bandarísk stjórnvöld gert rannsakendum erfitt fyrir? Hvers vegna voru rústir WTC hreinsaðar burt áður en tími gafst til að rannsaka þær gaumgæfilega?
Spurningarnar eru fleiri, en ég ætla ekki að fara nánar út í þær að sinni.

Bókamarkaður í Perlunni og tröllavinir

Ég fór í dag á bókamarkað í Perlunni og gerði góð kaup. Fór eftir það á stjórnarfund í Hinu íslenska tröllavinafélagi.

Hið íslenska tröllavinafélag er komið með heimasíðu sem að vísu er bara til bráðabirgða, en þó ágæt sem slík. Slóðin er www.trollavinafelag.blogdrive.com og eins og menn ættu að vita núna, er félagið einnig með netfang: trollavinafelag@gmail.com.

Önnur vettvangsferð Hins íslenska tröllavinafélags

verður farin laugardaginn 12. mars. Farið verður á slóðir Jóru tröllkonu milli Selfoss og sunnanverðs Þingvallavatns.

Jóra tröllkona var í upphafi mennsk stúlka úr Flóanum og var uppi á tólftu öld (sumir segja tíundu). Faðir hennar átti hest í hestaati, og fór hann halloka fyrir hinum hestinum. Jórunn trylltist þá, vatt sér inn í hringinn og reif læri undan hinum hestinum. Viðstaddir skelfdust, en Jórunn reif upp jarðfast bjarg, kastaði út í Ölfusá og stiklaði síðan yfir ána, þar sem síðan heitir Tröllkonuhlaup, einnig nefnt Jóruhlaup. Jórunn spretti úr spori uns hún kom upp í fjallið Hengil, sunnan Þingvallavatns, og þar lagðist hún út í helli og varð hin versta viðskiptis og mörgum að bana. Á endanum tókst manni einum að ráða henni bana.

Á þetta svæði er förinni heitið. Fyrst á Selfoss og svo eftir þjóðvegi 360, sem liggur upp á Mosfellsheiði. Jóruhlaup, Jórukleif, Jórusöðull, Jórutindur og aðrir staðir sem tengjast sögunni verða heimsóttir. Það verður lagt snemma í hann og hver og einn hefur með sér nesti. Eins og gefur að skilja vitum við ekki enn hvernig veðrið verður, en við fylgjumst með veðurfréttum og búum okkur vel. Góðir skór skipta miklu ef gengið er á Jórutind eða eitthvað upp í Hengilinn. Hlý föt, góðir skór, þurrir sokkar og nesti. Annað eftir þörfum hvers og eins.

Í síðustu ferð tókum við strætó, en um þjóðveg 360 gengur enginn strætó. Við þurfum því að vita með nokkrum fyrirvara hversu margir ætla með, svo við getum farið á farartæki við hæfi. Þeir sem ætla að koma með þurfa að tilkynna það eigi síðar en að morgni miðvikudags 9. mars.

Best er að fólk hafi samband við félagið: trollavinafelag@gmail.com og tilkynni þátttöku netleiðis. Fólk er velkomið þótt það sé ekki með í félaginu. Þátttökugjaldi verður stillt í hóf: Aðeins 900 kr. fyrir borgandi félagsmenn, 1100 fyrir aðra. Hægt verður að borga félagsgjald á staðnum (1500 kr.) og jafnvel ganga í félagið, þeir sem það vilja.
Fólk er hvatt til að láta sjá sig í þessari skemmtilegu ferð!

Í alvöru, látið vita tímanlega ef þið ætlið með, svo við verðum á nógu stóru farartæki til að rúma alla! 9. mars, ekki seinna!

Aðeins um ellefta september tvöþúsund og eitt

Í Silfri Egils á morgun, sunnudag, verður Elías Davíðsson meðal gesta og talar um 11. september 2001, og efasemdir um opinberar skýringar á atburðum þess örlagaríka dags.

Opinbera sagan um atburði dagsins, sem Bandaríkjastjórn hefur haldið fram og allir þekkja, hefur verið gagnrýnd af ýmsum. Menn hafa látið í ljósi margvíslegar efasemdir um réttmæti hennar, talið hana ýmist ófullnægjandi, ótrúverðuga eða beinlínis tortryggilega. Skiljanlega hefur efasemdamönnum stundum verið róðurinn þungur, og hafa margir orðið til þess að mótmæla þeim.

Ég vil ekki líta á umfjöllunina um 11. september eins og fótboltaleik, þar sem formælendur opinberu sögunnar og formælendur efasemdamanna eru eins og tvö lið og annað liðið hlýtur að vinna, hitt að tapa. Þvert á móti: Gagnkvæm gagnrýni, svo lengi sem hún er á málefnalegu, heiðarlegu og jarðbundnu nótunum, skilar okkur nær sannleikanum.
Matti Á. er einn þeirra sem hafa mótmælt efasemdamönnum. Um daginn bloggaði hann færslu um 11. september sem ég hvet fólk til að lesa áður en lengra er haldið. Matti vísar í skrif Elíasar Davíðssonar um 11. september, sem ég hvet fólk líka til að lesa. Auk þess er texti sem, að vísu, er talsvert lengri, en einnig mikilvægur að lesa, sem er grein á Popular Mechanics.

Efasemdamenn hafa tekið fyrir fjölda atriða sem þeim hafa þótt tortryggileg, haldið fram veikleikum í opinberu sögunni, bent á óeðlileg hagsmunatengsl, óeðlileg vinnubrögð, hvernig stjórnvöld hafa lagt stein í götu rannsakenda, hvernig ýmis tæknileg atriði eru vafasöm og hvernig áróðri hefur verið beitt til hins ítrasta.
Aðrir hafa tekið fyrir og hrakið ýmislegt sem haldið hefur verið fram af efasemdamönnum, og tekið annað fyrir án þess að geta hrakið það. Eftir stendur að sum gagnrýnin virðist hafa verið ástæðulaus og færst of mikið í fang, meðan önnur gagnrýni er óhrakin og tortryggnin virðist vera á rökum reist.

Ég ætla aðeins að tjá mig um það sem Matti skrifaði síðast um þetta. Matti segir Elías „fabúlera“ og að skrif hans um 11. september séu „margtuggið kjaftæði“ og ég verð að segja að mér finnst málflutningur Matta um þetta mál gjarnan líta út fyrir að hann sé ákveðinn í að svona sé þetta, opinbera skýringin sé, a.m.k. í aðalatriðum, rétt, og að menn fabúleri og tyggi upp kjaftæði þegar þeir tjá efasemdir sínar. Svona kemur þetta mér fyrir sjónir og vona að mér fyrirgefist að segja það umbúðalaust.

Ég skrifaði komment á færslu Matta. Ég skrifaði:

Það er margt gruggugt við 11. september. Þegar menn fara að sökkva sér í atburði þess örlagaríka dags er hins vegar auðvelt að gleyma sér og sjá merki um eitthvað óeðlilegt þar sem engin merki eru. Gagnrýnin hugsun þarf að virka í báðar áttir: Þótt margt sé gruggugt varðandi 11. september er ekki þar með sagt að það sé allt gruggugt við hann, eða að allar hugmyndir sem efasemdamenn hafa séu sannar. Mál efasemdamanna hafa verið reifuð ítarlega, og þótt ekki sé allt á rökum reist eru samt nógu margar stoðir eftir undir málinu til að það standi. Þessi grein á Popular Mechanics er að sönnu vel þess virði að lesa hana, og í henni kemur ýmislegt fram sem menn hljóta að leggja hlustir við, en engu að síður hrekur hún alls ekki allan málflutning efasemdamanna.

Matti svaraði mér:

en engu að síður hrekur hún alls ekki allan málflutning efasemdamanna.

Ekkert mun hrekja allan málflutning efasemdarmanna í þessu máli.
Það er kjarni málsins.

...og ég svaraði aftur:

Kjarni málsins er sá að það er í alvörunni ýmislegt í kring um 11. september sem er tortryggilegt, svo ekki sé meira sagt. Það er full ástæða til að beina ljóskösturunum gagnrýninnar að því sem fór fram þann dag. Full ástæða til þess. Ef það eru alvarlegir brestir í opinberu sögunni, þá ber okkur að berja í brestina og reyna að komast nær sannleikanum.

Fyrir nokkrum árum skrifaði Matti aðra færslu, um árásina á Pentagon, sem hann vísar í sjálfur. Vegna þess að hann tekur fyrir nokkra punkta ætla ég að taka sömu punkta fyrir:

Fullyrðingar um að ekkert brak af vélinni sé á staðnum eru rangar.

Ég er ekki kunnugur fullyrðingum um að ekkert brak af flugvél hafi verið á svæðinu. Hins vegar er brakið sem sést á myndinni ekki endilega brak úr farþegaflugvél. Það er þarna brak úr fljúgandi tæki sem fór í Pentagon, en er þar með sagt að þar sé um að ræða farþegaflugvél? Nei. Nei, og reyndar mun þetta brak á myndinni ekki passa við farþegaflugvélina sem á að hafa flogið á Pentagon. Það samsvarar ekki neinu stykki af henni. Þetta stykki eykur m.ö.o. ekki trúverðugleika farþegaflugvélar-sögunnar, heldur dregur úr honum.
Matti skrifar:

Vitni. Tugir ef ekki hundruðir manna urðu vitni að því þegar vélin flaug inn í bygginguna.

