"Enn allt á huldu um dánarorsök Yassers Arafats" segir á vef Morgunblaðsins. Ef allt var "með felldu" í kring um dauða hans, hvers vegna er þá ekki hægt að upplýsa dánarorsökina? Ég skil ekki hvað er verið að fela. Það getur verið að Ísraelar hafi eitrað fyrir honum (eins og þeir reyndu m.a. að drepa Khaled Meshal í Amman '97). Ef þeir gerðu það gætu læknarnir verið ráðþrota og ekki fundið hvað nákvæmlega væri að. En á hinn bóginn þurfa Ísraelar ekki að hafa eitrað fyrir hann til þess að vera ábyrgir fyrir dauða hans. Þeir höfðu haldið honum, umsetnum, í stofufangelsi í hálfhrundu húsi í nokkur ár. Að komast ekki undir bert loft svo árum skiptir og búa á meðan við óheilnæmar aðstæður inni fyrir, það dugir til að láta flesta missa heilsuna. Það er m.ö.o. Sharon sem ber ábyrgð á því að Arafat missti heilsuna, hvort sem hann var ráðinn af dögum með eitri eða ekki.

"Verjandi Saddams neitar því að hann hafi játað nokkuð" segir einnig á vef Morgunblaðsins. Athyglisvert. Mér skildist að Talabani hefði skriflega játningu og gerða í votta viðurvist. Kannski að Saddam hafi verið látinn éta eitthvað (eða sprautaður með einhverju) sem slævir dómgreindina áður en hann var látinn skrifa undir?

Jústsénkó hefur vikið Tímósénkó frá. Það hefði ég líka gert. ÉG veit samt ekkert hvað kemur í staðinn - en það er örugglega einhver sem ég hefði ekki valið!

Í Nepal virðist vera almenn ánægja með að maóistar hefi lýst einhliða vopnahléi. Ríkisstjórnin segir þeim að leggja niður vopn "til að sýna að þeim sé alvara"* en maóistar svara og segja ríkisstjórninni að lýsa líka yfir vopnahléi og þá geti viðræður hafist.* Að ríkisstjórnin krefjist þess að maóistar afvopnist held ég að sýni bara að hún vill ekki viðræður. Stjórnin getur sagt sér það sjálf að þeir munu ekki gera það. Hún setur skilyrði sem hún veit að þeir munu ekki ganga að. Ef því verður haldið til streitu getur það varla þýtt annað en: Engar viðræður. Í staðinn boða maóistar til mótmæla frá 10. september til 3. desember.*
Gyanendra einræðisherra/konungur í Nepal hefur aflýst heimsókn sinni til Sameinuðu þjóðanna. Hann hefur ekki stuðning nema frekar lítils hluta þjóðarinnar, og t.d. mótmæltu þingræðislegu sjöflokkarnir væntanlegri heimsókn hans og sögðu Kofi Annan að hann hefði ekki umboð þeirra. Það er niðurlægjandi að standa umboðslaus frammi fyrir Sameinuðu þjóðunum og vera ekki trúverðugur sem fulltrúi þjóðar sinnar, svo heimsókninni var aflýst.

Sprengjumaðurinn í London 7/7, sem sprengdi strætóinn, reyndi að ná í vitorðsmenn sína skömmu áður en sprakk. (Sjá frétt.) Það mundi passa við þá kenningu að hann hafi verið nytsamur sakleysingi sem einhverjir óprúttnir menn drápu um leið og þeir notuðu hann í myrkraverki. Hann grunaði að ekki væri allt með felldu og hringdi því í vini sína en hafði ekki erindi sem erfiði. Síðan sprakk fjarstýrð sprengja í bakpokanum hans. Kannski gerðist þetta svona.

Í skoðanakönnun á Bretlandi reyndist Karl Marx vera álitinn mesti heimspekingur sögunnar. (Sjá frétt.) Merkilegt. Líka merkilegt að þetta hafi ekki farið hærra.

LÍÚ segir að hátt olíuverð sé að sliga útgerðina. Nú stendur krónan sterk gv. dollar, þannig að olíuverðið hefur kannski ekki hækkað eins mikið hér og erlendis, hlutfallslega, en samt er hún að „sliga útgerðina“. Mér er spurn, hvernig verður þetta eftir nokkur ár?
Olíukreppan er ekki nema rétt að byrja. Loftvog efnahagskerfisins er fallandi - mjög fallandi - en miðað við það sem í vændum er, má segja að laufin séu rétt að byrja að bærast. Það er stormur í aðsigi og ég mæli með því að menn haldi fast í það sem þeir vilja ekki að fjúki, ef svo má að orði komast.
Frá sjónarhóli pólitíkur og hagfræði væri ekkert skynsamlegra núna en að hefja lífróður. Efnahagskerfi okkar er háð olíu, nei, það byggir á olíu, nánar tiltekið olíu sem er það ódýr að hún er kaupanleg. Eftirspurnin fer vaxandi en framboðið lítið eða ekki. Verðið mun ekki lækka til muna í mörg ár. Það verður að finna nýja lausn, og það er ekki eftir neinu að bíða.

Merkisfréttir frá Nepal: Skv. yfirlýsingu sem kom á laugardaginn frá Prachanda, formanni maóista, lýsa maóistar yfir einhliða þriggja mánaða vopnahléi.* Á þeim tíma munu þeir hafa svigrúm til að treysta bandalag sitt við þingræðislegu sjöflokkana gegn kónginum. Með öðrum orðum, ef fer sem horfir, þá þýðir þetta stórt skref framávið fyrir lýðræðisbyltinguna í Nepal. Maóistar leggja ekki niður vopn, og áskilja sér rétt til að svara árásum og verjast ef á þá er ráðist. Þetta er sniðugt múv hjá þeim, enda bindur það hendur hersins, sem nú getur ekki haldið áfram árásum á maóista án þess að kalla yfir sig fordæmingar fyrir mannréttindabrot.*
Á útifundi var Koirala, frv. forsætisráðherra, misþyrmt af öryggissveitum* svo hann þurfti að leggjast á spítala. Hann er 84 ára gamall. Það er víðar en á Íslandi sem gamalmennum er misþyrmt af mönnunum sem þykjast vera að vernda okkur!
Reyndar er fleira að frétta af maóistum. Nepalskir maóistar og indverskir naxalíta-maóistar hafa myndað með sér bandalag gegn heimsvaldastefnu og afturhaldi, með sósíalisma og kommúnisma í Nepal og Indlandi og heiminum öllum sem markmið sitt.* Svo segja Ganapathy aðalritari naxalíta og Prachanda formaður nepalskra maóista. Þetta hlýtur að styrkja stríð fólksins í Nepal og Indlandi.
Um daginn greindu fréttir (ekki íslenskar) frá því að í Nepal hefðu maóistar nauðgað svo mörgum sem 25 konum af stétt dalíta. Nú hefur komið á daginn að vestrænar fréttastofur létu gabbast af miklum ýkjum. Í alvörunni var einni konu nauðgað, af manni sem sagðist vera maóisti.* Ég veit ekkert um það hvort hann var maóisti í alvörunni eða ekki, en það er greinilega ekki fyrir neðan virðingu sumra að blása fréttir eins og þessa upp til þess að láta maóista líta illa út.
Það er eins og sumir trúi hverju sem er upp á kommúnista.
Mér finnst það vera til marks um að ekki sé allt með felldu, þegar menn fara að ljúga fyrir málstaðinn.
~~~ ~~~ ~~~ ~~~
Ég vona að Halldór Jónsson sé að grínast með greininni „Stundum er ég smeykur“ á blaðsíðu 22 í Mogganum í dag. Ég er hræddur um að annars fái Styrmir Gunnarsson ekki plús í kladdann. Aumkvunarverðum rasistum er enginn greiði gerður með því að ljá þeim ræðupall til að gera sig að fífli fyrir alþjóð.

„Er Barenboim gyðingahatari?“ -- þetta er ljóta ruglið. Eins alvarlegt vandamál og gyðingahatur er, og hefur verið í taímans rás, þá er eins og zíonistar átti sig ekki á einu: Andstaða við helstefnu zíonismans stafar ekki af andúð á gyðingum. Eru menn svona tregir að þeir skilji ekki muninn? Eða blanda þeir þessu viljandi saman til þess að sverta gagnrýnendur sína með ódýrum ad hominem skotum og strámönnum? Tregða eða óheiðarleiki, eru fleiri möguleikar? Tregir eru þeir að minnsta kosti ekki.
Fyrst ég er að tala um zíonisma, þá get ég ekki annað en rifjað upp eina rauðsíldar-grein sem SUSari nokkur skrifaði fyrir nokkru síðan: „Hommar í Palestínu“ -- þar er skýrt frá því hvað staða samkynhneigðra í Palestínu er slæm, og það er líka alveg rétt, eftir því sem ég kemst næst. Það mátti skilja af greininni að þetta væri vegna þess að Palestínumenn væru vondir. Fordómar vaða vissulega uppi í Palestínu eins og fleiri arabalöndum, en gætum að: Palestínski homminn er ekki bara kúgaður af Palestínumönnum af því hann er hommi -- heldur líka af Ísraelum af því hann er Palestínumaður. Það hefði reyndar mátt bætaþví við að lesbíur í Palestínu eru auk þess kúgaðar sem konur, þær eru kúgaðar þrefalt. Þetta eru ekki rök gegn þjóðfrelsi Palestínumanna!

Che Guevara: sálsjúkur illvirki, ótíndur þrjótur, miskunnarlaus böðull og þaðan af verra

Um daginn (24. ágúst) skrifaði Egill Helgason um Che Guevara og lagði m.a. út af orðum Ólafs Guðnasonar, sem „segir að Che hafi verið pyntingameistari og böðull. Sem er alveg rétt.“ „[Che] var ... óþjóðalýður.“ Sama hljóð heyrist úr öðrum strokkum stjórnmála („Svalir siðleysingjar“ og „Che Guevara, tískufyrirbærið og morðinginn“ til dæmis).
Mér þykir þetta athyglisvert. Mér finnst athyglisvert hvernig hlutirnir eru teknir úr samhengi. Ef borgarastríð eða bylting eru í gangi, þá gilda nefnilega önnur lögmál en á friðartímum. Og þegar annars vegar eru illskeyttir harðstjórar eða leppar heimsvaldasinna, er þá nokkuð eðlilegra en að leggja allt í sölurnar til að losna við þá?
Viðkvæðið er alltaf það sama. Che var morðingi, nauðgari, pyndingameistari, hitt og þetta. Ætli hann hafi ekki verið mannæta líka? Ég veit ekki til þess að hann hafi nauðgað einum né neinum, og miðað við annað sem ég veit um hann þykir mér það næsta ólíklegt. Ég hef heldur ekki heyrt að hann hafi pyndað fólk, og ekki hef ég heimildir fyrir því að hann hafi drepið fólk að gamni sínu. En það er víst aukaatriði. Kommúnistar eru vondir, svo það er allt í lagi að skreyta sögurnar af þeim. Fyrst Che drap menn, þá hefur hann örugglega verið nauðgari líka, ekki satt?
Þetta er dæmigert fyrir það, hvernig mettir Vesturlandabúar á hraðskreiðum bílum telja sig þess umkomna að vera fullir vandlætingar á því hvernig fólk hagar sér við harðneskjulegar aðstæður. Er það alltaf glæpsamlegt að taka sér riffil í hönd og fara og berjast við stjórnarherinn? Hvað ef það eru ekki hugsjónir heldur aðþrenging og örvænting sem ráða för? Hvað ef það er réttlætiskennd sem hefur verið misboðið vegna framferðis stjórnvalda? Hvað ef það er ekkert lýðræði og engin önnnur leið fær til að breyta stjórnarfarinu, heldur en vopnuð bylting? Það búa ekki allir í Svíþjóð.
Við getum sett okkur á háan siðferðissess og sagt að hitt og þetta sé glæpur eða hryðjuverk. Sagt að hinir og þessir séu þrjótar og svíðingar, reyndar sagt hvaðeina um þá -- því hver fer að verja þrjóta? Það er hægt að kalla Che nauðgara -- fyrst hann var manndrápari, leiðir þá ekki hitt af sjálfu sér? Er nokkuð að því að skrökva sökum upp á menn sem eru sekir hvort sem er?
Það er stundum minnst á sögu af því þegar Che drap einhvern bónda. Var það verri verknaður en þegar Che var drepinn sjálfur? Hverjar voru aðstæðurnar? Ég spyr.
Í alvöru talað, hversu trúverðuga mynd fær maður af einum manni með því að hlusta aðeins á óvini hans?
Vinstriróttæklingum er oft borið á brýn að úthúða hægrisinnuðum stríðsglæpamönnum en draga fjöður yfir stríðsglæpi vinstrisinnaðra stríðsglæpamanna. Það kann vel að vera rétt. En er það ekki hræsni þegar sömu hægrimennirnir og segja þetta gera nákvæmlega það sama: Úthúða mönnum eins og Che eða öðrum kommum, meðan menn á borð við Suharto eða Mobutu eru þægilega fjarlægir? Gleymum heldur ekki Hussein konungi, Fahd konungi, Botha, Pinocet og óteljandi öðrum hröppum.
Mér finnst lítið koma til persónudýrkunar. Ekki á ég bol með mynd af Che, og langar ekkert sérstaklega mikið í svoleiðis bol. (Á reyndar bol með Lenín, en geng sjaldan í honum!) Ef ég yrði að velja, tæki ég samt Che-bol fram yfir Thatcher-bol - enídei! En persónudýrkun, nei takk. Það er sjálfsagt að taka sér til fyrirmyndar það sem aðrir hafa gert rétt eða vel, en persónudýrkun: Nei takk. Ég sá um daginn í glugga á bolabúð bol með Che og undir stóð Che Guemerkjavara ... það fannst mér fyndið.
Að lokum ein spurning: Er Che Guevara verri fyrirmynd heldur en Rambó?

Hurricane Katrina og olían -- R-listi -- ábendingar

Í gær, mánudag, fréttist að olíuborpallar á Mexíkóflóa hefðu verið rýmdir vegna fellibylsins Katrínar. Olíuverðið stökk upp fyrir 70$$ tunnan. Það er talað um að olíuverðið hækki vegna óstöðugleika á olíuvinnslusvæðum. Það er rangt. Olíuverðið fer hækkandi vegna þess að eftirspurnin er að fara fram úr framboðinu. Olíulindir sem borgar sig að vinna fara þverrandi, en enginn stjórnmálamaður virðist hafa vit á því að stinga upp á að við stígum á bremsuna. Þegar einn fellibylur getur verið upp gefin ástæða fyrir því að hækka olíuverðið upp í 70,80$ tunnuna - þá sýnir það kannski betur en nokkuð annað á hvílíkum bláþræði markaðurinn hangir.
Annars er þessi fellibylur hrikalegur. Ég svona hálf býst við því að lesa fréttir á næstu dögum, um að FEMA-búðir hafi verið opnaðar fyrir íbúa New Orleans. Þær fréttir hef ég ekki séð ennþá, en hver veit? Hitt sem ég get ekki annað en hugsað um, er hvort þetta fái fólk til að hugsa meira um hækkandi hita á jörðinni og tengsl hans við ofsafengnara veðurfar. Hrærir þetta við fólki? Ef það gerir það ekki, þá veit ég ekki hvað þarf til. Hér getur annars að líta athyglisvert kort sem sýnir ölduhæð á Mexíkóflóa.

Arngrímur lýsti því að hann sæi samstarfi R-listaflokkanna ekkert til fyrirstöðu eftir kosningar. Mínu svari, upphaflega í kommentum, fleygi ég hér líka:
1. Ef þeir ganga klofnir til kosninga, þá munu þeir veitast hver að öðrum til að reyna að fa sem flest atkvæði á kostnað hinna. Á því græða engir nema andstæðingarnir.
2. Eftir kosningarnar eru R-listaflokkarnir ekki skuldbundnir hver öðrum - ef Sjálfstæðisflokkurinn nær ekki hreinum meirihluta, þá ætti hann auðvelt með að mynda meirihluta með samfylkingunni.
Annað hvort bjóða menn fram saman eða þeir bjóða fram hver í sínu lagi. Það verður enginn R-listi eftir þessar kosningar og ef svo fer sem horfir mun Sjálfstæðisflokkurinn vinna stórsigur. Hrun R-listans voru stór strategísk mistök.

Það er komin ný grein á Gagnauga: Eitrað fyrir heiminum. Umfjöllunarefnið er gervisætuefnið aspartam, sem margir, nei, flestir, neyta í meiri mæli en ráðlegt er. Tékkið á henni. Jamm.

Á Vantrú er síðan komin grein sem er óvenjulega mikil ástæða til að vísa á: Þið eruð húmanistar - ekki kristin. Oft eru frábærar greinar á Vantrú, en þessi hittir súpervel í mark. Tékkið á henni líka, það er skipun!

Doddi var að lesa Why People Believe Weird Things eftir Michael Shermer, og mér sýnist honum líka vel. Ég þarf að fara að koma því í verk að lesa hana líka. Michael Shermer er snillingur, held ég að mér sé óhætt að segja.

Ég skýrði frá því um daginn, að ég mundi ekki sakna R-listans mikið. En viti menn, ég hef skipt um skoðun. Ég er á því núna að R-lista-samstarfið hefði átt að halda áfram eins og það var. Annars á borgarstjóri Reykjavíkur næsta kjörtímabil eftir að verða úr röðum íhaldsins. Sagði ég "annars"? Martröð er að rætast fyrir augunum á mér. Íhaldið tekur aftur yfir borgina og Gísli Marteinn er í brúnni. R-listinn hefur ekki verið sem bestur. En eins og karlinn sagði, held það hafi verið Jónas frá Hriflu, "Allt er betra en íhaldið" -- þótt ég hafi ekki saknað R-listans um daginn, þá verð ég farinn að gera það eftir svona ár. Ég verð ekki einn um það.
~~~ ~~~ ~~~ ~~~
Hvíta-Rússlandi var um daginn bætt á listann yfir "útverði harðstjórnar" sem Bandaríkin hafa í sigtinu. Hvíta-Rússland, landið sem enginn man eftir. Ég mæli með þessari grein.
~~~ ~~~ ~~~ ~~~
Pat Robertson er öfgamaður. Michael Rowland og Tony Eastley á ABC News reifa málið. Hafið þið séð annað eins? Er þetta ekki refsivert eða eitthvað? Þessi meistari, er fastur liður á Ómega. Það er viðeigandi. Þátturinn hans heitir The 700 Club og þar spýr hann sínu andlega eitri yfir áhorfendur sína. Lítið á "Hommahatur í Jesú nafni" og þetta líka. Hvaða stöðu hefur nú sá sem liðsinnir svona öfgamönnum og hjálpar þeim að dreifa hatursáróðri?

Ég er tískumógúll

Ég stóð á Hlemmi og beið eftir tólfunni. Framhjá mér stikar ungur maður, tæplega tvítugur, giska ég á. Hann var með barðastóran leðurhatt, íklæddur svörtum, allsíðum jakka, gallabuxum og í kúrekastígvélum. Hann hafði hárið í tagli og gleraugu á nefinu. Fyrir utan að minn svarti jakki er úr leðri en hans úr flóka, þá var hann eins klæddur og ég. Hatturinn hans var meira að segja brotinn á sama hátt og ég braut minn til skamms tíma.
Já, það fer ekki milli mála, ég er brautryðjandi þegar tískan er annars vegar. Ég byrjaði að safna hári, og ekki leið á löngu þar til flestir ungir menn virtust vera komnir með sítt hár. Ég fór að ganga í leðurbuxum, og áður en við varð litið sá ég annan hvern mann í leðurbuxum. Ég byrjaði að ganga með gadda-armband - og þau komust í tísku líka. Ég gæti látið dæluna ganga, en nenni því ekki. I've made my point. Ég elti ekki tískuna, ég leiði hana.

Nokkuð svakalegt að komast loks til fæðingarbæjar síns og hitta ættingja eftir allt að 60 ára fjarveru! En hvaða rugl er nú þetta? - "Á hverjum stað sem rúta ferðalanganna stöðvaði þustu þeir út til að skoða staði sem líktum sögulegum minjum sem finna má í Suður-Kóreu en þá töldu ferðalangarnir merki um að þótt landinu hafi verið skipt í tvennt þá eigi löndin sameiginlega sögu." Skítt veri með málfarið - en Kórea er eitt land. Eitt land, ein þjóð, tvö ríki.
~~~ ~~~ ~~~ ~~~
Nahh! Vasklega gert.
~~~ ~~~ ~~~ ~~~
1.-2. október næstkomandi verður ráðstefna á Ítalíu, um írösku andspyrnuna. Sjá einkum hér, einnig hér og hér.
Án þess að það þurfi að koma neinum á óvart, þá er þrýstingur frá Bandaríkjamönnum um að ítalska stjórnin hindri framgang þessarar ráðstefnu.
~~~ ~~~ ~~~ ~~~
Niðurstaða nýrrar rannsóknar: Pillur hómópata eru jafn gagnlegar og plasebó. Þ.e.a.s. lyfleysa. Nei, það kemur mér ekki á óvart heldur. Hómópatía er kukl og á ekki við rök að styðjast. Sá sem getur sýnt fram á að hómópatía virki getur, bæ ðe vei, eignast milljón dollara hjá James Randi.
~~~ ~~~ ~~~ ~~~
Niyasov Turkmenbashi, sem sér Morgunblaðinu fyrir skemmtilegum fréttum annað slagið, er kannski ekki eins frámunalega vinsæll í Túrkmenistan og halda mætti af fréttum af honum. Turkmenistan Liberation Organization bjóða stórfé til höfuðs honum. Nú veit ég ekkert hvaða klúbbur það er - kannski er þetta frontur fyrir einhverja sem hyggja flátt - en í öllu falli þykir mér þetta áhugavert.

Norður-Kórea - og Ísland

Norður-kóreskir vísindamenn hafa fundið upp nýja tegund af plasti, sem opinber fréttastofa Norður-Kóreu segir að sé alveg frábært. Meðal annars er sagt að það endist í meira en 50 ár. Hmm... voru þeir ekki að finna það upp? Hvernig vita þeir þá hvað það endist lengi?
Annars Norður-Kórea í 103. sæti á listanum yfir ungbarnadauða eftir löndum. Þar er ungbarnadauði minni en í Kína, Egyptalandi, Tyrklandi ... helmingi minni en meðaltal heimsins. Já, vissulega hangir Norður-Kórea á horriminni, en það hefur líklega sitt að segja að þar er heilbrigðisþjónusta ókeypis, svo og skólaganga, leikskólar, húsnæði og eitt og annað af því sem nauðsynlegt telst.
Vináttufélög Norður-Kóreu starfa í mörgum löndum. Samkvæmt þessum lista er til dæmis slíkt félag á Íslandi. Um félagatöluna veit ég ekkert, og reyndar ekkert nema nafn þess sem er gefinn upp sem fulltrúi félagsins á heimasíðum Norður-Kóreumanna, bæði á áðurnefndum lista yfir fulltrúa, og í tímaritinu Lodestar (PDF skjal, sjá síðu 9). Það væri athyglisvert að vita meira um þetta félag.
Nú, meira um Norður-Kóreu. Hún hefur diplómatísk samskipti við Ísland, í gegn um íslenska sendiráðið í Beijing og það norður-kóreska í Stokkhólmi (sjá Utanríkisráðuneytið: Sendi- og ræðisskrifstofur). Fréttastofan KCNA hefur síðan flutt ýmsar fréttir af samskiptum ríkjanna, sem af einhverjum ástæðum hafa allar farið fram hjá mér í íslenskum fréttum. Ég mundi endurbirta þær hér í fullri lengd ef þær tækju ekki of mikið pláss, svo ég vísa bara á þær í staðinn. Tékkið á þessu:
-* „Icelandic President on Relations with DPRK ... -- Iceland wishes to boost the relations with the DPRK and cooperate with it in the international arena, said Olafur Ragnar Grimsson, president of the Republic of Iceland, when receiving credentials from Jon In Chan, DPRK ambassador e.p. to Iceland, on June 15.“
-* „Greetings to Icelandic President ... on the occasion of the National Day of Iceland.“
-* „DPRK Foreign Ministry Arranges Friendly Meeting ... on the occasion of the 30th anniversary of the establishment of diplomatic relations between the DPRK and Nordic countries. Present on invitation were diplomatic envoys and embassy officials of Sweden, Denmark, Finland, Norway, Iceland in Pyongyang and guests of Nordic countries working in the DPRK.“
-* „Congratulations to Icelandic President ... on his reelection as president of the Republic of Iceland.“

Nepölsku sjöflokkarnir fallast á viðræður við maóista. (*) Það hlýtur að vita á gott: Maóistar geta þá fengið styrk af þingræðisflokkunum og þingræðisflokkarnir temprað maóistana, en hvorir tveggja hjálpast að við að slá konungdæmið af. Maóistar hafa lengi sagt vilja lýðræðislegt lýðveldi og að þeir gætu þá takið þátt í þinginu eins og aðrir flokkar. Til þess þarf fyrst að svipta konunginn völdum. Því fyrr sem það gerist, þess betra.
~~~ ~~~ ~~~ ~~~
Þjóð stendur í þjóðfrelsisstríði en er leidd af afturhaldsöflum - stalínistum, þjóðernissinnum eða klerkum, til dæmis. Málstaðurinn er réttur - forystan röng. Hvaða afstöðu ætti maður þá að taka? Annars vegar getur maður stutt góðan málstað skilyrðislaust og eftirlátið viðkomandi þjóð að velja sér sjálf forystu. Hins vegar getur maður stutt alþýðu viðkomandi þjóðar en andæft forystunni sem svíkur hana - en þá hefur maður um leið sett skilyrði fyrir stuðningnum við málstaðinn; - maður styður baráttuna án þess að styðja rétt viðkomandi þjóðar til að velja sína eigin leiðtoga.
Hvað er rétt í þessu? Ég er ekki viss. Ýmsar þjóðir eru í þessari stöðu - reyndar veit ég hreint ekki um mörg þjóðfrelsisstríð leidd af raunverulega framsækinni forystu - og maður styður málstað þeirra um leið og maður veit að forystan er brigðul. Á hinn bóginn er vafasamt að ætla sér að fara að hafa vit fyrir fjarlægum þjóðum - en á hinn bóginn, er ekki rétt að benda á það sem maður sér að fer aflaga??
Þetta er dilemma sem hefur klofið marga samstöðunefndina, margan kommaklúbbinn, og á eflaust eftir að halda áfram að gera það. Sá sem getur komið með gott svar við þessu verður sæmdur Lenín-orðunni þegar ég verð aðalritari í þessu landi. :)
~~~ ~~~ ~~~ ~~~
73% Breta vilja fórna borgararéttindum í skiptum fyrir meira "öryggi" (*) - það þýðir að hræðsluáróðurs-herferðin sem er í gangi virkar eins og hún á að gera. Hvað er hræðsluáróður annað en terrorismi án blóðsúthellinga? Hræðsla = terror, ekki satt? Sá sem útbreiðir hræðslu útbreiðir terror - hann er á bandi með þeim sem vilja aukna hræðslu, aukinn glundroða, aukið lögregluvald og eftirlit í samfélaginu.
Það eru ekki allir terroristar skuggalegir múhameðstrúarmenn með fjóra fingur af skeggi. Terroristarnir sem ráða úrslitum eru hvítir karlar í jakkafötum. Sumir hafa aðsetur í Washington og sumir í London - og fáeinir meira að segja í Reykjavík.
~~~ ~~~ ~~~ ~~~
"Televangelist Robertson Calls for Assassination of Venezuelan President" (*) - Pat Robertson, lærisveinn Ésú, handhafi sannleikans og kærleikans. Góðkunningi þeirra sem horfa á Ómega.
~~~ ~~~ ~~~ ~~~
Cindy „Sheehan has revealed both the strength and the weakness of the left. We have a political agenda that can command considerable mainstream support; yet we do not have a political leadership willing or able to articulate those agendas. We wield political influence; we lack legislative power.“ (*)
-- Gary Younge, The Guardian
~~~ ~~~ ~~~ ~~~
„The Pentagon, acting under instructions from Vice President Dick Cheney’s office, has tasked the United States Strategic Command (STRATCOM) with drawing up a contingency plan to be employed in response to another 9/11-type terrorist attack on the United States. The plan includes a large-scale air assault on Iran employing both conventional and tactical nuclear weapons.“ (*)
-- Philip Giraldi, frv. CIA Officer, The American Conservative
~~~ ~~~ ~~~ ~~~
Það styttist í 5. nóvember. Þann dag verða 400 ár liðin frá því upp komst um Gunpowder Plot Guy Fawkes og félaga árið 1605. Þar var nú eitt hryðjuverkið þar sem ekki var allt sem sýndist. Meira um það seinna.

Cindy Sheehan skrifar um baráttuna, hreinskilnina, hræsnina, lygarnar. Robert Shetterly skrifar um Cindy og þegar hann málaði málverk af henni.
~~~ ~~~ ~~~ ~~~
Bandarískur hermaður segist hafa haft fyrirmæli um að misþyrma föngum í Abu Ghraib.
~~~ ~~~ ~~~ ~~~
Kurt Nimmo skrifar um sálfræðihernað, sem hluta af Full Spectrum Warfare.
~~~ ~~~ ~~~ ~~~
Lesið um Operation Gladio - það var prógram sem snerist um að útsendarar CIA og NATO frömdu hryðjuverk á Ítalíu, sem kommúnistum var kennt um, til þess að réttlæta hertar "öryggis"ráðstafanir og koma í veg fyrir að kommúnistar kæmust til valda þar.
Í tengslum við þá ofbeldisöldu var Antonio Negri dæmdur í langt fangelsi. Sá sem skrifaði þetta er ekki hrifinn af Negri, kallar hann tækifærissinnaðan og trúgjarnan kjána.
~~~ ~~~ ~~~ ~~~
Ég trúi ekki opinberu sögunni um atburði 11. september. En ég tel reyndar að (a) það hafi flogið flugvél á Pentagon og (b) WTC-turnarnir hafi ekki verið jafnaðir við jörðu með sprengiefnum.
Varðandi flugvélina sem fór í Pentagon er engu að síður ýmislegt skrítið. Af hverju sést hún ekki á myndum úr öryggismyndavélum? Hvers vegna er flestum myndunum haldið leyndum? Hvers vegna sprakk eldhnötturinn eins og hann gerði? Hvernig fóru þeir sem flugu vélinni að því að fljúga henni í hrikalega krappa beygju áður en þeir brotlentu henni?

Satt ... en frekar dorkí.
~~~ ~~~ ~~~ ~~~
Lesið hinn ágæta greinarstúf „Harðlínumaðurinn vann umbótasinnann“ eftir Sverri Jakobsson aftur, og lesið því næst fréttina „Samansafn af afturhaldssinnum“ á Vísi. „Eru ráðherrarnir flestir taldir örgustu afturhaldssinnar og andsnúnir þeim umbótum sem fyrirrennarar þeirra á síðasta kjörtímabili hafa staðið fyrir.“ Gildishlaðið málfar? Frá hvaða sjónarhorni er þetta skrifað?
Svo lengi sem Bandaríkjamenn eru gráir fyrir járnum á þröskuldinum hjá Írönum, held ég að þeir ættu bara að koma sér upp kjarnorkusprengjum sem fyrst. Þannig gætu þeir tryggt sér fælingarmátt til þess að verja land sitt fyrir Bandaríkjunum. Það virðist ekki veita af. Hvað ætli Kalda stríðið hefði verið kalt ef Sovétmenn hefðu ekki átt kjarnorkusprengjur líka?
~~~ ~~~ ~~~ ~~~
Fleyg orð: „Einhverjir sakleysingjar héldu að Bush mundi kannski skipa aðra konu í hæstarétt. Það fólk skilur ekki eðli illskunnar.“ (Sverrir Jakobsson)
~~~ ~~~ ~~~ ~~~
Ian Blair segist ekki ætla að segja af sér - það mætti halda að hann væri Íslendingur. Staðinn að lygum um málsatvik þegar Brasilíumaðurinn saklausi var myrtur með köldu blóði, og hefur óspart varið þá stefnu bresku lögreglunnar að skjóta til að drepa. Þessi skíthæll ætti að segja af sér og það tafarlaust.
~~~ ~~~ ~~~ ~~~

„Yfirvöld í Lundúnum ætla að eyða milljónum punda í auglýsingaherferð sem miðar að því að fá ferðamenn til borgarinnar en þeim hefur fækkað mikið í borginni síðan hryðjuverkaárásirnar voru gerðar í lestum og strætisvagni borgarinnar þann 7. júlí síðastliðinn.“ (*)

Hér er ókeypis ráð handa borgaryfirvöldum London (ef þau kunna íslensku): Ástæðan fyrir því að ég er ekki iðandi í skinninu yfir að koma til London er sú að það er þrúgandi að vera þar og maður getur ekki um frjálst höfuð strokið. Síðast þegar ég var þar sá ég svo margar eftirlitsmyndavélar að mér leið beinlínis illa -- sumar myndavélastæðurnar minntu úr fjarlægð helst á furuköngla! Ég hlakka til að koma til London þar sem maður getur í sakleysi sínu farið óséður inn á pöbb og kveikt sér í vindli með samþykki húsráðanda. Hvenær eða hvort það verður veit ég ekkert um.
~~~ ~~~ ~~~ ~~~
Í staðinn fyrir að láta mótmælendur komast upp með múður verður bráðum hægt að halda þeim í skefjum með því að steikja á þeim húðina með þar til gerðri vél. Það verður aldeilis gaman að vera óánægður með ástandið þegar lögregluríkið er orðið svo yfirþyrmandi að það er ekki einu sinni hægt að andmæla því lengur.
~~~ ~~~ ~~~ ~~~
Hvað varð um mál Mumia abu Jamal? Hann, sem allir voru að tala um fyrir svona áratug síðan, situr ennþá í fangelsi og hefur það ennþá jafn skítt. Hafa íslenskir unglingar gleymt honum?
~~~ ~~~ ~~~ ~~~
90% Chechena undir fátæktarmörkum. Það setur að mér hroll yfir níðingsskap Rússa í Checheníu (já, Bandaríkjamenn eru ekki eini kölskinn!) ... þetta litla lýðveldi sem berst fyrir sjálfstæði og er beitt skefjalausu ofbeldi og valdníðslu.
~~~ ~~~ ~~~ ~~~
Tékkið á þessari snilld!

Eitt af einkennum óheiðarlegs eða óvandaðs málflutnings er þegar menn endurtaka röksemdir sem hafa þegar verið hraktar. George Bush sagði „Þeir vita að ef við tökumst ekki á við þessa vondu menn í útlöndum, megum við eiga von á að mæta þeim einn daginn í okkar eigin borgum og á okkar eigin götum. Þeir vita að það er öryggi hvers einasta Bandaríkjamanns í húfi í þessu stríði og þeir vita að við munum ekki gefast upp“ -- ég veit ekki hvort þessi maður er heimskingi, glæpon eða hvort tveggja (hallast helst að því síðastnefnda) - en mér er ennþá minnisstætt þetta athuglisverða viðtal við Robert Pape.
~~~ ~~~ ~~~ ~~~
Þessi grein Ármanns Jakobssonar fór framhjá mér -- en nú hef ég séð hana. Heyr heyr!
~~~ ~~~ ~~~ ~~~
Doddi skrifar um McLibel-réttarhöldin - þið ættuð að lesa það.
~~~ ~~~ ~~~ ~~~
„Páfi hvetur múslímaleiðtoga til að vinna gegn öfgum“ -- honum væri nær að hvetja stjórnmálaleiðtoga til að vinna gegn örbirgð og örvæntingu og gegn stríði og mannréttindabrotum.