Já. En athugum eitt: Allir nágrannar Reykjavíkuflugvallar kannast við gnýinn þegar þotur fljúga yfir miðbæinn. Þessi gnýr fer ekki framhjá neinum þótt hann sé nokkur hundruð metra í burtu frá sjálfri vélinni. Það fer engum sögum af þotugný í meintri farþegaflugvél, og það þótt hún hafi næstumþví sleikt bílþökin í (með ólíkindum kröppu) aðfluginu að Pentagon. Að auki verður að segjast um sjónarvottana, að (a) þegar flugvél á nokkur hundruð kílómetra hraða flýgur framhjá manni í lítilli fjarlægð þá sér maður henni bregða fyrir, ekki meir og að (b) það er vel þekkt í sálfræði, hvernig minni fólks getur brenglast af því sem það býst við að það eigi að muna, og af áhrifum af þeim sem yfirheyra það.

Matti skrifar:

Af hverju sést ekkert brak af flugvélinni á vefnum hér fyrir ofan? Vegna þess að myndirnar eru teknar þar sem ekkert brak sést og vegna þess að þegar flugvél flýgur í jörðina verður yfirleitt ekkert mikið af auðþekkjanlegu braki eftir. Gera má svo ráð fyrir að töluvert af brakinu hafi lent í eldhafinu. Þrátt fyrir allt þetta er fullyrðingin um að ekkert brak hafi verið á vettvangi röng.

Vegna þess að myndirnar eru teknar þar sem ekkert brak sést? Augljóslega sést ekki brak á mynd sem er tekin þar sem ekkert brak sést. Þessi mynd segir því lítið. Það hefði verið nær að koma með mynd þar sem brak sæist. Eini gallinn við þær er að þær frekar fáu myndir sem eru til sýna ekki brak úr farþegaflugvél! Þegar farþegaflugvél kemur fljúgandi og brotlendir, þá gufar hún ekki upp. Það verður kannski lítið eftir af auðþekkjanlegu braki þegar hún springur í háloftunum, en þegar hún lendir í heilu lagi framan á húsi, þá er það barnalegt að halda að hún hverfi bara. Það ætti ekki að gera brakinu mikið til þótt það hafi lent í eldhafinu, enda er bræðslumark á áli mun hærra en svo að það bráðni í brennandi flugvélabensíni eða öðru kolefniseldsneyti.
Þess má auk þess geta, að eldhafið leit ekki út eins og við mætti búast af eldkúlu af brennandi kolefniseldsneyti, heldur var það áþekkara sprengingu, sem hagar sér mikið öðruvísi. Fá hús í veröldinni eru jafnvel vöktuð með myndavélum og Pentagon. Samt sögðu yfirvöld í fyrstu að engar myndir hefðu náðst af flugvélinni. Það var seint og síðarmeir dregið til baka, og nokkrar myndir birtar – en á engri þeirra sást vélin sjálf! Það er engu líkara en að þær hafi verið valdar sérstaklega úr til þess að ekki sæist í það sem flaug á Pentagon!

flugvélin flaug ekki beint inn í bygginguna, heldur lenti á stéttinni rétt fyrir framan hana.

Fyrir framan staðinn sem flogið var á er ekki stétt heldur grasflöt. Það sést á grasflöt þegar farþegaflugvél plægir sig ofan í hana. Það hafði engin farþegaflugvél plægt sig ofan í þessa grasflöt.

Ég veit ekki hvað Matti nennir að elta ólar um atburði hins 11. september 2001, en fyrst hann vekur máls á þessu sé ég mig knúinn til að svara honum eftir minni bestu vitund. Ég skil vel að mönnum finnist málflutningur efasemdamanna pirrandi, enda er hann (málflutningurinn) oft óvæginn, oft hefur maður heyrt einhverju haldið fram, þar sem of mikið er færst í fang, en síðast en ekki síst er hreint og beint óþægilegt til þess að hugsa að stjórnvöld séu að hylma yfir með glæpamönnum af verstu sort, eins og voru að verki 11. september. Það er fjarska eðlilegt að bregðast við eins og Matti og aðrir gera, og mótmæla efasemdamönnunum. Gagnrýni sem er á rökum reist er vitanlega af hinu góða, og þannig hefur líka verið hrakið ýmislegt sem haldið hefur verið fram um 11. september. Ýmislegt, en margt stendur óhrakið.

Þá, sem eru forvitnir um málflutning efasemdamanna, skora ég á að koma í Snarrót í Garðastræti næst þegar myndin Painful Deceptions er sýnd. Í henni er tekið fyrir margt varðandi 11. september, og sýnt fram á að það væri með hreinustu ólíkindum að það gæti staðist í alvörunni. Mörg atriði. Já, eftir því sem ég best veit hafa sum þeirra verið hrakin. Sum. Önnur hafa verið gagnrýnd án þess að vera hrakin með óyggjandi hætti, og önnur hafa hreint ekki verið hrakin. Ég skora á þá sem eru forvitnir um þetta að koma í Snarrót næst þegar Painful Deceptions er sýnd. Ég mun tilkynna það hér á bloggi mínu (kannski víðar) um leið og ég veit dagsetningu.

Í kvöld býður Vantrú.net í bíó:

Fyrirlestra- og kvikmyndahátíð Vantrúar

Í kvöld klukkan 21 sýnum við tvo fyrirlestra í húsnæði Snarrótar að Garðastræti 2. Þetta eru The Search for Planet X með Phil Plait svo talar Dan Garvin um Vísundarkirkjuna í fyrirlestri sem nefnist Adventures in Scientology.
Aðgangur er öllum heimill og ókeypis. Búast má við umræðum í kjölfarið.

Þess vil ég einnig geta, að á undan sýningunni, eða klukkan 19:00, er fjáröflunarkvöldverður í Snarrót. Aðeins skitinn þúsundkall fyrir góðan mat, góðan málstað og góðan félagsskap. Upplagt að fá sér vel að éta og horfa svo á athyglisverða fyrirlestra Plaits og Garvins á eftir!
~~~ ~~~ ~~~ ~~~
Eins og reikna mátti með er mikill þrýstingur á Sýrlendinga eftir morðið á Hariri um daginn. Líbanska stjórnarandstaðan biðlar til Ísraela og Abdullah krónprins Saúdi-Arabíu þrýstir á Sýrlendinga líka. Hver hagnast? Ísraelar hagnast á því að Sýrlendingar séu veiktir. Sama má reyndar segja um fleiri. Bandaríkjamenn bíða eftir hálmstrái til að pikka fæt við Sýrland. Saúdi-Arabar eru í liði með Bandaríkjastjórn og þar með Ísraelum.
~~~ ~~~ ~~~ ~~~
Öryggi fremur en lýðræði. Fólk sem berst gegn reykingum er í sjálfu sér að berjast fyrir góðan málstað. Ekki dettur mér í hug, í alvöru talað, að bera blak af reykingum. Það gefur mér samt ekki heimild til að banna öðrum að stunda þær. Hvaða rétt hefur maður til að skipta sér af því sem kemur manni ekki við?

Evrópusambandið og Bandaríkin deila vegna vopnasölubanns gegn Kína. Ef á einhverju landi ætti að vera vopnasölubann, þá eru það Bandaríkin.

Annað tölublað Tröllafrétta er komið út og var borið út í dag!

Davíð og Halldór tönnlast á því að auðvitað séu Íslendingar engir alvöru þátttakendur í Íraksstríðinu, en hvað er þá þetta? Íslenska ríkið splæsir stórfelldum hergagnaflutningum til Íraks, á kostnað þjóðarinnar. Fyrst íslenska þjóðin á að borga brúsann af þessu, þá er nú það minnsta sem hægt er að fara fram á, að hún hafi eitthvað um þetta að segja. "Öryggi" í Írak, talar Davíð um. Eins og Írak verði öruggara með því að fá fleiri byssur!
~~~ ~~~ ~~~ ~~~
Talandi um skammsýna íslenska stjórnmálamenn, hvernig dettur þeim í hug að selja grunnnetið með Símanum? Eða bara að selja Símann til að byrja með? Eða Landsvirkjun? Mér finnst með ólíkindum að þessum körlum haldist uppi að selja vinum sínum eignir þjóðarinnar fyrir spottprís. Alveg með ólíkindum!
~~~ ~~~ ~~~ ~~~
Það er grein eftir bróður minn á Vinstri.is.
~~~ ~~~ ~~~ ~~~
Það er verið að þróa huliðsskykkju. Ég skil hvers vegna hergagnaframleiðendur og herforingjar sleikja út um.
~~~ ~~~ ~~~ ~~~
Al-Hakim erkiklerkur í Írak, sem leiðir shííta-listann sem vann kosningarnar nú í janúar, er um þessar mundir einn þyngst metandi maðurinn í íröskum stjórnmálum. Erkiklerkurinn vill að lög hins nýja Íraks verði í samræmi við sharía, lög íslams:

There are three points: first, that there must be a respect for the Islamic identity. Second, that Islam is the official religion of the state. Third, that there should not be any law that violates Islam.

Afleit hugmynd. Ríki eiga að vera sekúlar. Afhelguð, veraldleg. Trúarbrögð og stjórnmál eru hvort öðru óviðkomandi. Trúfrelsi fyrir alla, en trú er einkamál.
~~~ ~~~ ~~~ ~~~
Jose-Maria Sison er hinn umdeildi formaður maóistaflokks Filippseyja (CPP) og býr í útlegð í Hollandi. Ramsey Clark hitti hann að máli og eftir tveggja tíma fund styður Clark að CPP verði tekinn af lista yfir hryðjuverkasamtök.
~~~ ~~~ ~~~ ~~~
Um daginn var stungið upp á söngvaranum Bono úr U2 sem næsta bankastjóra monstersins World Bank. Nú hefur önnur tilnefning borist: Paul Wolfowitz.
~~~ ~~~ ~~~ ~~~
Gaddafi hittir naglann á höfuðið: Öryggisráðið er ólýðræðislegt. Svo ekki sé meira sagt.
~~~ ~~~ ~~~ ~~~
Ósoneyðing yfir Íslandi.

Fór áðan ásamt Örnu í Borgarholtsskóla, þar sem eru einhvers konar þemadagar. Við töluðum um Palestínu í um einn og hálfan tíma og ég held að við höfum sloppið ágætlega frá því.
~~~ ~~~ ~~~ ~~~
Hinn svokallaði kvartett tjáir sig um sjálfsmorðsárásina í Tel Aviv. Þessi kvartett er ljóti skrípaleikurinn. Sameinuðu þjóðirnar, Evrópusambandið, Bandaríkin og Rússland. Ákvarðanir eru teknar einróma, sem þýðir að hver þessara fjögurra aðila hefur neitunarvald. Það þýðir að í gegn um Bandaríkin hefur Ísrael neitunarvald í öllu sem kvartettinn gerir. Það hafa Palestínumenn ekki.
Condoleezza Rice segist hafa "óyggjandi sannanir" fyrir því að Islamic Jihad í Sýrlandi hafi skipulagt árásina. Ég blæs á tal Bush-stjórnarinnar um "óyggjandi sannanir". Varla hafa menn gleymt þessum "óyggjandi sönnunum" sem þeir þóttust hafa fyrir gereyðingarvopnunum í Írak, sem engin voru. Þær sannanir áttu að vera óyggjandi. Rumsfeld sagði að "það væri vitað hvar þau væru: Nokkuð fyrir norðan, sunnan, austan og vestan Baghdad" og gott ef heiðursmaður Ásgrímsson át það ekki upp eftir honum.
~~~ ~~~ ~~~ ~~~
Hjúkk, þarna skall hurð nærri hælum. Gott að þetta ómenni komst undir manna hendur áður en skaði hlaust af. Verst að hann er of ungur til að það megi drepa hann, öðrum til viðvörunar.
~~~ ~~~ ~~~ ~~~
15 ára breskri skólastúlku leyft að klæðast eins og teppahrúga í skólanum. Íslamistar fagna. Ég hristi hausinn.
~~~ ~~~ ~~~ ~~~
Ég bendi á þessa grein á Vantrú þar sem tekin eru fyrir ummæli Egils Helgasonar um hvað kristni séu miklu betri trúarbrögð en íslam, hindúismi og fleiri. Greinin er góð, og umræðurnar eftir hana eru áhugaverðar líka. Um þær ætla ég ekki að tjá mig, en vil segja eitt: Ef við höfum það betra á Vesturlöndum en múslimar í arabalöndum eða hindúar í Indlandi, þá er það ekki því að þakka, að við séum kristin. Kirkjan er afturhaldsafl og framfarir undanfarinnar aldar hafa meira að gera með að við séum lítið kristin en mikið. Framfarir, þekking og menntun eru vogarstangirnar sem hafa lyft okkur flestum upp úr mestu for trúarinnar, þótt margir dingli ennþá tánum (og sumir andlitinu) ofan í hana. Framfarir og trú hafa öfuga fylgni.
~~~ ~~~ ~~~ ~~~
Þetta fyllir mig óhug. CIA á og rekur "pyntingaþotu" til að ræna andstæðingum sínum erlendis, taka þá úr landi og pynta þá síðan. Djöfulsins ógeð! Hugsa sér hræsnina, þegar þeir tala af skinhelgi um virðingu fyrir mannréttindum og mannslífum og lýðræði og eitthvað. Blaður! Blaður allt saman og ekkert annað! Eða eins og einhver orðaði það, "Much law, but little justice."

Að hugsa sér að það þurfi úrskurð hæstaréttar til þess að fá það á hreint að það sé rangt að taka börn af lífi. Að hugsa sér!
~~~ ~~~ ~~~ ~~~

Á laugardaginn var tjáði ég mig um Saraya Iraqna, írösku dauðasveitina sem í bókstaflegri merkingu býður morð fjár fyrir höfuðleður andspyrnumanna. Ætli landráðamennirnir sem hér er fjallað um séu þeir sömu?

Ég fer á eftir með 2. tölublað Tröllafrétta í póst, svo það veðrur að öllum líkindum borið út á morgun. Hið íslenska tröllavinafélag er annars að koma sér upp heimasíðu og félögum fer ört fjölgandi. 12. mars nk. verður farin vettvangsferð á slóðir Jóru tröllkonu í Ölfusi og við sunnanvert Þingvallavatn. Þeir sem hafa áhuga á að koma með mega hafa samband: trollavinafelag@gmail.com og skrá sig í ferðina. Það þarf að skrá sig eigi síðar en 9. mars svo að við verðum örugglega með nógu stórt farartæki fyrir mannskapinn.

Eftir að maóistar í Nepal afléttu farbanni á Kathmandu, er umferð þangað hafin aftur. Fyrrum forsætisráðherra sem nú situr í stofufangelsi gaf út yfirlýsingu þar sem hann fordæmdi aðfarir Gyanendra konungs fyrr í mánuðinum. (Sjá hér.)
~~~ ~~~ ~~~ ~~~
Palestína: Vopnahlé? Hvaða vopnahlé?
~~~ ~~~ ~~~ ~~~
Verður Sharon myrtur?

Í blaðinu í dag var mynd sem fyllti mig hryllingi, tekin á götunni í Írak, þar sem sjálfsmorðsárás drap a.m.k. 125 manns í gær. Blóðpollurinn var tugir fermetra og a.m.k. ökkladjúpur. Þvílík árás. Enn spyr maður sig, hver var að verki? Á yfirborðinu lítur út fyrir að öfgasinnaðir súnnítar hafi staðið að þessu. Hver veit, það getur alveg verið. Hver hagnast? Bandaríska hernámsliðið hagnast á innbyrðis klofningi Íraka og þetta eykur mjög á hann. Hver sem framdi verknaðinn var með því að vinna Bandaríkjastjórn gagn.

Vantrú: Röð sýninga í mars

Nú í mars mun Vantrú.net standa fyrir röð föstudagssýninga í Snarrót (sem, ef það hefur farið fram hjá einhverjum, er félags- og þjónustumiðstöð grasrótarhreyfinga í Garðastræti 2). Sjáið heimasíðu Snarrótar til að sjá dagskrána.

"Enn árás í Ísrael" segir RÚV og lýsir síðan árás skæruliða á öryggisverði í ólöglegri landtökubyggð á herteknum Vesturbakkanum. Þetta er ekki árás í Ísrael, þetta er árás í Palestínu!
~~~ ~~~ ~~~ ~~~
Líbanska stjórnarandstaðan krefst brottfarar Sýrlendinga eins og sjá mátti fyrir með morðinu á Hariri. Sýrlendingar hefðu varla verið svo heimskir að myrða hann (án þess að hafa neitt sjáanlegt upp úr því sjálfir) til þess eins að píska upp almenn mótmæli gegn hernámi þeirra. Morðið á Hariri kemur sér illa fyrir Sýrlendinga eins og hverjum manni var ljóst strax í upphafi. Það sem kemur sér illa fyrir Sýrlendinga kemur sér vel fyrir Ísrael og Bandaríkin. Cui bono? Hver hagnast?

Charles Featherstone skrifar um markaðslausnir á Peak Oil. Dæmigerður málflutningur manns sem trúir því að markaðslögmál geti leyst jarðfræðileg vandamál. Ódýr olía er af skornum skammti, þess er ekki langt að bíða að hún verði á þrotum. Olíuþurrð blasir við okkur. Afkastageta nútíma iðnaðar byggir næstum því eingöngu á olíu, og þar með sjálft efnahagskerfið. Eina leiðin til að draga úr skellinum er að minnka eftirspurn eftir olíu eins mikið og mögulegt er, eins hratt og mögulegt er. Þegar olía er orðin of dýr fyrir almenning, þá kann að vera of seint að bregðast við. Eftir því sem eftirspurnin eykst hækkar bara verðið. Framboðið mun ekki aukast mikið úr þessu.
Það getur verið að við séum komin yfir þröskuldinn nú þegar. Það getur verið að Ghawar, stærsta olíulindin í Sádi-Arabíu, hafi verið í hámarki svo snemma sem vorið 2003. Eftirspurnin eykst, framboðið ekki. Í fyllingu tímans þverr framboðið. 5 ár? 15 ár? Varla meira en það. Gætu verið 2 ár þess vegna. Vegna þess hvað efnahagskerfi heimsins er gírað inn á fullkomlega hugsunarlaust bruðl með olíu, þá er mannkynið ánetjað henni. Ekki eins og heróíni. Frekar eins og vatni. Eða mat. Olíuknúnar vélar gera okkur kleift að framfleyta meira en 6 milljörðum manna. Ef þeirra nyti ekki við væri það hægara sagt en gert.
Mannkynið mun laga sig að breyttum aðstæðum. Ef aðstæðurnar breytast á þann veg að fæðuframboð minnkar mjög mikið og mjög hratt, þá lagar mannkynið sig að breytingunni með því að fækka munnunum sem þarf að metta. Mjög mikið. Mjög hratt.
Sú aðgerð, að gíra efnahagskerfi heimsins inn á afköst án olíu, er ekkert sem menn gera á seinustu stundu. Ekki er ráð nema í tíma sé tekið. Ef allt gengur á besta hátt er það samt margra ára verk að breyta þessu. Það er enginn hægðarleikur að stíga á hemlana í þessari eimreið. Lesið Life After the Oil Crash. Þið sjáið ekki eftir því.

Mér finnst utanríkisráðherra vera eins og rati og sjálfum sér líkur þegar hann efnir til ráðstefnu um þau "tækifæri" sem Íslendingum gefast þegar loftslag á jörðinni fer hlýnandi. Að sjá þennan mann halda sínu striki, neitandi að viðurkenna bersjáanlega hættu þótt hún sé skorin út í pappa fyrir hann, finnst mér ekki vera til marks um stefnufestu heldur tregðu, þrjósku og hroka.
Í sjálfu sér má vel segja að það opnist einskonar tækifæri fyrir Íslendinga þegar hafís minnkar og norðaustur-leiðin verður betur skipafær. Fátt er svo með öllu illt að ekki boði nokkuð gott. Hlýnandi loftslag á jörðinni, mengun og öfgafyllra veðurfar eru meðal áþreifanlegra vandamála sem við höfum býsna vel rökstuddan grun um að séu að verulegu leyti af manna völdum. Við vitum að þetta er byrjað. Hitinn fer hækkandi, og við vitum ekki hversu mikið hann hækkar né hvernig þetta fer. Ef maður krukkar í úrverk án þess að hafa vit á því má maður teljast heppinn ef það gengur áfram. Sama má segja um vistkerfi jarðarinnar. Við erum að krukka í það og það er enginn "stopp"-takki. Það er óhugnanlegt að sjá hvernig Davíð Oddsson virðist ekki vilja átta sig á þessu.
~~~ ~~~ ~~~ ~~~