Við Reykjavíkurtjörn suðvestanverða stendur stórt, dökkgrænt tjald, sem til skamms tíma stóð við Kárahnjúka. Það tjald hefur tekið við hlutverki mótmælabúðanna eða, réttara sagt, hýsir núverandi mótmælabúðir. Lítið endilega við ef þið eigið leið hjá. Þarna verður dagskrá fram að mánaðamótum.
Á morgun verður mótmælaskrúðganga frá Hallgrímskirkju kl. 13 og gengið niður að Tjörn/í Hljómskálagarð þar sem verður sprell. Komið og takið þátt. Mótmælendurnir, sem iðulega eru látnir líta út eins og ungæðislegir, nytsamir sakleysingjar, ellegar þá ofstopafullir öfgamenn, hafa verið hafðir fyrir rangri sök. Þetta er hið ljúfasta fólk.
~~~ ~~~ ~~~ ~~~
Andfélgsleg [sic] hegðun nudduð á brott - þetta minnir mig næstum bara á "Galdra og pólitík". Að kalla hegðun barna úr fátækrahverfum "andfélagslega" er einfaldlega tilraun til þess að kriminalisera kúltúr æskunnar. Það leysir engan vanda heldur býr til afbrotamenn úr krökkum sem hafa ekkert gert af sér. Vandamálin, sem vissulega eru til staðar í fátækrahverfunum, stafa af fátækt. Það er fátæktin sem þarf að leggja til atlögu við, og það verður ekki gert með neinu handleggjanuddi. (Kannski að þetta nudd sé samt í sjálfu sér ekkert slæm hugmynd...)
~~~ ~~~ ~~~ ~~~

Eini maðurinn sem dæmdur hefur verið vegna hryðjuverkaárásanna gegn Bandaríkjunum var í dag dæmdur í sjö ára fangelsi fyrir þýskum dómstól þegar mál hans var tekið þar fyrir að nýju. Maðurinn, Mounir Motassadeq sem er marokkóskur, var dæmdur fyrir að hafa verið félagi í hryðjuverkasamtökum en dómurinn var kveðinn upp í Hamborg.
Hins vegar var kveðið upp fyrir dómnum að engar sannanir lægju fyrir um að Motassadeq, sem er 31 árs, tengdist árásunum í Bandaríkjunum með beinum hætti. (Mbl)