Saraya Iraqna heita nýstofnuð vígasamtök í Írak. Þau samtök eru ólík öðrum vopnuðum hópum að því leytinu til að þau styðja hernámið. Í síðasta mánuði spurðist út að Pentagon væri að íhuga að heimfæra upp á Írak dauðasveitir af sama tagi og Bandaríkjastjórn hefur starfrækt í Mið- og Suður-Ameríku. Ekki leið á löngu þar til Saraya Iraqna skaut upp kollinum og byrjaði að setja fé (bandaríska dollara) til höfuðs uppreisnarmönnum. Allt að 50.000 dollarar fyrir höfuðleðrið, var sagt í íraska dagblaðinu Al Ittihad. Haft var eftir þeim að þeir ætluðu sér ekki að vera vandfýsnir. Gefa bara út skotleyfi á alla sem eru álitnir óvinir.

Á deiglunni er stungið upp á því, að opnað verði fyrir þann möguleika að vera skráður í fleiri en eitt trúfélag. Því ekki það? Ég sé ekki hvers vegna trúfélög ættu ekki að hafa sömu réttarstöðu og önnur frjáls félagasamtök. Er skráning í þau ekki bara nokkuð sem þau eiga sjálf við félaga sína?
~~~ ~~~ ~~~

Ísraelar heimila verulega útþenslu landtökubyggða á Vesturbakkanum.
~~~ ~~~ ~~~

Athyglisverð greinargerð um "Bush-kenninguna".
~~~ ~~~ ~~~

Jónína Guðmundsdóttir, skólastjóri Holtaskóla, ætti að mínu mati að snúa sér að öðru en skólastjórn. Í þessari frétt segir hún um kristniboðið í skólanum: "Við munum ekki hætta nema okkur verði skipað að gera svo og ég skil ekki með hvaða rökum ætti að gera það."
Í alvöru talað, manneskja sem skilur ekki rökin fyrir því að halda trúboði utan við grunnskóla, og skilur ekki muninn á trúboði og færðslu um trú, er á rangri hillu í lífinu ef hún vinnur sem skólastjóri.
~~~ ~~~ ~~~

Þetta hugsa ég að ég kíki á:

Eigum við erindi í öryggisráð Sameinuðu þjóðanna?
Samtök um vestræna samvinnu (SVS) og Varðberg, félag ungs áhugafólks um vestræna samvinnu, standa fyrir opnum fundi um þá stefnu stjórnvalda að Ísland taki sæti í öryggisráði SÞ árið 2007 þ.e.a.s. ef við hljótum fylgi til þess. Fundurinn verður haldinn þriðjudaginn 1. mars 2005 kl. 17:00 í Skála á II. hæð Hótels Sögu. Umræðuefnið er hvort Íslendingar eigi erindi í öryggisráðið, en það er spurning sem brennur á þjóðinni um þessar mundir.

Meðal spurninga, sem velt verður upp á fundinum eru: Getur smáþjóð eins og Ísland haft hlutverki að gegna innan öryggisráðs SÞ? Eigum við að taka þátt í að greiða atkvæði í öryggisráðinu um óvinsælar hernaðaraðgerðir SÞ í ríkjum sem ógna heimsfriði? Getur vopnlaus og friðsæl þjóð eins og Ísland leyft sér að forðast að taka örlagaríkar ákvarðanir í flóknum deilum í fjarlægum löndum eða heimsálfum? Er ávinningurinn þess virði? Hvað fengjum við jákvætt út úr setu okkar í öryggisráðinu?

...
Framsögumenn:
· Einar Oddur Kristjánsson, þingmaður Sjálfstæðisflokksins.
· Jónína Bjartmarz, þingmaður Framsóknarflokksins.
· Steingrímur J. Sigfússon, þingmaður og formaður Vinstri grænna.

Trúboðsskandallinn heldur áfram. Siðmennt hvetur menntmálayfirvöld til að sjá til þess að trúboði verði hætt strax. Vil líka benda á þetta.

Þeim, sem vilja eyða peningunum sínum í rusl, vil ég benda á að kaupa sér svona græju.

Sýrlendingar segjast ætla að verða samstarfsfúsir við Líbani og draga her út úr Líbanon og hjálpa við rannsóknina á morðinu á Hariri um daginn. Í Fréttablaðinu í gær var stórgóð grein um Sýrland eftir Jón Orm Halldórson.

Ný ríkisstjórn samþykkt í Palestínu. Ég ætla að leyfa mér að vera bjartsýnn á að það takist að koma upp vísi að borgaralegu ríki í Palestínu. Frjálst, fullvalda réttarríki er ekki á næsta leiti, en vísir að borgaralegu ríki gæti verið það. Það væri skömminni skárra en það sem nú er, en ennþá mun þurfa gríðarlegar breytingar. Það er t.d. tómt mál að tala um frið ef ekkert er réttlætið, og hvar er réttlætið meðan landtakan er í algleymingi og múrinn rænir risastórum skákum af Vesturbakkanum? Áætlunin um að leggja niður landtökubyggðir á Gaza er réttara sagt áætlunin um að styrkja landtökubyggðir á Vesturbakkanum í sessi!

Allir muna eftir óhugnaðinum þegar Fallujah-borg í Írak var lögð í eyði og íbúarnir brytjaðir niður með stórvirkum vinnuvélum. Núna stendur til að endurtaka leikinn í súnnítaborginni Ramadi, til að hefna fyrir árásir sem eru eignaðar meintum hópi manna sem sagt er að meintur Jórdani sé í forsvari fyrir. Það kæmi mér reyndar ekki á óvart þótt þessar árásir væru framdar að undirlagi vestrænna leyniþjónusta; spila enda beint upp í hendurnar á hagsmunum Bandóðríkjahers.

Saklausum börnum spillt í skólanum

Ég er alveg bit yfir þessari frétt! Jónína Guðmundsdóttir, skólastjóri í Holtaskóla, sér ekkert athugavert við að boða börnum trú í skólanum, innræta þeim ranghugmynd, menga huga þeirra áður en þau koma sér upp gagnrýninni hugsun til að taka afstöðu til trúarbragða. Hvernig ætli henni þætti að hefja skóladaginn á íslamskri bæn?
Úff, mig sundlar beinlínis af því að sjá þessum krökkum spillt svona. Ef skólastjórinn Jónína sér ekki trúboðið í þessu og skilur ekki hvað er að því, þá hefur hún ekki burði til að gegna þeirri ábyrgðarstöðu að vera skólastjóri. Annars vísa ég í grein um þetta á Vantrú og tek undir með Matta Á. og Óla Gneista.