Hann tengdist árásunum 11. september ekki, segir dómstóllinn. Það hefur enginn annar maður verið dæmdur fyrir aðild að árásunum, og dómi þessa náunga var hnekkt/breytt við áfrýjun. Athugið svo eitt: Á skjalinu þar sem Ósama bin Laden sjálfur er eftirlýstur af FBI eru talin upp nokkur ódæði sem hann er sagður tengjast -- en þar er 9/11 ekki á meðal! Hverju sætir??
~~~ ~~~ ~~~ ~~~
„Grátandi fjölskyldur voru dregnar út af heimilum sínum og settar nauðugar upp í flutningabíla“ (*) og „[í]sraelskir lögregluþjónar og landnemar grétu saman þegar brottflutningur hófst frá stærstu landnemabyggð gyðinga á Gaza-svæðinu í dag.“ (*)
... mér sýnist hluttekningin vera talsvert meiri hjá Vísi, þegar það eru gyðingar sem eru fluttir nauðungarflutningum, en mig minnir að hún sé þegar Palestínumenn eiga í hlut. Ég hef spurt mig hvort fréttaflutningur af þessu sé of mikill. Þetta er PR-stunt og taktískt undanhald, sem er til þess hugsað að slá ryki í augu heimsbyggðarinnar og láta líta út fyrir að Ísraelar séu þó að gera eitthvað. En í raun eru þeir bara að styrkja sína eigin vígstöðu með því að sleppa takinu af nokkrum stöðum sem eru mjög kostnaðarsamir. Á sama tíma eru þeir í óða önn að koma upp aðskilnaðarmúrnum og dettur ekki í hug að leggja niður stærri landtökubyggðirnar á Vesturbakkanum - sem eru, allar sem ein, kolólöglegar. Athugið líka að annars vegar þessi aðgerð er einhliða en ekki í samráði við Palestínsku heimastjórnina. Hins vegar er það auðvitað sigur í sjálfu sér fyrir Intifada Palestínumanna, að þeim takist að hrekja Ísraela úr víghreiðsum sínum á Gaza. Það er sigur fyrir Intifada, og ekki skrítið að Palestínumenn fagni því sem vissulega er sigur, þótt varnarsigur sé.
~~~ ~~~ ~~~ ~~~
Næstum því allir Íslendingar voru á móti því að Ísland styddi árásina á Írak. Samt mættu ekki nema nokkur þúsund manna á útifund til að mótmæla henni. Jafnvel þótt það væri gott veður. En þegar til stendur að horfa á trúða og drekka áfengi, þá er búist við 100.000 manns. Ég get ekki annað en sagt það sem mér dettur í hug, þótt ég viti að það sé óvinsælt meðal margra skoðanasystkina minna:
Það er eitthvað bogið við þennan mótmælakúltúr. Annað hvort er eitthvað að (a) mótmælum sem slíkum eða (b) þjóðinni sem slíkri. Eða eru fleiri möguleikar? Ég sé ekki betur en að annað hvort sé brotalömin sú að mótmælafundir séu illa sóttir vegna þess að fólk telur þá ekki hafa nein áhrif, ellegar þá að fólki standi svo á sama að það nenni ekki að standa upp af rassgatinu og slökkva á sjónvarpinu í einn klukkutíma.
Því miður held ég að það sé ekki sanngjarnt að segja að það sé fólkið sem sé svona miklir vitleysingar. Mótmælafundir eru fyrirsjáanlegir og ráðamenn búast við mótmælum þegar þeir taka ákvarðanir sem þeir vita að eru óvinsælar. Hvenær áorkaði mótmælafundur síðast einhverju á Íslandi? Þá held ég nú að beinar aðgerðir, hvort sem þær eru að hlekkja sig við vinnuvélar eða sökkva hvalaskipum, séu nú árangursríkari. En ennþá erum við reaktíft-megin við hið pólitíska frumkvæði.
Fólk vill búa við annars konar samfélag. Eftir hverju er það að bíða, með að byggja það bara upp? Það gerist ekki af sjálfu sér, sama hversu lengi við bíðum. Nýtt samfélag verður ekki skapað á löggjafarþingi. Og umfram allt verður það ekki að veruleika með því að mótmæla sjúkdómseinkennunum á því gamla. Jamm, það er ekki eftir neinu að bíða.
Segi ég og held áfram að sitja á rassgatinu sjálfur.
~~~ ~~~ ~~~ ~~~
„Lögregla ósátt við aðdróttanir“ um að hún láti undan pólitískum þrýstingi. Ja, ég er bara ósáttur við að hún láti undan honum. Ef hún hættir því, þá hætta líka „aðdróttanirnar“. Aðfarirnar gegn mótmælendunum hafa verið lögreglunni til háborinnar skammar. Ofbeldi, hótanir, einelti, njósnir. Símahleranir, heimildarlausar húsleitir, hrindingar á prófessorum á áttræðisaldri, óeðlilega mikil eftirför í leyfisleysi ... án þess að neitt af glæpasamtökunum sem eru að fremja umhverfisspjöll fyrir austan hafi lagt fram kæru (af ótta við neikvæða umfjöllun og að í málaferlunum verði dreginn fram skítur um þá). Þrýstingurinn er pólitískur. Þeim er gefið að sök að vera ógn við öryggi og allsherjarreglu. Ógn við öryggi eru þeir ekki, og hvað í andskotanum er eiginlega allsherjarregla? Er hún skilgreind í lögum? Nei, þeim verður bolað úr landi til þess að hindra þau í að viðra skoðanir sínar. Auk þess verður síðasti mótmælandinn hvort sem er farinn af landinu fyrir mánaðamót, þannig að brottreksturinn - ólöglegur, að sjálfsögðu - er ekki til þess gerður að koma þeim úr landi heldur er hann pólitískur, og til þess að þeir eigi ekki afturkvæmt næstu árin.

Já, lögregluofbeldi getur líka gerst hér.

„Harvard-háskóli í Bandaríkjunum er besti háskóli í heimi, samkvæmt lista ... yfir 500 bestu háskóla í heiminum. ... Enginn íslenskur háskóli er á listanum, að því er fram kemur á heimasíðu Aftenposten.“ (Mbl.)

Ha, kom það fram hjá Aftenposten að enginn íslenskur skóli væri á listanum? Hver bjóst við því? Hvaða íslenski skóli hefði átt að komast á þennan lista?
~~~ ~~~ ~~~ ~~~
Jæja, þetta er nú metnaðarfullt.
~~~ ~~~ ~~~ ~~~
Ég hef undanfarin 20 ár búið við gamla kirkjugarðinn í miðbæ Reykjavíkur. Í mörg ár hef ég leitað að svolitlu, sem ég fann síðan loksins í fyrradag! Það er sveppur sem ég hef heyrt að vaxi hvergi annars staðar á Íslendi en í þessum eina kirkjugarði - og ber það skemmtileg anafn fýluböllur. Þetta er réttnefni; hann lítur út eins og mjólkurhvítur tittlingur af manni, með dökkan hatt (eða ætti ég að segja kóng?), og þegar hróflað er við honum leggur af honum ákaflega vonda lykt - sem minnir helst á lyktina af soðnum mannaskít, ef einhver kannast við hana. Já, gleðidagur var þetta.
~~~ ~~~ ~~~ ~~~
Paprikurnar í glugganum mínum braggast vel. Ein paprika gægðist út úr jurt fyrir svona þrem vikum og vex rólega - önnur er nýkomin fram, og á jurtunum eru knúppar eða grænjaxlar sem eru vísir að a.m.k. 15 í viðbót. Það er gaman að þessu. Ég hef komist að því að ég hef kannski verið helst til nískur á vatnið. Þær sem ég hef vökvað mikið (í það mesta, hélt ég), hafa vaxið hraustlegar en hinar sem ég hélt að ég vökvaði eðlilega mikið. Þannig að núna er ég orðinn örlátari á vatn handa þeim.

21 útlendingi verður vísað úr landi fyrir ýktar og lognar sakir, 21 útlendingi sem þykir það mikið til landsins okkar koma að þau gerðu sér sérstaka ferð hingað til að berjast gegn eyðileggingu þess. Ég trúi því varla upp á Íslendinga að Kárahnjúkavirkjun sé að verða að raunveruleika. Þvílíkt flakandi sár í stærsta ósnortna víðerni sem fyrirfinnst í Evrópu. Að ríkisstjórnin skuli dirfast að leggja blessun sína yfir þetta -- nei, stuðla beinlínis að þessu -- á sama tíma og hún reynir að markaðssetja þetta vesalings land sem náttúruperlu norðursins. Perla schmerla. Eftir 20 ár verður ekki fallegt um að litast. Þá mun fólk allt í einu vakna upp við vondan draum: Hvað varð um fegurð landsins okkar? Hvað létum við gerast?
Kvótakerfið er að ganga af landsbyggðinni dauðri og fólk lætur það yfir sig ganga. Ef ég væri vestfirskur trillukarl, haldið þið að ég mundi láta bjóða mér að mega ekki róa til fiskjar? Ekki aldeilis. ÉG skil ekki í mönnum að brjóta ekki þessi fábjána lög. Óréttlátum lögum ætti enginn að fylgja. Ríkisstjórnarflokkarnir eiga hagsmuna að gæta í kvótakerfinu þannig að ekki munu þeir afnema það. Ekki forsætisráðherrann sem í tíð sinni sem sjávarútvegsráðherra kom því á til að byrja með. Til að fylla vasana af blóðpeningum. Júdasargulli. Kemur sínu eigin fólki (nema auðvitað sínum allra nánustu) á vonarvöl og býður svo upp á þetta helvítis rusl í staðinn, virkjun og álver. Að þetta eigi að laga atvinnuástandið er ryk sem slegið er í augu auðtrúa fólks, en er í raun skálkaskjól til þess að bandarísk stórfyrirtæki geti mokað inn peningum með því að rústa litla sæta landinu okkar.
Eigum við skilið að búa í þessu fallega landi ef við förum svona með það? Tja ... ef við skemmum það, þá verðum það víst við sem sitjum í drullunni í framtíðinni. Þeim svíður sem undir mígur. Verði okkur bara að góðu.
Ef á ferðinni væri heiðarlegur vilji til að forða sjávarplássum landsins frá hruni, þá yrði kvótakerfinu gjörbreytt og kvótanum úthlutað til sveitarfélaga sem byggðakvóta.

21 útlendingi verður sparkað úr landi, ólöglega, fyrir að mótmæla ólöglegri virkjun og ólöglegu álveri.

21 píslarvottur.

Palestína, R-listinn, smávegis fleira

Landtökukona kveikir í sér í mótmælaskyni. Þessi hreyfing messíanskra þjóðernis-bókstafstrúarmanna, Appelsínustakkarnir, er vægast sagt varasöm. Þeir nota sama einkennislit og stuðningsmenn Jústsénkós í Úkraínu og láta eins og þeir séu ísraelska útgáfan af sams konar hreyfingu, sem þeir eru ekki. Þeir eru fasistahreyfing í fæðingu - eða, réttara sagt, nýfædd fasistahreyfing. Þeir eru margir, mótiveraðir, öfgafullir, ofbeldishneigðir, sannfærðir um guðlegt réttmæti sitt og fullir af fyrirlitningu á nágrönnum sínum, Palestínumönnum. Því lýðræði, sem þrátt fyrir allt hefur þrifist í Ísrael, er líka hætta búin af þessum brjálæðingum. Svona samhentur, fjölmennur og vel skipulagður hópur á nefnilega frekar auðvelt með að taka völdin. Avnery spáir borgarastríði í Ísrael. Ég held að það sé of mikil bjartsýni. Frammi fyrir svona kónum kemur almenningur sjaldan nokkrum vörnum við. Þeir munu sennilega taka völdin án þess að þeim verði veitt ýkja mikil mótspyrna.
Þá verður grátur og gnístran tanna. Þá fyrst verður þjóðernishreinsun, sem um munar, framkvæmd á Palestínumönnum. Án þess að lítið sé gert úr þjáningum þeirra hingað til. „Ýtt út í eyðimörkina.“
Ekki síður uggvænlegt er til þess að hugsa, að það sama gæti gerst í Bandaríkjunum. Þar eru kristnir bókstaftrúarmenn voldugir og ríkir og með drjúgan hluta þjóðarinnar á sínu bandi. Demókratar eru í besta falli hlægilegir, í versta falli glæpsamlegir, þykjast vera valkostur við últra-hægrimenn, en eru ekki nema „diet últra-hægri“, ef svo má að orði komast. Í Bandaríkjunum er enginn sem núna er reiðubúinn að verja lýðræði og mannréttindi heima fyrir ef til kastanna kemur. Enginn. Eina aflið sem er fært um það er almenningur sjálfur, en hann er sjóvgaður og værukær, áhugalaus og afvegaleiddur - og auk þess óskipulagður.
Gott er til þess að hugsa að svona getur aldrei gerst á Íslandi. Nei, íslenskur almenningur er vakandi og með á nótunum. Lýðræðið stendur föstum fótum hérna vegna þess að almenningur stendur um það vörð. Hér kemst enginn upp með að fótum troða vilja almennings eða beita lúabrögðum eða baktjaldamakki til að ná sínu fram. ...
~~~ ~~~ ~~~ ~~~
Þegar umhverfisvinir héldu lautarferð á Austurvelli um helgina, þá þurfti valdstjórnin auðvitað að mæta og minna á hvað armur hennar væri langur. Handtók einn fyrir engar sakir og misþyrmdi prófessor á áttræðisaldri. Handtakan hefur fengið nokkra umfjöllun í fjölmiðlum, en hvernig stendur á því að maður hafi ekkert séð um prófessorinn sem var lemstraður eftir lögregluna?
Annars er komið upp tjald við Reykjavíkurtjörn (við suðvesturenda stóru tjarnarinnar), þar sem eitthvað verður um að vera á næstunni.
~~~ ~~~ ~~~ ~~~
Eins og R-listinn hefur verið upp á síðkastið held ég að ég eigi ekki eftir að sakna hans. Það er reyndar synd hvernig hefur farið fyrir þessu þó merkilega framtaki, að sameina vinstrivænginn og koma íhaldinu frá völdum í borginni – um leið og það er lærdómsríkt að listinn hafi á endanum kiknað undan sjálfum sér. R-listinn er ábyrgur fyrir ófáum heimskupörum sem gera það að verkum að áframhaldandi seta hans á valdastólum hefði ekki verið neitt sérstaklega jákvæð. Mun íhaldið standa sig betur? Ég efast um það (þótt ég viti það auðvitað ekki með vissu). Vilhjálmur Vilhjálmsson sagði í Mogganum að það góða gengi sem Sjálfstæðismenn væntu í komandi borgarstjórnarkosningum væri ekki að þakka klúðri R-listans heldur því sem Sjálfstæðismenn hefðu gert sjálfur. Della. Sjálfstæðismenn hafa veitt R-listanum aðhald á sama hátt og stjórnarandstaða gerir vanalega: Með því að gagnrýna flest sem stjórnin gerir. Sumt hefur vissulega hitt í mark, annað hefur verið klúðurslegra. Þegar öllu er á botninn hvolft reynist R-listinn fullfær um að skemma sjálfan sig innan frá upp á eigin spýtur.
Eins auðvelt og manni virðist það hefði gerað verið, að lappa upp á hann, eða jafnvel blása alveg nýju lífi í hann. Ef ég hefði ráðið þessu hefðu Framsóknarflokkurinn og skransalinn fengið að róa. Það hefði verið það fyrsta. Þátttaka og hlutverk Framsóknarflokksins nægir mér sem ástæða til að kjósa ekki R-listann. Síðan hefði ég boðið Frjálslynda flokknum að taka þátt í listanum á jafningjagrundvelli. Össur Skarphéðinsson hefði orðið borgarstjóraefnið og tveir varaborgarstjórar yrðu tilnefndir, annar úr VG og hinn úr F-listanum. Sætunum á listanum hefði ég skipt svona: SVFÓSVÓFSVFSVF þar sem S er Samfylking, V eru VG, F er F-listi og Ó eru óháðir. Meðal málefna á stefnuskrá fyrir kosningarnar hefði ég sett: Bindandi atkvæðagreiðslu um framtíð Reykjavíkurflugvallar, hvort eigi að leggja hann niður við fyrsta tækifæri eða ekki. Miklar endurbætur á leiðakerfi Strætó, og að ókeypis verði í Strætó, alltaf og fyrir alla. Þéttari byggð í formi fleiri háhýsa nálægt miðbænum. Aðkoma borgarinnar að orkusölu til stóriðju yrði líka lögð undir atkvæði.
Nýr R-listi hefði unnið stórsigur, Framsóknarflokkurinn þurrkast út og íhaldið lotið í lægra haldi aftur. Flókið, ekki satt?
Það er sagt, að þegar menn setjast að samningaborði, eigi þeir að tala saman á þeim nótum að þeir ætli að semja – það er að segja, ef þeir ætla það í alvörunni. Annað hvort hefur viðræðunefndin um framtíð R-listans ekki vitað þetta, ellegar þá að einhverjir í henni vildu innst inni ekki semja, giska ég á. Hverjir það hefðu átt að vera veit ég ekki og þykist ekki vita. En í öllu falli hefur þessu merkilega framtaki verið klúðrað, virðist vera.
~~~ ~~~ ~~~ ~~~
Í ljós er komið að ýmislegt er gruggugt við frásögur lögreglu af dauða Brasilíumannsins í London um daginn.

Um leið og ég styð málstað hinna alræmdu mótmælenda heilshugar (og líkar býsna vel við þá þeirra sem ég hef kynnst), þá hef ég miklar efasemdir um ýmsar aðferðir sem þau hafa notað, svo ég taki ekki dýpra í árinni. Eða, réttara sagt, sumt held ég að þau hefðu átt að láta ógert. Veggjakrot í miðbænum, hvaða gagn gæti það gert? Gerir það nokkuð annað en að gera mótmælendurna að krökkum með skemmdarfýsn í augum almennings? Kannski afla málstaðnum nokkurra "píslarvotta" með því að fólk geti bætt einni eða tveim handtökum á afrekaskrána? Úða málningu á Jón Sigurðsson? Hvers á hann, af öllum mönnum, að gjalda? Hvers vegna henda þau ekki frekar grjóti í gegn um stofugluggann hjá Friðriki Sófussyni (forstjóra Landsvirkjunar) eða eitthvað? (Nei, ég er ekki að hvetja til þess, en FS stendur óneitanlega nær málinu en JS!)
~~~ ~~~ ~~~ ~~~
Það sem mér þætti bjútifúl dæmi um borgaralega óhlýðni, í þágu íslensku landsbyggðarinnar, væri þetta: Allir landsins trillukarlar og bátaeigendur róa út á miðin og veiða eins og þeir geta, hvort sem þeir hafa kvóta eða ekki. Ef allir gera það er ekki hægt að handtaka neinn fyrir það. Hugmyndin er að með þessu væri mótmælt í verki kvótakerfinu sem er eins og kyrkingaról á hálsi margra útgerðarplássa. Eiga trillukarlar landsins að láta kyrkja sig án þess að mögla? Ef þeir vilja það, verði þeim þá að góðu. En ef þeir vilja gera eitthvað og stjórnmálamennirnir sitja með hendur í skauti, er þá til betri leið en þessi?

Í hörðum átökum í Nepal nýlega segjast maóistar hafa misst 26 menn, fellt 159 hermenn og tekið 52 til fanga. Herinn leitar 76 manna sem er saknað. Foringi í hernum lýsti árásunum eins og "hver bylgjan kæmi á eftir annarri". (*) - það verður ekki betur séð en að maóistarnir séu í stórsókn (þótt tölurnar sem þeir gefa upp séu án efa ýktar). Prachanda formaður segir að föngunum verði sleppt í fyllingu tímans, en þeir fái mannúðlega meðferð. (*) Er það satt? Tja, hvað veit ég? Í það minnsta segir nepalski herinn öðru vísi frá: Að föngnum hermönnum hafi verið stillt upp í röð og þeir skotnir í höfuðið. Hvað hæft er í þessu veit ég ekki, en mér finnst herinn oftast virka ótrúverðugri en maóistarnir.

Í Venezúela: Hugo Chavez staðfestir eignarhald ættbálks indjána á erfðalandi sínu, fyrsta slík staðfesting af mörgum fyrirhuguðum. Gott hjá honum að láta innfædda njóta réttlætis.

Mike Ferner skrifar um Cindy Sheehan, móður fallins hermanns: „What One Mom has to Say to Bush“.

Úr þrælabúðum Norður-Kóreu, þar sem um 200.000 manns eru taldir dúsa, mun standa til að láta einhvern fjölda fanga lausan. Gott ef satt er.

Á Al Jazeera segir frá því hvernig bandarískir hermenn hafi stillt upp vopnum við lík af Írökum (og íraska fanga) og kallað það svo fallna andspyrnumenn, sem í raun voru fallnir óbreyttir borgarar. Margir jafnvel á unglingsaldri. Annað eins hefur nú skeð. Það er þekkt hvernig Hinn konunglegi her Nepals klæðir dauða menn í maóistabúninga og segist hafa drepið einhver ósköp af byltingarmönnum.
Þegar herir eða aðrar vígasveitir grobba sig sjálfar af mannfalli í röðum óvina, þá er ástæða til að taka öllum tölum (og öðrum upplýsingum) með fyrirvara. Auðvitað reyna allir styrjaldaraðilar að gera sinn hlut sem mestan og hermanna sinna sem bestan, og hverjum dettur í hug að stríð sé einskorðað við vígvöllinn? Nei, það er ekki síður háð í fjölmiðlum, þar sem barist er um almenningsálit, trúverðugleika og traust eða hræðslu. Sérhver her reynir að virðast ósigrandi, og reynir að láta andstæðinga sína sýnast veika á svellinu.
Þegar menn hafa hag af því, að fólk haldi á annan veginn eða hinn, hver sem sannleikurinn er, þá er rétt að efast sérstaklega um hreinskilni þeirra!

Bush hefur breytt áherslunum. Núna er það ekki langur "stríð gegn hryðjuverkum" heldur "stríð gegn ofbeldisfullum öfgamönnum". Robert Higgs skrifar um þetta. Ef þið spyrjið mig, þá er Bush sjálfur einmitt fyrirtaks dæmi um ofbeldisfullan öfgamann. Hann er bókstafstrúaður. Hann hefur á að skipa máttugum drápstólum og hann er ófeiminn við að nota þau til að drepa annað fólk fyrir sinn "göfuga málstað" að auka völd bandarísku valdastéttarinnar í heiminum, einkum og sér í lagi það sem lýtur að olíu.

Michael Chossudovsky skrifar um hinar "einkennilegu tilviljanir" að árásirnar 7/7 og 9/11 skyldu báðar verða á sama tíma og áætlaðar voru öryggisæfingar sem gengu út á sams konar atburði og gerðust svo í alvörunni: "7/7 Mock Terror Drill: What Relationship to the Real Time Terror Attacks?" ... já, svei mér skrítin "tilviljun"!

Það hefur varla farið fram hjá mörgum að fyrirhuguðum brottflutningi frá Gaza er mótmælt af miklum krafti í Ísrael. Í því samhengi vil ég minna á grein Uri Avnery, "March of the Orange Shirts", frá 25. júlí sl. - þar sem hann gerir grein fyrir þessari hreyfingu landtökumanna og bókstafstrúaðra ný-fasista í Ísrael og hvernig þeir ógna öllum í kring um sig.
~~~ ~~~ ~~~ ~~~
Ég held að R-listinn ætti að láta Framsóknarflokkinn róa og bjóða Frjálslynda flokknum um borð til sín í staðinn. Framsóknarflokkurinn er fimmta hjól undir vagni R-listans, lítill, spilltur, óvinsæll, og með gamlan skransala í forystu. Ég held að hann fæli fleiri kjósendur en hann trekkir. Mig alla vega.
Talandi um borgarmálin, þá er ég hæstóánægður með nýja leiðakerfi Strætó. Það er kolómögulegt og ábyrgðarmönnum þess til skammar.
~~~ ~~~ ~~~ ~~~
Sjáið blaðsíðu 9 í Fréttablaðinu í dag. Tekur einhver eftir undirtóninum?

Jóhannes Björn hefur að undanförnu skrifað röð af greinum um brýnasta úrlausnarefni vorra tíma, endalok olíualdar (1, 2, 3, 4). „Hvað gerist næst?“ heitir nýjasta grein hans, þar sem hann fylgir hinum eftir. Ég hvet fólk til að lesa þetta. Hvet fólk eindregið til þess.

Pentagon skissar upp áætlanir um herlög í Bandaríkjunum ef hryðjuverk yrðu gerð. Hryðjuverk og herlög? Ætli FEMA yrði þá ekki kallað til? Hvet fólk til að lesa sér til um FEMA Camps, net fangabúða sem Federal Emercency Management Agency hefur til ráðstöfunar víðs vegar um Bandaríkin. Margar þessara búða eru frá dögum síðari heimsstyrjaldar, þegar Bandaríkjamenn af japönskum uppruna voru settir bak við lás og slá í fangabúðum, en verið haldið við fram á þennan dag ... aðrar búðir eru nýrri. Ef það þarf, með skömmum fyrirvara, að rýma heila borg, t.d. vegna náttúruhamfara eða ofboðslegra hryðjuverka, þá er hægt að hýsa íbúana þarna. Jafnvel þótt þeir vilji það ekki.
~~~ ~~~ ~~~ ~~~
...og talandi um búðir, þá fengu hinir alræmdu mótmælendur lögreglufylgd frá Vaði í Skriðdal. Það er bara það. Hins vegar virðist lögreglan ekki sjá ástæðu til að hafa afskipti af mönnum sem eru að fremja hryðjuverk gegn náttúrunni uppi á Kárahnjúkum. Ómetanlegt tjón. Þeir starfa nefnilega í skjóli ríkisvaldsins. Sýnir hverjum valdstjórnin þjónar, þegar öll kurl koma til grafar. Minnir mig á það sem hefur verið sagt: Öflugustu glæpamennirnir brjóta ekki lögin heldur setja þau. Öflugustu glæpamennirnir eru það öflugir að þeir eiga auðvelt með að ná nægilega sterkum tökum á ríkisvaldinu til að láta lögin þjóna sér. Sama má segja um hryðjuverkamenn. En þegar hugsjónafólk vill ekki láta eyðileggja óspillta náttúru? Ungæðislegur mótþrói í óuppdregnum slordónum sem hafa ekki lært það ennþá að náttúruspellvirki eru framfarir og reykspúandi skorsteinar líka.

Ég veit ekki hvort ég get fallist á að það sé kölluð borgaraleg óhlýðni að hlekkja sig við vinnuvél. Það flokkast a.m.k. tvímælalaust ekki undir borgaralega óhlýðni að úða málningu á skilti eða skúra. Mundi það ekki heita bein aðgerð? Ég mundi halda að það flokkaðist líka undir beina aðgerð að hlekkja sig við vinnuvél, liggja fyrir jarðýtu o.þ.h. Sem slíkar eiga beinar aðgerðir gegn Kárahnjúkavirkjun fulla samúð mína, hvað sem líður einstökum aðgerðum. Mundu skyrslettur flokkast undir beinar aðgerðir? Bein aðgerð er ekki ofbeldisfull, svo ég held að skyrslettur að séu (í besta falli) á mörkunum, þegar þeim er ætlað að skjóta fólki skelk í bringu. Um borgaralega óhlýðni er það annars að segja, að hún felst einkum í því að neita að hlýða ósanngjörnu yfirvaldi, en gera það friðsamlega. Reykvíkingar gripi til borgaralegrar óhlýðni í fánatökumálinu 1913: Einar Pétursson hafði hvítbláan fána ólöglega í skutnum á bát sínum á Reykjavíkurhöfn og skipherra á dönsku herskipi tók hann af honum. Reykvíkingar mótmæltu með því að draga hvítbláa fánann á allar fánastangir í bænum, og hver sótraftur á sjó dreginn og siglt á höfninni með hvítbláann í skutnum. Það var líka borgaraleg óhlýðni þegar svertingjar í Suðurríkjum Bandaríkjanna eða Suður-Afríku settust á bekki sem voru aðeins ætlaðir hvítum mönnum.

Fyrirtæki hafa réttarstöðu sem minnir á réttarstöðu manneskju. Fyrir utan að maður sem flytur hingað og hefur sakaskrá er rekinn úr landi, meðan sakaskrá fyrirtækja á borð við Bechtel virðist engu máli skipta né hindra að þau geti haft mikil umsvif hér á landi, jafnvel byggt heilu álverin.
~~~ ~~~ ~~~ ~~~
...og talandi um hryðjuverkamenn: Bretar plana leynileg réttarhöld yfir þeim sem eru taldir tengjast hryðjuverkum.
~~~ ~~~ ~~~ ~~~
Ísraelski herinn skýtur palestínskan brúðguma og ísraelskir öfgamenn stefna að því að ganga á Musterishæðina 14. ágúst næstkomandi.
~~~ ~~~ ~~~ ~~~
Stefán Pálsson skrifar um kjarnorkusprengjurnar á Hiroshima og Nagasagi á Friðarvefinn. Guðmundur Svansson svarar á Deiglunni, Stefán svarar Guðmundi á bloggi sínu og Guðmundur svarar svo aftur á sínu. Það er áhugavert að lesa þessa umræðu.