Ég ætla að horfa á Kastljósið í kvöld. Þar verður rætt um trúboð í grunnskólum og mun Sigurður Hólm Gunnarsson mæla gegn því. Ég þarf að taka fram eina athugasemd varðandi mín eigin ummæli í gær, um Sigurð og hans málflutning. Hann segir að kristið trúboð eigi ekki heima í fjölmenningarsamfélagi. Ég er í sjálfu sér sammála því, þótt mér finnist hugmyndin um "fjölmenningarsamfélag" asnaleg. Ég lít einfaldlega svo á að kristið (eða annað) trúboð eigi einfaldlega ekki að vera í verkahring hins opinbera. Alls ekki. Aldrei nokkurn tímann. Hreint ekki. Nixen bixen. Foreldrar og söfnuðir geta vel séð um það sjálfir ef þeim finnst það skipta máli. Ríkisvaldið á að vera algjörlega sekúlar.
~~~ ~~~ ~~~ ~~~

Steingrímur J. Sigfússon stingur upp á að stjórnarskrá Íslands kveði á um að það verði friðlýst fyrir kjarnorkuvopnum. Heyr heyr, segi ég!
~~~ ~~~ ~~~ ~~~

Eftir viku frost er Vantrú komin á kreik aftur. Því ber að fagna!
~~~ ~~~ ~~~ ~~~

Eftir mánaðar þögn ræskir Gagnauga sig aftur og er komið með glæsilegt nýtt útlit. Það er nú flott hjá þeim, en ég vona að það komi fleiri greinar. Ég hef meiri áhuga á innihaldinu en útlitinu. Tékkið annars á heimildamyndahátíð Gagnauga sem stendur yfir í Snarrót um þessar mundir. Ýmislegt áhugavert þar á ferð. Talandi um Gagnauga, þá getur hér að líta athyglisverða úttekt á því sem efasemdarmenn um 11. september halda fram, þar sem sett eru fram mótrök. Mér þætti fróðlegt að sjá þeim svarað.
~~~ ~~~ ~~~ ~~~

Þrítugasti hver jarðarbúi er þrælkað barn, skv. þessari frétt. Þrítugasti hver. Það er hægt að skrapa saman milljörðum fyrir stríðstólum, en til að leysa barnaánauð, hungur eða drepsóttir? Sorrí, ekki til neinir peningar.
~~~ ~~~ ~~~ ~~~

Ísraelar sleppa palestínskum föngum sem flestir voru næstum búnir að afplána hvort sem er. Í fréttinni segir:

Ísraelsstjórna sleppir föngunum til að styrkja Mahmoud Abbas, forseta Palestínumanna, í sessi og auka líkur á friðarviðræðum.
...
Þetta er samkvæmt vopnahléssamkomulagi Abbas og Sharons, forsætisráðherra Ísraels, fyrr í mánuðinum sem á að binda enda á uppreisn Palestínumanna sem hefur staðið í í fjögur ár. 8.000 Palestínumenn eru í ísraelskum fangelsum og fangabúðum margir án þess nokkru sinni að hafa verið ákærðir eða dæmdir.

Abbas er mikið í mun að friðmælast við Ísraela. Í viðtali við þýska vikuritið Der Spiegel segist hann reiðubúinn að semja um eina af helstu kröfum Palestínumanna fyrr og síðar, rétt palestínskra flóttamanna til að snúa heim. Miljónir Palestínumanna voru hraktir frá heimkynnum sínum þegar Ísraelsríki var stofnað 1948, margir búa enn í flóttamannabúðum.

Sharon reynir að styrkja Abbas í sessi. Kallið mig svartsýnan, en mér þykir það satt að segja ills viti. Flestum þessara fanga ætti að sleppa tafarlaust. Styrkja í sessi? Hvers vegna ekki að leyfa bara palestínsku þjóðinni að lifa í friði?

Vinnandi Palestínumaður er yfirleitt fyrirvinna stórrar fjölskyldu. Fyrir hvern af þessum 8000, sem margir eða flestir sitja inni saklausir, er fjölskylda sem er ekki bara hnuggin heldur svöng.

Ef Abbas segir að til greina komi að "semja" um rétt flóttamanna til að snúa heim, þá er hann að gera alvarleg mistök. Það er óásættanleg niðurstaða að flóttamenn séu sviptir réttinum til að snúa heim. Fyrir utan að Abbas getur það ekki einu sinni. Réttur flóttafólks til að snúa heim er einstaklingsbundinn og það er ekki hægt að svipta mann réttinum til að fara heim til sín.
~~~ ~~~ ~~~ ~~~

Bush lofar betri heimi. Bush er lygari.

Um hver jól kemur út jólateskeið úr silfri, sem seld er hjá gullsmiðum. Það vill svo til að ég á mér uppáhalds jólateskeið. Það er skeiðin frá 1977. Hún er látlaus og smekkleg en þó sígild í hönnun. Löguð eins og gamaldags spónn. Sígild skeið.

Fasistinn John Negroponte, einnig þekktur sem Dauðasveita-Djonn, er nýr yfirmaður leyniþjónustu Bandaríkjanna, allra 15. Um leið og hann er hreint afleitur kostur, þegar annars vegar er embætti með mikla ábyrgð og mörg tækifæri til að láta illt af sér leiða, verður að viðurkennast að Bandaríkjastjórn er sjálfri sér samkvæm og lætur ekki slá sig út af laginu. Til fasistaríkis skal stefnt og engar refjar!

Frétt: Fangar Bandaríkjamanna í Afghanistan sæta hrikalega illri meðferð. En sú frétt. Fyrir utan að þetta segir sig sjálft og er bara í stíl við vinnubrögð Bandaríkjastjórnar, þá hefur þetta verið vitað lengi. Ég hef vitað þetta lengi. Mig minnir að það hafi verið sirka í desember 2001 sem ég frétti fyrst af illri meðferð Bandaríkjahers á föngum í Afghanistan.

Ísraelar fyrirhuga að treysta tök sín á landtökusvæðum á Vesturbakkanum á næstunni. Ef þeir gera alvöru úr því að draga landtökumenn út af Gazasvæðinu verður því fagnað sem stórsigri á Vesturlöndum en reynt að breiða yfir að á sama tíma er landránið háð sem fyrr á Vesturbakkanum, þar sem a.m.k. 55% landsins verða innlimuð í Ísrael. Reyndar held ég að Sharoni muni leggjast eitthvað til, til að blása af eftirgjöf Gazasvæðisins. Ef málið er skoðað í samhengi megum við ekki einskorða okkur við Gazasvæðið. Það skiptir máli að sjá hvað Ísraelar eru að gera með hinni hendinni. Það sem er á dagskrá er ekki að landtökubyggðirnar verði lagðar niður, heldur skipulegt undanhald á einni vígstöð til þess að treysta til muna stöðuna á hinum vígstöðvunum.


Rússar staðfesta að þeir ætli að selja Sýrlendingum nýtt, skammdrægt eldflaugavarnakerfi. Ekki er langt síðan Ísraelar kynntu til sögunnar nýjan Markava-skriðdreka, fjórðu kynslóð, sérstaklega útbúinn til átaka í þéttbýli. Munu Ísraelar og Sýrlendingar lenda í stríði innan skamms? Ég veit það ekki, en hvorir tveggju búa sig af kappi undir þann möguleika og að Rafiq Hariri drepnum má segja að óveðursskýin hrannist upp.

Núna á laugardaginn hefst heimildamyndavika Gagnauga.is, og stendur hún til 27. febrúar. Að þessu sinni sýnum við 47 heimildarmyndir um alþjóðamál, trúarbrögð, grín og ýmiss konar fræðsluefni. Sýningarnar fara fram í húsakynnum Snarrótar að Garðastræti 2, 101 Reykjavík. Aðgangseyrir er 300 krónur fyrir hverja mynd, en passi sem gildir á allar myndirnar kostar 1.500 krónur. Dagskrá heimildarmyndavikunnar og umfjöllun um myndirnar er að finna á Gagnauga.is.

Í DV í gær sá ég minnst á nýlega hugvekju mína á Vantrú, "Mamma þín er komin af öpum". Ný"frelsuðum" útvarpsmanni hafði runnið þetta svo til rifja, að hann sá ástæðu til að skýra frá því í útvarpinu, að hann væri sko ekki kominn af öpum. Sú yfirlýsing vekur satt að segja fleiri spurningar en svör.

Andskotinn sjálfur, þetta er ekkert annað en óhugnanleg framtíðarsýn. Vélhermenn. Í apríl er fyrirhugað að vopnuð útgáfa af sprengjuleitarvélmenni komi á stræti Baghdadborgar. Getur skotið 1000 kúlum á mínútu. Ekki vildi ég falla fyrir kúlu frá vélmenni. Ekki vildi ég vera kúgaður af vélmenni. Ef það eru vélmenni sem eru á vígvellinum þurfa herskáir stjórnmálamenn ekki lengur að hafa áhyggjur af mannfalli í eigin röðum, og ekki heldur af minni áhuga almennings af að munstra sig í herþjónustu. Hömlur á stríðsrekstri verða miklu minni -- sem þýðir að stríðsrekstur verður miklu meiri. Auðveldari og áhættuminni stríð = meiri stríð. Algjört ógeð.

Rafiq Hariri var myrtur og hver fjölmiðillinn étur upp eftir öðrum að nú "berist böndin að Sýrlendingum". Segir hver? Meðan þeir segja þetta með annarri tungunni segir hin að það sé "óljóst" hver hafi framið morðið.
Getur hvort tveggja verið rétt? Er þversögn að segja að "það sé óljóst hver framdi morðið, en böndin berist að Sýrlendingum"? Ég er sannast sagna ekki viss. Allavega þykist ég kenna þekkta tilhneigingu til að gefa hlutina í skyn í staðinn fyrir að segja þá fullum fetum. Ef þeir eru sagðir fullum fetum og síðan sannast hið gagnstæða, þá er auðveldara að húkka menn fyrir óvandaðan málflutning.
Í gær bloggaði ég um þetta sama morð og vísaði þá - og vísa hér með aftur - í þessa ágætu grein um pólitískar hliðar á því. Í dag birtist önnur ágæt grein sama efnis. Ég er mjög efins um að Sýrlendingar hafi gert þetta. Nautaskítslyktin af málflutningnum er of sterk.
~~~ ~~~ ~~~ ~~~

Efnavopna-Alí verður flengdur. Skemmtilegt að láta þetta viðurnefni festast svona við hann. Við þurfum að finna góð viðurnefni á vestræna stjórnmálamenn, Efnavopna-Halldór og félaga. Bandaríkjaforseti gæti verið Guantanamo-Georg eða Abu Ghreog. Halldór Ásgrímsson ... hmm ... Halldór herskái? Það þarf að leggjast yfir þetta.
~~~ ~~~
Stormsveit stórlandeigenda í Para í Brasilíu myrðir forkólfa í verkalýðsbaráttunni. Á ykkur sem hafið ekki séð The Burning Seasons með Raul Julia skora ég að sjá hana. Í Suður-Ameríku er ólga í stéttabaráttunni. Á Íslandi láta menn eins og stéttabaráttan sé áróðursbragð úr kalda stríðinu og verkalýðsforystan spilar bridds við auðvaldið.
~~~ ~~~
Talandi um auðvald, þá skrifar Ögmundur Jónasson beinskeytta grein í Morgunblaðið í dag, miðopnu. Þar kallar hann þá menn, réttilega, aunokunarauðvald, sem eru að rísa upp hér á Íslandi. Einokunarauðvald er þetta, einokunarauðvald skal það heita.
~~~ ~~~
Hér er ágæt grein um það hvernig sömu Repúblíkanarnir og ærðust yfir einkalífi Bill Clinton og einhverju fjármálahneyksli, berjast nú á hæl og hnakka fyrir Bush, sem hefur ekki bara kostað bandarísku þjóðina hundruð milljarða dollara og orðstírinn í þokkabót, heldur einnig logið blákalt aftur og aftur. Fjölmiðlarnir taka gagnrýnislítinn þátt í skrípaleiknum. Hvert stefnir þetta eiginlega?

Á næstu mánuðum verða haldin þemakvöld á ensku í Snarrót, með framsögum og umræðum sem fara fram á ensku. Kvöldin verða öllum opin, en sérstaklega hugsuð fyrir þá sem eru ekki sleipir í íslensku. Dagskrá verður auglýst síðar, en dagsetningarnar verða þessar: 1. mars, 15. mars, 5. apríl, 19. apríl, 3. maí og 17. maí.
~~~ ~~~ ~~~ ~~~

Aðalfundur Félagsins Ísland-Palestína verður haldinn í Norræna húsinu sunnudaginn 20. febrúar klukkan 16:00.

Dagskrá:
1. Eiríkur Jónsson, formaður Kennarasambands Íslands, segir í máli og myndum frá nýlegri ferð sinni til hertekinnar Palestínu.
2. Venjuleg aðalfundarstörf.

Allir velkomnir.

~~~ ~~~ ~~~ ~~~

Frétt: Kristinn H. Gunnarsson fer í þrjár nefndir og er tekinn í sátt af þingflokki Framsóknarflokksins. Vonir standa til að hann verði ekki til vandræða á landsfundi flokksins síðar í mánuðinum. Ég held að ég hefði brugðist verr við en Kristinn gerði, ef ég hefði lent í því sama. Mér finnst hann samt koma út úr þessu sem meiri maður. Ég var annars að komast að því að Kristinn er með heimasíðu.
~~~ ~~~ ~~~ ~~~

Þetta morð í Beirút, þar sem Rafiq al-Hariri var myrtur, hefur vakið athygli. Risastór sprengja, ítarleg skipulagning, nákvæmar upplýsingar .. þarna var leyniþjónusta á ferðinni. Meðan margir fingur benda á Sýrlendinga, þá bendir ýmislegt til að verið sé að gera þá að blóraböggli. Hér er kenning: Leyniþjónusta Bandaríkjanna eða Ísraels framdi morðið til þess að réttlæta herta afstöðu gegn Sýrlendingum, þar á meðal að settur verði þrýstingur á þá að draga herinn út úr Líbanon, og að búa í haginn fyrir efnahagsþvinganir eða stríðsæsingar gegn þeim. Annars vil ég benda á þessa ágætu grein um morðið.

Palestína, N-Kórea, Nepal, um stjórnarandstöðu og Zimbabwe

Palestína

From now on, I have a partner, segir Abbas um Sharon. Mér finnst það hljóma eins og Abbas sé í vondum félagsskap. Ég sé ekki fyrir mér að Sharon sé maðurinn sem stillir til friðar. Reyndar verð ég að viðurkenna að ég efast um að Abbas sé sá heldur. Þótt það sé kannskí út úr karakter af minni hálfu, þá held ég að ég geri orð spámannsins Jesaja að mínum: Ávöxtur réttlætisins skal vera friður, og árangur réttlætisins rósemi og öruggleiki að eilífu. (Jesaja 32:17) Jesaja gamli hittir þarna naglann á höfuðið: Friður er ávöxtur réttlætis. Án réttlætis er tómt mál að tala um frið.
Á orðum Sharons er ekki mark takandi. Hvað gerir hann? Mun hann hefja niðurrif aðskilnaðarmúrsins? Mun hann hefja brottflutning landtökumanna? Mun hann hætta við að innlima meira en helming Vesturbakkans inn í Ísrael? Mun hann hleypa flóttamönnunum heim? Augabrúnirnar á mér munu lyftast þann dag sem einhverri þessara spurninga verður hægt að svara játandi. Þangað til er ég tortrygginn.

N-Kórea

Suður-Kórverjar segjast efast um að Norður-Kórverjar eigi kjarnorkuvopn. Ég held að Kim Jong-il og félagar séu búnir að vinna þessa skák. Hvað sem um þá má segja að öðru leyti, þá virðist leikfléttan hafa gengið upp. Norður-Kórea komst fyrir löngu í hóp óárennilegustu ríkja að ráðast á, en það kæmi vægast sagt á óvart ef það yrði ráðist á hana úr þessu. Ég held að hallarbylting í Pyongyang sé sterkasti leikurinn fyrir óvini Norður-Kóreustjórnar.

Nepal

Valdaráni konungsins um daginn svöruðu maóistar með því að lýsa allsherjarbanni á ferðir og flutninga í landinu. Það hefur gengið nokkurn veginn eftir.* Sumir fylgja því af stuðningi við maóista, aðrir af ótta við hefnd þeirra.

Lagt fram frumvarp um "frelsun" Írans.

Um stjórnarandstöðu og Zimbabwe

Það er mikill misskilningur að þar sem ríkisstjórn er afturhaldssöm hljóti stjórnarandstaðan að vera framsækin. Algengara er að ríkisstjórn sé afturhaldssöm og stjórnarandstaðan sé það líka. Satt best að segja held ég að sú regla hafi ekki margar undantekningar, að minnsta kosti ekki um þessar mundir. Í löndum á borð við Júgóslavíu og Georgíu, og nú síðast Úkraínu, höfum við horft upp á valdaskipti sem vestrænir fjölmiðlar hafa kallað byltingar en eiga í raun lítið skylt við byltingar. Í öllu falli hafa nýju valdhafarnir ekki verið neitt betri en þeir gömlu; eini munurinn sá að þeir eru hallari undir vestræna hagsmuni en þeir gömlu.
Nú í mars standa fyrir dyrum kosningar í Zimbabwe. ZANU-PF, hreyfingu Mugabe forseta, er spáð stórsigri með kosningasvindli. Sterkasta hreyfingin í stjórnarandstöðunni er Movement for Democratic Change. Mugabe er vondur svo þeir hljóta að vera góðir, ekki satt? Ég leyfi mér að efast. Meðan Mugabe hefur ótvírætt gert margt sem hann hefði betur sleppt, þá eru MDC hreint engir englar heldur. Suður-Afríkumenn eiga mikla hagsmuni í hreyfingunni, svo og ýmis lönd breska samveldisins. Með þeim í liði er sjálfur Ian Smith. Þess má geta að í gamla daga, þegar Mugabe kallaði sig marxista, þá var það ZANU, sem þá barðist gegn apartheid-stjórn Ians Smith, sem var framsækna stjórnmálaaflið. Það er margt skrýtið í kýrhausnum. Smith tapaði fyrir Mugabi 1980, Rhódesíu var breytt í Zimbabwe, og Mugabe fór að hlaða undir sjálfan sig og fylgismenn sína. Sjálfur hallast ég að því að Chimurenga III, landa-uppskiptaáætlun Mugabes, þar sem land hefur veriðt ekið af hvítum búgarðaeigendum og fengið fátækum svörtum bændum, sé kannski ekki alveg eins slæmt og látið er hljóma í vestrænum fjölmiðlum.

19. mars eru stór mótmæli gegn Íraksstríðinu. Hvað varðar hversdagsmótmælin í Lækjargötu og á Austurvelli, þá held ég að það muni ekki fara mikið fyrir mér í þeim. Ég er orðinn hundleiður á mótmælum. Þótt maður fái góða samvisku af að standa á Lækjartorgi í klukkutíma, spjalla, veifa skilti og fá kvef, þá er því miður lítið upp úr því að hafa. Spjallið getur eins vel farið fram á kaffihúsi. Hans hávelborinheit geta eins vel tekið við mótmælum í umslagi. Já, mótmæli eru ansi vinsæl en bera ekki árangur að sama skapi. Orku manns og tíma er betur varið í annað, er ég hræddur um.
~~~ ~~~ ~~~ ~~~