Kominn heim og hér með tek ég upp þráðinn...

Að gefnu tilefni varðandi síðustu færslu hér, þá er hin ágæta lesning, sem ég vísaði í, í raun réttri viðtal, ekki grein (þótt ég hafi kallaða það grein af fljótfærni). Það breytir því auðvitað ekki að heimildirnar skortir eftir sem áður, en ætli gegni ekki nokkuð öðru máli um viðtal heldur en grein? Í öllu falli eru það einkum socio-económískar og pólitískar hliðar hryðjuverka og jarðveginn sem þau spretta upp úr, og hann er aðspurður að greina frá niðurstöðum sínum. Ætli sé ekki heimildaskrá í bókinni?
Hvað er al Qaeda? Samtök serkneskra skuggabaldra sem lúta hinum volduga Ósama, gnísta tönnum Vesturlönd og þrá hreinar meyjar á himnum? Frontur sem sinister element innan vestrænna valdastétta nota til að afla sér skálkaskjóls til herskárrar utanríkis- og innanríkisstefnu? Hvort tveggja í senn?
Í öllu falli, hvað svo sem eðli al Qaeda er, þá sé ég ekkert að því að tala um al Qaeda sem tiltekið fyrirbæri.

Maulið á þessu meðan ég verð í útlöndum næstu vikuna

...viku frí frá mér, en þið fáið heimavinnu...
Skömmu fyrir árásirnar 11. september 2001 var óvenjulega mikið um skortsölu á hlutabréfum í bandarískum flugfélögum og öðrum sem hrundu í verði við árásirnar. Með öðrum orðum, einhverjir treystu sér - í krafti einhverrar vitneskju - til að veðja á að verðið mundi hrynja. Hverjir þetta voru er ekki vitað, en sumir segja að þeir hafi verið ísraelskir.
Fyrir 7/7-árásirnar í London endurtók sagan sig. Einhverjir skortseldu sterlingspund vegna þess að þeir höfðu vitneskju um að árásirnar væru yfirvofandi. „Hver skortseldi sterlingspundið?“ spyr Joseph Farah í samnefndri og alveg hreint ágætri grein. Já, hver? Það er svo gott sem útilokað að rekja rækilega falda slóðina, en sá sem gerði það vissi meira en almenningur. Einn möguleiki sem Farah nefnir - og gæti vel hugsast - er að hryðjuverkasamtök (eða hver sem stóð að þessum voðaverkum) láti árásirnar borga sig sjálfar með því að græða á veðmálum í kring um þær. Það væri svo sannarlega hugvitssamleg - og samviskulaus - aðferð til að græða peninga. Hvort sem Ísraelar voru á bak við 9/11 eða ekki, þá virðast þeir samt hafa vitað eitthvað um 7/7.

„The Logic of Suicide Terrorism“ er fyrirsögnin á viðtali Scott McConnell við prófessor Robert Pape, sem er einn fremsti sérfræðingur Bandaríkjanna í hryðjuverkum. Þetta viðtal er hreint afbragð; innihaldsríkt og fræðandi og staðfestir ýmislegt sem áður hefur verið sagt í trássi við það sem stjórnvöld segja um hryðjuverk. Ef þið lesið bara eina grein í dag, þá mæli ég með þessari. Lesið greinina og látið Pape skýra þetta nánar sjálfan.

506. og nýjasta tölublað Schnews inniheldur líka sitthvað áhugavert - þar á meðal er grein um búðirnar við Kárahnjúka og nýskeða atburði þar. Að vísu ekkert sem hefur ekki komið fram í fjölmiðlum hér líka. Áhugavert samt, ásamt ýmsu öðru áhugaverðu.

Fólk spyr hvað stjórni för Bandaríkjastjórnar í Írak. Noam Chomsky, sem á það til að vera sleipur þegar stjórnmál eru annars vegar, á svar við því: „Það er heimsvaldastefna, kjáninn þinn“ nefnist sú grein.

Önnur grein sem ástæða er til að benda á er „The Reality Of This Barbaric Bombing“ eftir Robert Fisk. Hún fjallar einnig um árásirnar í London og setur þær í smá samhengi.

Ég vil líka benda á greinina „Law and Justice“ hjá MIFTAH - hún er um aðskilnaðarmúrinn í Palestínu. Annað tengt Palestínu: Þetta viðtal sem Éric Hazan tók við Mustafa Barghouti um störf hans í palestínskum grasrótarhreyfingum, og um leið um þær sömu hreyfingar og palestínsk stjórnmál. Virkilega safaríkt viðtal sem ég hvet fólk til að lesa.

Ég læt þetta nægja í bili. Hér verður næst bloggað mánudaginn 8. ágúst næstkomandi.

Appelsínustakkar í fylkingu ... hvað með okkur hin?

Nokkrar hugrenningar í kring um grein Uri Avnery, The March of the Orange Shirts frá 24. júlí. Ég mæli með því að fólk lesi hana fyrst.

How could a gang of thugs with an inhuman ideology take over [Germany] that, in its time, was perhaps the most cultured country in the world?
... I wrote a book on this, concluding with the question: Can it happen here?
Today, there is no escape from the terrible answer: yes, it can happen here. If we behave like the people of Weimar, we shall suffer the same fate as the people of Weimar.

Þetta eru orð að sönnu. Lýðræðið stendur ekki styrkari stoðum heldur en sem nemur tiltrú fólks á því. Lýðræði þarf að vera virkt og lifandi til þess að fólk sé ekki áhugalaust um það. Ef svona gæti gerst í Ísrael, gæti það þá ekki gerst á Íslandi? Munurinn er að vísu sá, að aðstæður eru allt aðrar á Íslandi. Aðstæðna vegna efast ég, fyrir mitt leyti, um að innlendir fasistar eigi eftir að yfirtaka Ísland í bráð. En ég hugsa að eðlið sé samt það sama. Ef þannig stæði á, þá mundu Íslendingar frekar vera heima að horfa á sjónvarpið, heldur en að rísa upp þegar á þyrfti að halda. Allavega eins og málum er háttað núna.

there is no reason any more for not calling the spade a spade: a large fascist camp is now threatening Israeli democracy.

Þar höfum við það. Avnery segir það umbúðalaust: Landtökumennirnir eru fasistar og ógna lýðræðinu í Ísrael. Orð að sönnu, orð að sönnu.

What is this [extremist] ideology? It was proclaimed loudly, again and again, by the central spokesmen of the movement: God gave us this country. All the land and its fruits belong to us. Anybody who gives away even one square metre of it to foreigners (meaning the Arabs, who have been living here for many generations) is violating the commandments of the Torah.

Þetta er nú athyglisverð rökleysa ... segjum að Gamla testamentið segi rétt frá, og gvuðsi hafi gefið Abraham og niðjum hans Kanaansland (núverandi Palestínu). Orðin "og niðjum hans" eiga ekki bara við gyðinga, heldur einnig aðra sem telja Abraham og Móse ættfeður og spámenn - það er að segja, ef stuðst er við guðleg rök, þá eiga gyðingar ekki meira tilkall til Palestínu heldur en kristnir menn og múslimar.

... in Israel, the Jewish religion has undergone a mutation that has completely changed its face.

...og svo er fólki brugðið um gyðingahatur þegar það hreyfir andmælum við mannréttindabrotum Ísraelsstjórnar. Ísraelskir zíonistar hafa unnið gyðingdómi meira ógagn heldur en flestir aðrir. Ef einhverjir eru sekir um að spilla fyrir gyðingum sem slíkum, þá eru það zíonistar.

There is no agreed scientific definition of "fascism". I define it as having the following attributes: the belief in a superior people (master Volk, chosen people, superior race), a complete absence of moral obligations toward others, a totalitarian ideology, the negation of the individual except as a part of the nation, contempt for democracy and a cult of violence. According to this definition, a large proportion of the settlers are fascists.

+Eg kinka kolli samþykkjandi.

It has been said about the Weimar Republic that it was not overthrown by the "brown shirts", but collapsed by itself, because at the moment of truth almost no one was prepared to stand up and defend it.

Ef í Bandaríkjunum kæmi upp sú staða að bókstafstrúarmenn klæddust í baseball-jakka með Ésú krysstum á bakinu og IXÞIS-fiski að framan og færu í "March on Washington" með það fyrir augum að binda endi á "kjaftakvörn" þessa "rotna lýðveldis" - veifandi rifflum og bandarískum fánum og kyrjandi hómófóbískar möntrur og rægjandi Darwin og aðra þrjóta - hvað ætli margir yrðu til þess að reyna að stöðva þá? Ekki það, að á meðan þeir ráða lögum og lofum í þinginu og Hvíta húsinu og annars staðar, þá er lítil hætta á að þetta gerist með svona beinum hætti -- en engu að síður, ef þetta gerðist, hvar værum við þá stödd?

Last week, thousands of "orange shirts" marched towards Gush Katif, in a distant echo of the 1920 "March on Rome" by Benito Mussolini's "black shirts" that overthrew the Italian democracy. Some 20,000 soldiers and police were mobilized to stop them. On the face of it, the army and police won, since the orange shirts did not reach the Gaza Strip. But for three days, under the blazing sun, the rebels put on public display their determination, unity and discipline.

Hægriöfgamenn hafa í gegn um tíðina átt það til að vera þrautskipulagðir og stunda effektíft "projection of power and credibility" svo ég leyfi mér að sletta ... mynda einhvers konar félagslegan spjótsodd, fylkja þjóðfélagslega hamalt, sem tvístraðir meinleysingjar úr hópi lýðræðisvina megna ekki að svara. Svona ná þeir árangri, svona ná þeir völdum. Það hafa auðvitað verið gerðar heiðarlegar tilraunir til að svara svona brögðum, eins og til dæmis á Spáni 1936-1939. Hernaðarlegir yfirburðir afturhaldsaflanna, samtrygging heimsvaldaríkja og hnattrænnar elítu - innri veikleikar og fimmta herdeild...allt hefur þetta hjálpast að við að veikja mótspyrnuna gegn svona ófagnaðaröflum.
Er þetta virkilega leiðin? Tja ... þegar trommuð hafa verið upp heil herfylki gegn lýðræðinu er auðvitað orðið of seint að grípa til fyrirbyggjandi eða strategískt próaktífra aðgerða. En á hinn bóginn: Þegar lognmolla er í samfélaginu og efnahagurinn á þokkalegu róli, hvenær gafst þá stundin betri, einmitt til þess? Vitur maður sagði að góðir búmenn hefðu vit á að leggja til hliðar í góðæri til að eiga eitthað upp á að hlaupa þegar harðnaði á dalnum. Hvers vegna höfum við ekki gert það? Það er að segja: Hvers vegna höfum við ekki nýtt núverandi lognmollu á Íslandi til þess að vinna friðsamlega og fyrirbyggjandi sigra? Ég spyr rangrar spurningar. Það sem ég vildi sagt hafa er: Eftir hverju erum við að bíða?

During these three fateful days, not one of the leading intellectuals, no writer like S. Yishar, Amos Oz, A.B. Yehoshua or David Grossman, no important professor, no poet or artist raised their voice against the settlers and their allies. ... One of their excuses was that they did not wish to be seen as supporting Ariel Sharon.

Ég játa að ég kenni í brjósti um þessa menn, sem gegna skoðanamyndandi stöðum í Ísrael. Maður getur varla annað en stamað frammi fyrir fánaborgum og þrammandi hermannaklossum fasista í vígamóð. Sá sem hreyfir mótbárum stofnar sjálfum sér og fjölskyldu sinni í hættu. Illt er að egna brjálæðinga. En er það ekki þannig? Þegar úlfarnir ráðast á sauðahjörðina, hvaða sauði dettur þá í hug að fara að reyna að stanga þá? Sauðir sem stanga úlfa eru útdauðir. Fífldirfska er "evolutionary disadvantage" - svo ég leyfi mér að sletta aftur.

The silence of the sheep. The silence of Weimar.

Eftir sitjum við rollurnar. Lömbin þagna. Meme til slátrunar. Hjörð af hræddum dýrum sem leita að öryggi og frumkvæði hjá einhverjum öðrum. Óttumst að taka afstöðu, óttumst ábyrgð - óttumst frelsi. Viljum vera undir verndarvæng hjá sterkum, föðurlegum leiðtoga. Hjúfra okkur í hálsakot.
Er ég svartsýnn? Í augnablikinu get ég ekki neitað því. Til lengri tíma litið er ég samt, merkilegt nokk, bjartsýnn á að þetta fari allt vel að lokum.
Ekki það, að mér hefur skjátlast áður.