Í dag er hugvekja eftir mig á Vantrú. Mamma þín er komin af öpum nefnist sú.
~~~ ~~~ ~~~ ~~~

Styrmir Gunnarsson segir í leiðara Morgunblaðsins í gær, 12. febrúar:

Það er tímabært að alvöru umræður hefjist hér um utanríkisstefnu Íslands á 21. öldinni. Sá skotgrafahernaður, sem stjórnarandstaðan og sumir fjölmiðlar hafa haldið uppi gegn Halldóri Ásgrímssyni, forsætisráðherra, undanfarnar vikur vegna Íraksstríðsins skiptir engu máli og þjónar engum tilgangi.

Þá vitum við það, Styrmi Gunnarssyni finnst það ekki þjóna neinum tilgangi að menn séu ábyrgir gjörða sinna eða sannsöglir um embættisfærslu sína. Á sömu miðopnu ritar Steingrímur J. Sigfússon góða grein um sama mál.
Ríkisstjórnin og þeir sem halda uppi vörnum fyrir hana vilja ekki að þetta mál sé rætt. Það er skiljanlegt, þar sem skammarlisti þeirra er langur og fjölbreyttur. Halldór og Davíð vilja ekki bera ábyrgð á gjörðum sínum og það vilja stuðningsmenn þeirra ekki heldur að þeir geri eða séu látnir gera.
Þegar fylgismenn árásarstríðsins gegn Írak tala um að andstæðingar þess eigi að hætta að "velta sér upp úr fortíðinni og snúa sér að uppbyggingu í Írak" eru þeir einfaldlega eins og krakkar sem bregðast hinir verstu við þegar er komið að þeim með hendina ofan í kökukrúsinni: "ég má þetta alveg" "hættessu".. Ef ég dræpi mann, hversu góð málsvörn væri það þá fyrir rétti, að segja yfirvöldum að láta mig í friði og einbeita sér frekar að því að hugga ekkjuna?

Nú höfum við staðið við Stjórnarráðið í hverju hádegi þessa viku og mótmælt. Næstu viku ætlum við að vera á Austurvelli í hádeginu alla virka daga.
Hér með skora ég á fólk að mæta á mótmælin. Skilti eru velkomin; þeir sem ekki eiga skilti geta nálgast þau í Snarrót í Garðastræti 2. Þeir sem vilja hringja á undan sér geta gert það: 5518927 er síminn.
Þessi hádegismótmæli eru ekki bara mótmæli. Þau eru líka fundir. Við stöndum ekki þögul og mótmælum, heldur ræðum við okkar á milli og við vegfarendur. Þannig eru þetta frjóir fundir, þar sem hugmyndir og aðgerðir eru ræddar. Ég hvet fólk til að koma í hádeginu á mánudaginn og taka þátt.

Var að koma út fyrstu vettvangsferð Hins íslenska tröllavinafélags. Gengum fjögur upp að Tröllafossi í Mosfellssveit. Ferðin gekk að flestu leyti, en veðrið var vægast sagt hryssingslegt. Hífandi norðanrok, allmikil ofankoma og mjög mikill skafrenningur. Við vorum öll kyrfilega klædd, og veitti sko ekki af. Gengum upp að Tröllafossi og átum nokkuð af nesti þar, en gengum svo til baka og átum súrmat og fleira í jeppabifreið formannsins. Sérstaklega var ánægjulegt hvernig maturinn var að mestu leyti gaddfreðinn. Harðfiskurinn stóð undir nafni; ég hef tuggið skósóla sem voru mýkri undir tönn. Já, þessi ferð gekk frekar vel. Hið íslenska tröllavinafélag getur vel við unað.

Meirihluti Vöku er fallinn! Hvað nú? Munu Vaka og Röskva mynda samsteypustjórn? Mun önnur hvor hreyfingin bjóða Háskólalistanum samstarf? Hver sem niðurstaðan verður, þá er þetta stórsigur fyrir Háskólalistann. Ef Stúdentaráð kemst nálægt því að vera heilt og óklofið út á við, þá er það stór áfangasigur fyrir H-listann. Glæsilegt, glæsilegt!

25 hús verða rifin við Laugarveg. Ég tek heils hugar undir með Ólafi F. Magnússyni í að mótmæla því. Mér rennur til rifja að sjá grisjuð burt rótgrónustu hús borgarinnar. Það getur verið að það sé rétt að rýma til fyrir nýjum húsum; ekki skal ég útiloka það. Ef sú er raunin, þá vildi ég frekar sjá þessa öldnu höfðingja flutta en rifna.

Þessa frétt, um barnaþrælkun í kakóframleiðslu í Vestur-Afríku, er ástæða til að benda á.

Þessa líka. CIA og fleiri vissu vel að árás á WTC væri yfirvofandi. Það, að þeir skyldu ekki grípa í taumana, er vægast sagt tortryggilegt. Fyrst þeir gerðu það ekki liggur næst við að ætla að einhverjir séu með óhreint mjöl í pokahorninu. Sjá einnig hér.

Ég gekk Skothúsveg úr austri fyrr í dag. Nokkuð bar fyrir augu mín: Vestast í Hljómskálagarðinum, eða meðfram Bjarkargötu, vestast í trjálundinum sem myndar vestur-hluta Hljómskálagarðsins, hefur verið tekin heljarmikil fjöldagröf. Hún gín þarna, tveir faðmar á breidd, 40 eða 50 faðmar á lengd og 2,5-3 faðmar á dýptina. Hverja skyldi eiga að fjöldamyrða? Ætli kínverskur erindreki sé á leiðinni og Njarðvíkurskóli dugi ekki lengur fyrir Falun Gong-menn?

Doddi bendir á, og ég tek undir, að Bush og Bliar eru rúnir trausti og trúverðugleika. Traust og trúverðugleiki eru eins og heiður og virðing; það er fljótgert að brjóta niður en tekur ærinn tíma og fyrirhöfn að byggja upp. Nú virðast þeir vera að hvetja kutana í stríð gegn Íran. Ef þeir vilja fara í stríð við Íran, þá gera þeir það bara. Þeir hafa herjum og gereyðingarvopnum á að skipa og Bush getur ekki boðið sig fram til endurkjörs aftur. Ég efast um að Bliar muni þrauka yfir næstu kosningar heldur. Það stöðvar samt náttúrlega ekki stríðsherra með einbeittan brotavilja. Það verða engar þjóðaratkvæðagreiðslur um stríð gegn Íran. Það verður ákveðið á tveggja manna tali. Lifi lýðræðið. Látum frelsinu rigna yfir þessa skítugu handklæðahausa.



Halldór Ásgrímsson stynur því upp að Bandaríkjamenn hafi sett "mikinn þrýsting" á Íslendinga og hótað að taka burt elsku þoturnar ef Ísland styddi ekki stríðið. Þetta grunaði nú flesta, en færri sem sögðu það upphátt. Það kemur hins vegar á óvart að Halldór skuli þora að viðurkenna það. Kannski að Steingrímur Hermannsson hafi tekið hann á eintal? Hugsa sér. Sendiherra Bandaríkjanna hringir í Davíð og segir til hvers er ætlast af honum. Ekki ræða þetta við utanríkismálanefnd, það flækir bara málið. Þrjóskist við og étið frasana upp eftir okkur. Þetta reddast allt. Þoturnar fara samt, þegar stríðið er búið. Ég mundi kenna í brjósti um Halldór ef þetta væri ekki sjálfsskaparvíti hjá honum.

Halldór Ásgrímsson og Davíð Oddsson og þingmannalið þeirra standa eins og asnar. Eins og krakki sem er gripinn með lúkuna í kökukrúsinni. Vita upp á sig skömmina, allir vita hvernig í pottinn er búið og þeir sjálfir ekki síst. Á þessum tímapunkti mundi maður með snefil af sjálfsvirðingu segja af sér. Ef maður með snefil af sjálfsvirðingu hefði nokkurn tímann komist í þessa aðstöðu.

Á Mbl.is er ágæt samantekt um umræðurnar í þinginu í dag, þar sem stjórnarmenn virðast hafa þau svör helst, að stjórnarandstaðan eigi að láta þá í friði og hætta að velta sér upp úr aðild þeirra að árásarstríði og tilheyrandi brotum á alþjóðalögum og mannréttindum. Þetta vakti athygli mína:

Vegna ummæla Ingibjargar Sólrúnar um stefnubreytingu, þá sagði Halldór að það lægi alveg ljóst fyrir, varðandi árásir vestrænna herja á Kosovo-hérað í Júgóslavíu, að öryggisráð SÞ hafi ekki samþykkt þær. Sagðist Halldór ekki muna betur en að Samfylkingin hafi stutt á sínum tíma þegar íslensk stjórnvöld veittu þeim aðgerðum stuðning.

Athyglisvert að Halldór skuli vilja rifja upp þátt sinn í Júgóslavíustríðinu, þar sem hann og Davíð studdu m.a. þá ákvörðun Nató, að fréttastofa serbneska sjónvarpsins væri löglegt skotmark, sem aftur skilaði sér í morðum á júgóslavneskum fréttamönnum. Ef ég væri Halldór mundi ég frekar reyna að gleyma Júgóslavíustríðinu.

Davíð skýrir frá framlagi Íslendinga til vopnaflutninga til Íraks. Þarna er ein hernaðaraðgerðin sem Íslendingar taka þátt í.

~~~ ~~~ ~~~ ~~~



Norður-Kóreumenn segjast eiga kjarnorkuvopn. Kemur ekki á óvart. Ef þetta væri eltingaleikur, þá væru Norður-Kóreumenn núna komnir í "stikk" -- það böggar nefnilega enginn mann sem á kjarnorkusprengjur. Norður-Kórea er svosem fyrir löngu búin að koma sér upp nægum herafla og vopnum til að fæla frá sér hvaða árásaraðila sem er, en þetta er kirsuberið á rjómatertuna.

~~~ ~~~ ~~~ ~~~



Og talandi um kjarnorkusprengjur, þá er nú gott að hugsa til þess að við Evrópumenn höfum okkar skerf tilbúinn.

~~~ ~~~ ~~~ ~~~



Fór í dag og mótmælti í hádeginu hjá Stjórnarráðinu. Þar verða aftur mótmæli í hádeginu á morgun. Fólk er velkomið, við bítum ekki. Ekki einu sinni þá sem eiga skilið að vera bitnir...

~~~ ~~~ ~~~ ~~~



Fór annars líka í gærkvöldi á bíó í boði SUS. Fahrenhype 9/11 var myndin. Ég fór eftir á að giska hálftíma. Það getur hugsast að ég eigi eftir að gera aðra tilraun til að sjá þessa mynd, en hún var ekki bara léleg, heldur leiðinleg líka. Ann Coulter og David Frum að segja hvað þeim þætti Bill Clinton vera mikill bjáni. Og Michael Moore vitlaus. Og George Bush frábær. Ég skil ekki hvað ungir sjálfstæðismenn telja sig vera að gera með því að skipa sér í lið með öfgakristnum, herskáum neo-conservative repúblíkanadelum. Ef þeir halda að þetta sé sterkur leikur, pólitískt séð, þá lýsi ég því hér með yfir að ég held að það sé ekki svo. Ef þeim gengur hreinskilnin ein til, að þeir séu að draga línurnar og þeir séu í þessum félagsskap og skammist sín ekki fyrir það, þá tek ég ofan fyrir þeim.

Vettvangsferð Hins íslenska tröllavinafélags

Fyrsta vettvangsferð/þorrablót starfsársins verður laugardaginn 12. febrúar. Áfangastaðurinn er Tröllafoss í Mosfellssveit og ferðatilhögun verður sem hér segir:

Tekinn verður strætó upp að Laxnesi. Leið 25 gengur þangað og fer frá Ártúni. Hann gengur 5 sinnum á dag, við tökum vagninn sem fer frá Ártúni 11:56 og verðum þá komin að Laxnesi klukkan 12:23.

Fólk er hvatt til að mæta tímanlega í Ártún til að missa örugglega ekki af þessum vagni!

Þeir sem vilja koma sér sjálfir í Laxnes mega það að sjálfsögðu!

Í Laxnesi söfnum við liðinu og leggjum í hann um 12:30. Við göngum sem leið liggur, nokkurra kílómetra leið, norður að Tröllafossi, sem er í Haukafjöllum norðanmegin í Mosfellsdalnum. Þegar þangað kemur svipumst við um eftir tröllum og étum súrmat og annað nesti áður en við göngum til baka að Laxnesi, þaðan sem við tökum strætó í bæinn sem fer frá Laxnesi 18:23.

Þar sem þetta er 6 klukkutíma ganga, þá er rík ástæða til að klæða sig vel. Hið íslenska tröllavinafélag vill ekki að félagar þess verði úti! Hlý föt, góðir skór, þurrir sokkar. Nesti. Annað sem fólki finnst ómissandi í útivist. Það er ekki skemmtilegt að vera svangur og kaldur í 6 tíma!

Fararstjórar eru Davíð Arnar Runólfsson og Vésteinn Valgarðsson. Verð er 600 krónur fyrir borgandi meðlimi, 800 fyrir aðra. Innifalinn í verði er súrmatur, og einhver lögur til að skola honum niður. Ath. fargjald með strætisvagni (220 kr.) er ekki innifalið. Hægt verður að borga félagsgjald á staðnum (1500 kr.) og jafnvel ganga í félagið, þeir sem það vilja. Tekið skal fram að þeir sem ekki eru skráðir félagsmenn eru velkomnir með líka. (Einnig skal tekið fram að vel getur verið að semja megi við gjaldkera ef fólk hefur séróskir um greiðslu...)

Þeir sem ætla með í ferðina eru beðnir að tilkynna þátttöku sína eigi síðar en á hádegi á föstudag, 11. febrúar, í netfang félagsins: trollavinafelag@gmail.com. (Það er til þess að það verði örugglega til nægur súrmatur!)



Fjölmennum nú í þessa skemmtilegu ferð!

Vopnahléi lýst yfir í Palestínu. Ég held ég leyfi mér bara að vera vongóður, þótt bjartsýni mín sé af skornum skammti.



Samkvæmt þessari könnun mundi ríkisstjórnin falla naumlega ef kosið væri nú og stjórnarandstaðan gæti myndað stjórn með mjög naumum meirihluta. Samfylkingin og Sjálfstæðisflokkurinn gætu myndað stjórn með vænum meirihluta. Maður á nú von á að sú verði raunin eftir næstu kosningar. Viðeyjarstjórnin II. Hvað ætti Samfylkingin að vera að púkka upp á VG og Frjálslynda flokkinn?

~~~~ ~~~~ ~~~~ ~~~~



Ég stóð í dag frá því upp úr 11 þangað til rétt fyrir 12 fyrir framan Stjórnarráðið við annan mann, með skilti. Á morgun er mótmælastaða milli 12 og 13, og þá vonar maður að mætingin verði aðeins betri. Áletrun dagsins í dag var: "Sprengidagur á Íslandi - sprengidagur í Írak".

~~~~ ~~~~ ~~~~ ~~~~



Ég þarf að fara að uppfæra linkalistann hér til hliðar. Geri það á morgun.

Afrek dagsins, Kviksaga, háskólapólitík, fréttir

Ég fór áðan og stóð í klukkutíma fyrir framan Stjórnarráðið með skilti. Ætla aftur á morgun.



Það hefur verið opnað nýtt vefrit um sagnfræði, Kviksaga. Lítið á þessa stórglæsilegu síðu!



Önnur stórglæsileg síða sem fólk (einkum þeir sem hafa kosningarétt í kosningunum í Stúdentaráð) ætti að kíkja á er heimasíða Háskólalistans, framsækna og málefnalega listans í háskólapólitíkinni. Röskvaka er pólitískur leikskóli sem gerir ekki annað en spilla fyrir hagsmunabaráttu stúdenta. Háskólalistinn, já takk!



(Gleymið heldur ekki Alþýðulistanum!)

~~~~~~~~~~~~~~~~



Úr fréttum:

* Samtök herstöðvaandstæðinga fóru í óvissuferð á sama tíma og Bandaríkjaher hélt heræfingu á Íslandi. Nú heldur Bandaríkjaher heræfingu á Filippseyjum og New People's Army tekur heldur dýpra í árinni.

* Á meðan filippeyskir maóistar hóta Bandaríkjaher hóta nepalskir maóistar harðstjóranum Gyanendra. Prachanda formaður ráðleggur Nepölum að birgja sig upp af nauðsynjum; ef harðstjórinn dragi ekki andlýðræðis-ráðstafanir sínar frá því um daginn til baka, þá verði hart látið mæta hörðu.

* Hér er greinarstúfur um umsátursástandið í Nepal. Stjórnarherinn situr í virkjum sínum, maóistar fara sínu fram.

* Kim Jong-il er byrjaður að auka veg sona sinna, væntanlega til að einn þeirra muni taka við eftir hans dag, en Kim er 63ja ára. Ef arftakinn heitir Kim Jong-Ill, þá splæsi ég umgang!

Bill Van Auken skrifar um kosningarnar í Írak og ber saman við kosningarnar í Víetnam 1967. Sá samanburður er vægast sagt áhugaverður: Báðar kosningarnar eru skrípaleikur, til þess ætlaður að réttlæta heimsvaldastríð. Lesið greinina; hann hefur mikið til síns máls. Það er ástæðulaust að vera bjartsýnn um framhaldið í Írak.

~~~~~~~~~~~~~

Ég var loksins að sjá Super Size Me, sem er ansi áhugaverð mynd. Þeir sem hafa ekki nú þegar tekið meðvitaða ákvörðun um að sniðganga McDonald's og ámóta rusl-keðjur (já, líka KFC og Burger King!) ættu að horfa á þessa mynd og lesa síðan Fast Food Nation eftir Eric Schlosser. Málefni skyndibitaiðnaðarins reifað og tekið á flestum hliðum þess.

~~~~~~~~~~~~~

Hópur Belga reynir hópsjálfsmorð með blásýru. Mistekst. Hvers vegna? Aðferðin sem þeir notuðu - sama aðferð og hómópatar nota til að útbúa "lyf" - virkar ekki.

~~~~~~~~~~~~~

Bandaríkin: Gangavarða-löggur í skólum útbúnir með taser-rafbyssur. Óhugnanlegt.

~~~~~~~~~~~~~

Hér er áhugaverð grein um vímuefni, vandamál og bönn.

Naumast er það fylgið hjá Framsókn, heil 8%! Ég vona að þessi glæsilegi árangur eigi eftir að skila sér í næstu kosningum.

Talandi um næstu kosningar, þá sé ég fyrir mér Samfylkingu-Sjálfstæðisflokk sem samsteypustjórn. Ég verð bara að játa, að ég sé ekki hvers vegna Samfylkingin ætti að nenna að leita til VG eða F eftir samstarfi þegar samstarf við Sjálfstæðisflokkinn skilaði svona miklu sterkari stjórn.

Úff, á laugardag eftir viku er fyrsta vettvangsferð Hins íslenska tröllavinafélags. Helvíti líst mér vel á þetta. Þið sem þetta lesið, og eruð skráðir félagsmenn, eigið von á fréttabréfi félagsins eftir helgi. Þið sem þetta lesið, og eruð ekki skráðir félagsmenn, megið samt koma. Farið verður upp að Tröllafossi í Mosfellssveit. Áhugasamir geta haft samband: vangaveltur@yahoo.com eða trollavinafelag@gmail.com til að fá nánari upplýsingar.