IRA hafa lýst því yfir að þeir leggi niður vopn. Það er nú gott.

Eftir situr áleitin spurning: Hefði Gerry Adams nokkurn tímann komist á þing ef írskir lýðveldissinnar hefðu staðið með skilti í Belfast, frekar en að beita ofbeldi?

Eins má spyrja: Ef PLO hefðu aldrei beitt hryðjuverkum, hefði málstaður Palestínumanna þá nokkurn tímann fengið athygli heimsins? Hefði Palestínska heimastjórnin nokkurn tímann orðið til?

Hefðu Bandaríkjamenn nokkurn tímann getað lýst yfir sjálfstæði án þess að beita Breta ofbeldi? Hefði apartheid í Suður-Afríku nokkurn tímann lagst af ef svertingjarnir hefðu látið nægja að senda hvítum ráðamönnum bænaskjöl?

Spyr sá sem ekki veit.

Ég sé ástæðu til að benda á skrif á nokkrum bloggum, sem ekki sakar að líta á.

Hreinn Hjartahlýr hefur ekkert skrifað nema innblásin afreksblogg undanfarna daga. Lesið það allt, mér fallast hendur ef á á að hælæta einstök efnisatriði! En ég vil samt benda á "Drög að byltingu gegn heimskunni". Hreinn, takk fyrir að vera til og auðga líf okkar.

Þórði liggur mikið á hjarta - maðurinn sem eitt sinn gagnrýndi mig fyrir að blogga of mikið er genginn í lið ritræpusjúklinga sjálfur. M.a. skrifaði hann um leiðara Morgunblaðsins í gær (sem ég hefði klórað mér í skallanum yfir, ef ég væri sköllóttur). Styrmir segist bera meiri virðingu fyrir þeim sem mótmæli með "orðum og rökum".
Gott og vel. En hvað ef ekki er hlustað á þessi orð og rök? Ef orðunum og rökunum er ekki fylgt eftir með valdi, hvers vegna ættu ráðamenn þá ekki að skella skollaeyrum við þeim?
Borgaraleg stjórnmál snúast ekki um að komast að niðurstöðum sem eru bestar fyrir almenning. Þau snúast um að hlaða undir valda-bakland þeirra borgaralegu stjórnmálamanna sem sitja við stjórnvöl hverju sinni. Borgaraleg stjórnmál eru eiginhagsmunastjórnmál. Forréttindastjórnmál. Einkavinastjórnmál. Baktjaldamakkandi reykfylltra-bakherbergja klíkustjórnmál. Lýðræðislegt debatt er gjálfur eitt og gjamm, blandað rökvillum og frösum. Meira að segja umræðunni er stjórnað af valdastéttinni - þeim sem ráða yfir fjölmiðlunum, hvort sem það eru prívat stórbokkar eða flokksgæðingar út stjórnarflokkunum.
Fyrirætlunum þeirra verður ekki mótmælt með árangri nema til komi eitthvað sem lætur þá verða að taka tillit til þeirra. Ég er hræddur um að 100 manna útifundur breyti litlu um stuðning íslenskra stjórnvalda við Íraksstríðið. En ef verkalýðsfélögin hótuðu allsherjarverkfalli - eða viðskiptastórbokkar hótuðu að hefja stórkostlegan fjármagnsflótta úr landi - eða ef hótað væri hallarbyltingu í stjórnarflokkunum - eða ef froðufellandi dólgur sæti í Hallgrímskirkjuturni með 50 megatonna kjarnaodd ... ef slíkt vald væri í spilinu, þá yrði ekki hjá því komist að taka tillit til þess.
Ég er hræddur um að lakkúði á vinnuvél eða skyrblettir í silkislifsi hrökkvi of skammt.
Valdbeiting er tilgangslaus ef yfirburðirnir eru ekki afgerandi. Ríkisvaldið hefur einmitt afgerandi yfirburði þegar kemur að valdbeitingu, ekki síst vegna þess að hún siglir þá vindátt sem sterkust er í þjóðfélaginu þá stundina. Leiðin til þess að koma viti fyrir ríkisvaldið er að óbifandi vilji til spriklandi lýðræðis, alvöru mannréttinda, ábyrgs frelsis, vitræns þjóðarbúskapar og húmanískrar félagshyggju verði svo útbreiddur að hann verði meginstraumurinn og verði þess vegna ofan á. Til þess þarf efnahagslegan grundvöll sem er eðli stefnunnar samkvæmur, lóð þessara hugmynda í efnahagskerfinu verða að vega nógu þungt til að skipta sköpum. Já, þetta útheimtir víst geysimikla vinnu.

Hugleiðing mín um notagildi mótmæla sem baráttuaðferðar gerir Þórður líka að umtalsefni. Lesa það. Loks bendir hann á þessa grein Helga Seljan á heimasíðu Ögmundar Jónassonar. Lesa hana líka.

Síðasti bloggarinn sem ég bendi á í bili er Sverrir Jakobsson í þessu bloggi.
~~~ ~~~ ~~~ ~~~
Um daginn benti ég á þessa grein á Gagnauga þar sem fjallað er um síðasta Bilderberg-fund og spáð í spilin hvers megi vænta í fréttum á næstu misserum. Eitt atriðið var þetta:

Yuan, gjaldmiðill Kínverja leiðréttur
Reynt verður að sannfæra stjórnvöld í Kína um að leiðrétta gengi Yuansins. Vöxtur efnahags Kína hefur valdið ólgu í fjármálum heimsins og grípa þurfi til aðgerða í gjaldeyrismálum Kínverja.

Er það ekki að rætast? Það verður fróðlegt að fylgjast með, hversu mörg atriði rætast á þessum lista.

Kárahnjúkabúðir, almennt um mótmæli og strategíu okkar íslenskra vinstriöfgamanna

Ég get ekki sagt að ég sé undrandi á því að tjaldbúðirnar við Kárahnjúka hafi verið teknar niður. Satt að segja þykir mér gefa auga leið að fólk, sem er þarna í þeim erindagjörðum að reyna að stöðva framkvæmdir, sé litið óhýru auga af fyrirtækjunum sem standa í framkvæmdunum, og þegar eignaspjöll eru annars vegar - auk þess þegar fólk hlekkjar sig við vélar og á jafnvel í handalögmálum við réttvísina - þá þykir mér ekki skrítið að valdstjórnin grípi í taumana. Mér þykir reyndar athyglisvert að það komi í hlut Prestssetrasjóðs, af öllum landsins stofnunum, að setja stólinn fyrir dyrnar.
Samúð mín er með mótmælendum við Kárahnjúka. Hvað sem því líður, hversu góð hugmynd þetta er/var í sjálfu sér, og hvað sem líður einstökum aðgerðum, þá er samúð mín með málstað mótmælendanna. Ég hef svosem sagt það áður, að ég hef misst trúna á mótmælum sem baráttuaðferð. Ég mótmæli vissulega stundum, þegar ástæða er til ... en það er frekar til þess að gera lýðum ljósa andstöðu mína, reka upp ramakvein þess sem ofbýður valdníðsla, ofbeldi eða óstjórn, eða einfaldlega til þess að friða mína eigin samvisku. Mótmæli eins og sér áorka samt ekki miklu. Sem liður í stærri strategíu geta þau gert það -- en sem afmörkuð aðgerð er í mesta lagi hægt að vinna varnarsigur með þeim.
Þegar að er gáð erum við ekki svo fá, sem látum okkur mikilsverð mál varða og leitum að lausnum til að byggja betra samfélag. Við erum ekki svo fá. Verkefni okkar eru heldur ekki óyfirstíganleg, öðru nær. Vandinn er í nokkrum þáttum:
a) Við erum tvístruð. Hvert í sínu horni áorkum við litlu og aðgerðir okkar verða samhengislausar hver við aðra.
b) Við erum stefnulaus. Afmarkaðar aðgerðir, án þess að við vitum að hverju við stefnum í stærra samhengi, eru vonlausar.
c) Við erum ótrúverðug. Helmingurinn af okkur eru gamlir hippar sem hafa staðið í pólitísku ströggli í áratugi án þess að áorka miklu. Hinn helmingurinn eru ungæðislegir krakkar fullir af draumórum. (Ég býst við að ég falli í síðari hópinn.)
d) Tengsl okkar við félagslegt umhverfi eru of veik. Á fyrsta maí mátti sjá kröfugöngu sem samanstóð aðallega af fulltrúum hinna ýmsu grasrótarhreyfinga, og af starfsmönnum verkalýðsfélaga. Í hinni fámennu göngu virtust ekki vera ýkja margir mættir sem hlunnfarnir launamenn. Þegar grasrótarstarf er annars vegar, hvar eru þá tengslin við verkalýðshreyfinguna, við atvinnulífið, við menningarstarfsemi, við fjölmiðla?
Aflið sem megnar að breyta samfélaginu er fólkið sem myndar það. Ef það fólk (almenningur) er ekki með okkur á bandi, þá eigum við ekki eftir að gera neina byltingu, enga stórkostlega breytingu á samfélaginu. Ef við náum ekki til fólks, þá ættum við að setjast niður og hugsa málin upp á nýtt.
Tvístrað lið stenst harðsnúinni fylkingu ekki snúning. Afturhaldsöflin hafa alla tíð haft vit á að fylkja liði sínu á vígvelli stjórnmálanna. Gegn slíkri fylkingu er ekki hægt að berjast nema fylkt sé liði á móti. Hvar er þessi fylking? Eftir hverju erum viða ð bíða, að mynda hana?

Þið ættuð að lesa færslur undanfarinna daga hjá honum Þórði. Þar er ýmislegt sem vit er í. Dæmi:

Síðasta sunnudag, vísað í greinar Jóhannesar Bjarnar um hina komandi olíukreppu.
Síðasta mánudag, langt mál um nýkóna á Íslandi og annarsstaðar, lang mál sem ég held að ég eigi eftir að tjá mig meira um áður en yfir lýkur.
Síðasta þriðjudag um öryggi fólks í Bretlandi ef það er svo óheppið að vera dökkhært og jarpt á hörund.
Seinna sama dag um Ann Coulter sem Þ.I. kallar réttilega "þessa mögnuðu, hrokafullu, öfgafullu hægrisinnuðu dræsu"
...og loks, snemma að kvöldi sama dags, um mótmæli á Kárahnjúkum.
Já ... þið ættuð að lesa þetta. Þið hefðuð gott af því.
~~~ ~~~ ~~~ ~~~
"London Bombing Aftermath: The Spin Continues" er nýleg grein á Propaganga Matrix, eftir Paul Joseph Watson. Höfundur spyr áleitinna spurninga og veltir upp áleitnum sjónarmiðum varðandi 7/7-sprengingarnar í London ... já, ég, fyrir mitt leyti, legg ekki trúnað á opinberu söguna um atburðina þá. Hvað akkúrat gerðist veit ég ekki, en ótrúverðugum sögum trúi ég ekki. (Það minnir mig á nýlegt loforð mitt um að setja fram hýpótesu um hryðjuverk og heimsvaldastefnu og tengsl þar á milli ... þarf að fara að koma því í verk.9

Nokkrar nýlegar fréttir af Kárahnjúkabúðum á mbl.is:
„Um 50 mótmæla við Kárahnjúka“ ...
„Mótmælendur ollu tjóni á byggingum og skiltum á Kárahnjúkum“ ...
„Mótmælendur handteknir við Kárahnjúka í nótt“ ...
„Impregilo mun líklega kæra mótmælendur við Kárahnjúka“ ...
„„Leyfi mótmælenda fyrir tjaldbúðum við Kárahnjúka afturkallað“ ...
„Mótmælendur fordæma aðgerðir lögreglu og ætla að mótmæla áfram“ ...

Já, mér þykir týra.

Ég hef mínar efasemdir um að Kárahnjúkavirkjun verði stöðvuð með því að setja upp mótmælabúðir. En ég er nokkuð viss um að hún verði ekki stöðvuð með því að láta taka búðirnar niður. Jákvæð eða neikvæð athygli? Almenningsálit? Ég býst ekki við að neinn hafi látið sig dreyma um að framkvæmdirnar færu úit af sporinu við þetta framtak, enda er það varla ætlunin. Frekar að setja fordæmi, byrja strax þróttmikla vinnu gegn næstu virkjun sem verður tekin á dagskrá. Á að sökkva Þjórsárverum? Það verður ekki gert andspyrnulaust.

Hér getur að líta mynd af meintum sprengjumönnum í London á dögunum:

Trúverðug mynd, ekki satt? Við fyrstu sýn, jú. Er nánar er að gætt er ég ekki eins viss. Sjáið manninn með hvítu derhúfuna ... skoðið hann vel ... lesið svo þetta. Hefur verið átt við þessa mynd? Hefur verið fiktað við mynd sem yfirvöld senda frá sér? Ég veit ekki mikið um myndvinnslu -- en mér þykir þetta líta einkennilega út.
~~~ ~~~ ~~~ ~~~
Mér finnst skrítið hvað sumir láta sér fátt um finnast, að Arna hafi fengið meðferðina sem hún fékk á Ben Gurion-flugvelli. Sumir bloggarar, sum vefrit, sumir aðstoðarmenn utanríkisráðherra ... mér þykir það í frásögur færandi að fólk sæti illri meðferð af hendi opinberra starfsmanna, af ásetningi og í landi sem íslenska ríkisstjórnin telur til vina sinna. Það er nú það. Íslenska ríkisstjórnin er aumur leppur fyrir heimsvaldasinna. Hún er meira að segja svo grátbrosleg að reyna að halda úti vísi að eigin heimsvaldastefnu. Út af fyrir sig er ekkert óeðlilegt við það; kapítalískar ríkisstjórnir eru meira og minna sama eðlis hvar sem þær eru -- en engu að síður hallærislegt á svona litlu leiksviði eins og Íslandi.
~~~ ~~~ ~~~ ~~~
Hef núna tekið strætó þrisvar sinnum með nýja leiðakerfinu. Get ekki sagt að ég sé bergnuminn. Get hins vegar sagt að af skyssum og afglöpum R-listans er þessi ekki sú minnsta. Ekki segi ég að þessu nýja kerfi sé alls varnað -- öðru nær, það hefur ýmsa kosti -- en gallarnir eru þónokkrir líka, þar á meðal nokkrir alvarlegir. Ég nenni satt að segja ekki að rekja það hér og nú -- aðrir hafa gert það annars staðar, ég kann að gera það síðar -- en á heildina litið er ég óánægður með þetta nýja kerfi. Það þarfnast mikilla og skjótra endurbóta.

Ég hef loksins lokið við bókina Um anarkisma sem Siggi pönk gaf út fyrir mánuði síðan. Þessi bók er frábær, en hefði þolað prófarkarlestur. Það sem höfundurinn, Nicholas Walter, eignar anarkisma á að mjög miklu leyti við mig. Birgir steig skrefið til fulls þegar hann hafði lesið hana -- ég geng ekki svo langt, en gengst fúslega við því að eiga mikið sameiginlegt með anarkistum. Ég er nefnilega frjálslyndur marxisti.
~~~ ~~~ ~~~ ~~~
Nýja sjónvarpsstöðin TeleSUR er komin í loftið! Það verður áhugavert að fylgjast með. Vonandi koma þeir upp enskri síðu líka, eins og Al Jazeera hafa gert. TeleSUR, fyrir þá sem ekki vita, er semsé tilraun stjórnvalda í Venezuela, Kúbu, Argentínu og Uruguay til að vega á móti pró-amerískum áróðri mainstream-sjónvarpsstöðva -- tilraun til að stofna eins konar Al Jazeera Suður-Ameríku.
~~~ ~~~ ~~~ ~~~
Leppstjórnin í Írak ætlar að láta nýju stjórnarskrána vera undir miklum áhrifum frá Sharía, forneskjulegum og ómannúðlegum lögum íslams. Það líst mér illa á, andskotinn hafi það!
~~~ ~~~ ~~~ ~~~
Hins stórgóðu mynd Johns Pilger, Palestine is Still the Issue, er hægt að sjá hérna.

„Ekkert gefur tilefni til afskipta“ segir Illugi Gunnarsson um mál Örnu, sem var haldið í 30 klukkutíma varðhaldi með 10 klukkutíma stífum, ógnandi og yfirþyrmandi yfirheyrslum. „Segir Illugi það ákvörðunarrétt hvers ríki fyrir sig hverjum það hleypir inn í landið.“ -- Já Illugi, en það er ekki það sem málið snýst um, heldur er það ill og ósanngjörn meðferð á íslenskum ríkisborgara. Illugi beitir gömlu strámanns-rökvillunni, -- hann er inntur álits á einhverju en svarar einhverju öðru - svarar veikari spurningu í stað þeirrar sem spurt var.
Ísraelar hljóta að ráða því hverjum þeir hleypa inn í landið - hvað svo sem okkur finnst um það, hvernig þeir fara með það vald sitt - en að halda manneskju í 30 klukkutíma og beita ógnunum og aðdróttunum - það er í meira lagi athugavert. Orð Illuga sýna kannski best hvar í flokki íslensk stjórnvöld standa - sömu íslensku stjórnvöldin og skirrtust ekki við að loka Falun Gong-fólkið inni í grunnskóla í Njarðvík hér um árið. Íslensk stjórnvöld eru illa haldin af þjónkunarlund við erlend stórveldi.
~~~ ~~~ ~~~ ~~~
Sjálfbyrgingslegur vandlætingarvaðall Egils Helgasonar gegn Múrnum og öðrum illmennum heldur áfram. Makalaust að sjá hvað hann notar alltaf breiðan pensil þegar hann málar upp heimsmynd sína. Hvers vegna vill hann ekki sjá hlutina í samhengi? Fer eitthvað milli mála hvaða hlutverk Bandaríkin og leppar þeirra spila í atburðum líðandi stundar?
~~~ ~~~ ~~~ ~~~
Þórhallur Heimisson skrifaði um hryðjuverk og bókstafstrú í Fréttablaðið í gær („Bókstafstrú - hin leynda hætta“ s. 20) og var ekki í vafa um að bókstafstrú hefði glapið fjóra múhameðstrúarmenn til ógæfuverkanna í London 7/7 sl. Bókstafstrú er jafn hættuleg og hún er heimskuleg, hver sem á í hlut. Látum liggja milli hluta að trúfélag Þórhalls sjálfs byggir á „ritningu“ þótt það sé snúið út úr henni, og það þrátt fyrir hvað stendur í henni sjálfri:

„Ég votta fyrir hverjum þeim manni, sem heyrir spádómsorð þessarar bókar, að leggi nokkur við þau, mun Guð á hann leggja þær plágur, sem um er ritað í þessari bók.
Og taki nokkur burt nokkuð af orðum spádómsbókar þessarar, þá mun Guð burt taka hlut hans í tré lífsins og í borginni helgu, sem um er ritað í þessari bók.“ (Opinberunarbókin 22:18-19)

...en látum það liggja milli hluta. Þórhallur segir að lengi hafi „það verið haft fyrir satt að það sem knýr menn til að fremja voðaverka af þessu tagi sé fátækt og vonleysi, örvænting, fáfræði og úrræðaleysi einstaklinga sem aldir eru upp við ill kjör í fátækrahverfum þriðja heimsins.“ - það er líka rétt, það er yfirleitt svo þegar um sjálfsmorðsárásarmenn er að ræða. „Nú hefur aftur á móti komið í ljós að þeir sem frömdu morðin í London voru breskir ríkisborgarar úr millistétt“ - er það? Ég efast stórlega um það. Ekki nema í þeim skilningi að átt sé við þá illa innrættu baktjaldamakkara innan breska stjórnkerfisins, sem er líklegt að hafi haft puttana í spilinu! En Þórhallur heldur áfram: „Hið sama átti við morðingjana sem flugu farþegaþotunum á turnana í New York 11. september árið 2001 og þá sem stóðu á bak við árásirnar í Madríd fyrir skömmu. Þeir voru allir vel stæðir og vel menntaðir.“ Þórhallur tilheyrir þeim hópi fólks sem heldur að nokkrir óðir menn með dúkahnífa hafi rænt flugvélunum og klesst þeim inn í skotmörk sín og bandaríska stjórnkerfið ekki komið neinum vörnum við. Sú samsæriskenning hefur svo stórkostlega annmarka að það er óhætt að afskrifa hana. Fóru bókstafstrúarmennirnir á nektarbúllu og drukku sig fulla kvöldið fyrir árásirnar? Svo segir opinbera sagan. Gera bókstafstrúaðir múslimar þannig? Nei. Skilja þeir Kórana eftir á barstólum? Millilenda útsmognir samsærisrefir á leið í flugrán, með svo stuttum fyrirvara að þeir gætu misst af fórnarlömbum sínum ef fyrra flugið tefðist? Nei. Þessi saga er uppspuni, lygi. Hún er endurtekin í sífellu þangað til almenningur trúir henni. Með öðrum orðum er almenningur heilaþveginn með henni.
Condoleezza Rice, þá þjóðaröryggisráðgjafi BNA, sagði 22. september að Bandaríkjastjórn hefði undir höndum sönnunargögn sem tengdu Ósama bin Laden við atburðina 11. september. Þau gögn yrðu lögð fram í fyllingu tímans. Þau hafa ekki ennþá verið lögð fram. Opinbera samsæriskenningin er ennþá ekki annað en órökstudd samsæriskenning. Það eru ekki rökin sem blíva þar á bæ, heldur endurtekningin. En aftur að Þórhalli. Hann segir: „Þannig að ekki var það vonleysi eða fátækt sem að baki bjó. Svo virðist sem drifkrafturinn hafi verið hugmyndafræði sem kennd er við íslamska bókstafstrú.“ Íslömsk bókstafstrú -- hættuleg og heimskuleg sem hún er -- er grýla, máluð á vegg. Það sem er á ferðinni er herská og ófyrirleitin heimsvaldastefna stórveldis (BNA) í kreppu. Í því ljósi verður að skoða þessa atburði, aðdraganda þeirra og eftirmála. það gefur auga leið að það hafa ekki allir rétt við þegar þungir hagsmunir eru í húfi. Hvernig á að bæta hergagnaframleiðendum það upp, að Kalda stríðið sé búið? Það verður að finna nýja grýlu. Það eru næg dæmi um að menn innan CIA og hersins hafi lagt á ráðin um hryðjuverk til að nota sem skálkaskjól fyrir að útfæra heimsvaldastefnu í verki. Það eru næg dæmi um slíkar áætlanir. Meðal annars áætlanir sem ganga út á að hafa bandaríska borgara fyrir (fyrstu) skotmörk. Það er líka ástæða til að ætla að sumar þessara áætlana hafi verið framkvæmdar í alvörunni. Þar á meðal ein þann 11. september 2001.
~~~ ~~~ ~~~ ~~~
Nú þegar þetta er skrifað er gamla leiðakerfi Strætó bs. að renna sitt síðasta og í staðinn kemur nýja leiðakerfið, sem er að sumu leyti ágætt, en að sumu leyti afleitt. Ég vona innilega að það verði tekið til gagngerrar endurskoðunar mjög fljótt!

Arna handtekin á Ben Gurion-flugvelli og send úr landi eftir 30 tíma varðhald og yfirheyrslur ... jahérna. Ég hugsa aðþað sé rétt hjá Sveini Rúnari Haukssyni, að störf hennar með ISM eigi sinn þátt í þessu. Út af fyrir sig er ekkert fjarstæðukennt við þetta. Fólk sem kemur til Palestínu til að leggja Palestínumönnum lið er iðulega áreitt og hindrað í störfum sínum, þótt þau séu fullkomlega friðsamleg og meinlaus. Ísraelar vilja ekki að Palestínumenn fái móralskan stuðning við málstað sinn - málstað þjóðfrelsis og mannréttinda.
~~~ ~~~ ~~~ ~~~
Mótmælendur hlekkja sig við vinnuvélar á Kárahnjúkum ... gott hjá þeim. Gott hjá þeim að tefja framkvæmdir í tvo klukkutíma. Ofbeldisaðgerð? Barnaskapur? Öfgar? Nei: Réttlát reiði vegna valdníðslu og fullkomins skeytingarleysis um umhverfið. Landsvirkjun og svarabræður hennar í Impregilo, Bechtel og Alcoa væri réttast að setja í gapastokk. Allt það sem er svo óeðlilegt við Kárahnjúkavirkjun og Reyðarál - bæði við sjálfa framkvæmdina og við ákvarðanatökuna, umræðuna og allt það - ætti að duga til þess að þjóðin gripi andann á lofti og léti hendur skipta. Hvers vegna gerir fólk ekkert? Þegar þessir auðþursar verða komnir með hendurnar á kaf upp í raskatið á íslenska hagkerfinu munu íslenska ríkisstjórnin ekki hafa neitt yfir þeim að segja lengur: Þeir munu hafa hana í rassvasanum. Efnahagsumsvif = völd. Við erum að undirbúa framsal á drjúgum hluta af fullveldinu. Mörg ríkisstjórn í stærra landi var felld af erlendum stórfyrirtækjum fyrir minni hagsmuni. Ætli íslenskum valdamönnum sé sjálfrátt?
~~~ ~~~ ~~~ ~~~

Of all tyrannies, a tyranny exercised for the good of its victims may be the most oppressive. It may be better to live under robber barons than under omnipotent moral busybodies. The robber baron's cruelty may sometimes sleep, his cupidity may at some point be satiated; but those who torment us for our own good will torment us without end, for they do so with the approval of their own conscience. -- C. S. Lewis

~~~ ~~~ ~~~ ~~~

Naturally the common people don't want war; neither in Russia, nor in England, nor in America, nor in Germany. That is understood. But after all, it is the leaders of the country who determine policy, and it is always a simple matter to drag the people along, whether it is a democracy, or a fascist dictatorship, or a parliament, or a communist dictatorship. Voice or no voice, the people can always be brought to the bidding of the leaders. That is easy. All you have to do is to tell them they are being attacked, and denounce the pacifists for lack of patriotism and exposing the country to danger. It works the same in any country. -- Hermann Göring

Stórfrétt frá Nepal: Prachanda, formaður maóistaflokksins, hefur tekið dr. Baburam Bhattarai í sátt, sinn fyrrum næstráðanda sem féll í ónáð með þeim afleiðingum að flokkurinn var að bresta í tvennt. Þeir eru vinir aftur. Byltingarmennirnir geta þá aftur snúið sér að byltingunni.